މޫދަށް ކުނިއަޅާކަމަށްބުނެ 45000 ރުފިޔާއިން ތުލުސްދޫ ކައުންސިލް އިދާރާ ޖޫރިމަނާ ކޮށްފައި ވީނަމަވެސް އެފައިސާ ދައްކަން ނުޖެހޭނެކަމަށް ތުލުސްދޫ ކައުންސިލުން ބުނެފިއެވެ.
އެންވާރަމެންޓަލް ޕްރޮޓެކްޝަން އޭޖެންސީ (އީ.ޕީ.އޭ)އިން ނެރުނު ބަޔާނެއްގައި ވަނީ، ތުލުސްދޫ ކައުންސިލުން ކާބޯތަކެތީގެ ކުނިއަޅާ ޑަސްބިންތަކުގައިވާ ކުނިތައް މޫދަށް އަޅަމުންދަނީ ކުނިމެނޭޖު ކުރުމާބެހޭ ޤަވާއިދާ ކަނޑައެޅިގެން ޚިލާފަށްކަމަށެވެ.
އެހެން ނަމަވެސް ދެންނެވުނު ކުނި މެނޭޖްކުރުމުގެ ގަވައިދަކީ ކައުންސިލުން ހަދާފައިވާ އަދި އެއްވެސް އިރެއްގައި އަމަލުކުރަމުން އަންނަ ގަވައިދެއް ނޫންކަމަށް ހާމަ ކުރަމެވެ. އަދި މިފައިސާއަކީ ދައްކަން ޖހޭ އެއްޗެއް ނޫންކަމަށް ތުލުސްދޫ ކައުންސިލުން ވަނީ ބުނެފައެވެ.
އެކައުންސިލުން ބުނީ މިނިސްޓްރީ އޮފް އެންވާރުމަންޓު އެނާޖީން 5 އޮގަސްޓް 2013 ގައި ގެޒެޓް ކޮށްފައިވާ ކުނި މެނޭޖްކުރުމުގެ ގަވައިދުގެ 31 ވަނ މާއްދގެ (ހ) ދަށުން ކުނިމެނޭޖްކުރުމުގެ ގަވާއިދާ ޚިލާފުކަމެއް ހިނގާނަމަ ތަންފީޒީ އިދާރާއިން ބަލާ ފާސްކުރަންވާނެކަމަށް ބަޔާންކޮށްފައިވާކަމަށެވެ. އަދި އެމާއްދާގެ (ށ) ގައި ކުނި މެނޭޖުކުރާ ފަރާތަށް ރިޕޯޓެއް ހަދާ ހުށައަޅަންވާނެކަމަށް ބުނެފައިވާކަމަށެވެ. ނަމަވެސް ޖޫރިމަނާ ކުރިއިރު މިފަދަ ރިޕޯޓެއްވެސް ލިބިފައި ނުވާކަމަށެވެ.
އެކައުންސިލުން ބުނެފައިވަނީ އެންބާރުމަންޓް މިނިސްޓްރީއާއިއެކު ކުނި މެނޭޖްކުރު 17 ޖޫން 2021 ގައި އެމްއޯޔޫއެއްގައި ސޮއިކުރެވި، ރަށުގައި ވޭސްޓް މެނޭޖްމަންޓް ސެންޓަރެއް ގާއިމްކުރާނެކަމަށް ބަޔާންކޮށްފައިވީ ނަމަވެސް މިއަދާ ހަމައަށްވެސް މި އެމްއޯޔޫއާއި ގުޅޭ އެއްވެސް މަސައްކަތެއް ތުލުސްދޫގައިކޮށްފައި ނުވާކަމަށްވެސް ވަނީ ބުނެފައެވެ.
ކުނިމެނޭޖް ކުރުމަށްޓައި މަސައްކަތް ކުރިއަށް ނުދާތީ ތަކުރާރުކޮށް އެންވާރުމަންޓް މިނިސްޓްރީގައި އެދުނު ނަމަވެސް އެއިދާރާއިން މިކަމަށް އިޖާބަ ދީފައި ނުވާކަމަށް ތުލުސްދޫ ކައުންސިލުން ވަނީ ބުނެފައެވެ. އަދި މިފަދަ ޖޫރިމަނާއެއް އީޕީއޭއިން ކޮށްފައިވަނީ ނޫސްތަކުގެ ހެޑްލައިން ހަދައި، ފަތުރުވެރިކަން ފުޅާވަމުންދާ ރަށްތަކުގެ އަގުވައްޓާލުމުގެ ގޮތުންކަމަށް ދެކޭކަމުގައިވެސް މިބަޔާނުގައިވެއެވެ.
އެކައުންސިލުން ވަނީ ލޯކަލް ޓުވަރިޒަމް ތުލުސްދޫގައި ފުޅާވަމުންދާ މިދަނޑިވަޅުގައި ރަށުގެ އަގުވެއްޓޭގޮތަށް އީޕީއޭއިން މިފަދަ ޒިންމާދާރުކަން ކުޑަ ބަޔާނެއް ނެރެފައިވާތީ އެކަން އެންމެ ހަރުކަށި އިބާރާތުން ކުށްވެރިކޮށްފައެވެ.
