އިންޑިއާގެ އެހީގައި މާލޭ ސަރަހައްދުގައި އިތުރު 2،000 ހައުސިންގ ޔުނިޓް އެޅުމަށް ނިންމާފައިވާކަން ރައީސް އިބުރާހިމް މުހައްމަދު ސާލިހު ހާމަ ކުރައްވައިފިއެވެ.
ރައީސް ސާލިހު މިކަން ހާމަ ކުރައްވާފައިވަނީ، އެމަނިކްފާނު މިހާރު އިންޑިއާއަށް ކުރައްވަމުން ގެންދަވާ ދަތުރުފުޅުގައި ތިލަމާލެ ބުރިޖް މަޝްރޫއު އިފްތިތާހު ކުރެއްވުމަށްފަހު، އިންޑިއާގެ ބޮޑުވަޒީރު ނަރެންދުރަ މޯޑީއާއެކު ބޭއްވެވި ނޫސްވެރިންގެ ބައްދަލުވުމުގައި ވާހަކަ ދައްކަވަމުންނެވެ. ރައީސް ސާލިހު ވިދާޅުވި ގޮތުގައި، މި 2،000 ޔުނިޓް އެޅުމަށް އިންޑިއާގެ އެގްޒިމް ބޭނުންކުން ރާއްޖެއަށް 119 މިލިއަން ޑޮލަރުގެ ލޯން އެހީ ދިނުމަށް މިހާރުވަނީ ހަމަޖައްސާފައި ކަމުގައެވެ.
އިންޑިއާގެ އެހީގައި ހުޅުމާލޭގައި މިހާރުވެސް ދަނީ 4،000 ހައުސިންގ ޔުނިޓް އެޅުމުގެ މަސައްކަތް ކުރަމުންނެވެ.
އިންޑިއާއިން އިތުރު ހައުސިންގ ޔުނިޓް އެޅުމަށް ނިންމާފައި ވާއިރު، އިންޑިއާގެ އެހީގައި ރާއްޖޭގައި ކުރިޔަށްގެންދާ ތަރައްގީގެ މަޝްރޫއުތައް އިތުރަށް ހަލުއިކޮށް މަޝްރޫޢުތައް އަވަހަށް ނިމުމަށްޓަކާ އިތުރު 100 މިލިއަން ޑޮލަރުގެ ކްރެޑިޓް ލައިނެއް ހަމަޖެއްސުމަށްވެސް ނިންމާފައިވާކަން އިންޑިއާގެ ބޮޑުވަޒީރު ނަރެންދުރަ މޯޑީ މިއަދު ވަނީ ހާމަ ކުރައްވާފައެވެ.
މޯޑީގެ ދައުވަތަކަށް ރައީސް ސާލިހު މިހާރު އިންޑިއާއަށް ކުރައްވަމުން ގެންދަވާ ދަތުރުފުޅުގައި މިއަދުވަނީ ތިލަމާލެ ބުރިޖްގެ ބިންގާ އަޅުއްވާފައެވެ. އޭގެ އިތުރުން 6 އެމްއޯޔޫއެއްގައި ސޮއިކުރެއްވުމަށްފަހު، ދެބޭފުޅުން ވަނީ ޖޮއިންޓް ޕްރެސް ބްރީފިންއެއް ބާއްވަވާފައެވެ.
މިއަދުގެ ރަސްމިއްޔާތުގައި ދެ ގައުމުގެ ދެމެދުގައި ސޮއިކުރި އެއްބަސްވުންތަކަކީ؛
1. އަންހެނުންގެ ތަރައްގީ އަށް މަސައްކަތް ކުރާ ކޮމިޓީތަކާއި ކައުންސިލްތަކަށް ތަމްރީނުދިނުމުގެ އެއްބަސްވުމެއް.
2. ސައިބާ ސެކިއުރިޓީއާ ގުޅޭ މައުލޫމާތު ދެ ގައުމުގެ ދެމެދު ބަދަލުކުރުމުގެ އެއްބަސްވުމެއް.
3. މަސްވެރިކަން ކުރެވޭނެ ސަރަހައްދުތައް ދެނެގަތުމުގެ ގާބިލުކަން އިތުރުކުރުމުގެ އެއްބަސްވުމެއް.
4. ކާރިސާތަކުގައި ދިމާވާ ކަންކަން މެނޭޖުކުރުމުގެ ދާއިރާއިން ދެ ގައުމު ގުޅިގެން މަސައްކަތް ކުރުމުގެ އެއްބަސްވުމެއް.
5. ފުލުހުންގެ ހިދުމަތް ހަރުދަނާ ކުރުމުގެ ގޮތުން 41 މިލިއަން ޑޮލަރުގެ ލޯނެއް ދަށުން ހިންގާ އުމްރާނީ ތަރައްގީގެ މަޝްރޫއުގެ އެއްބަސްވުން.
6. މާލެ ސަރަހައްދުގައި އިތުރު 2،000 ހައުސިން ޔުނިޓް އެޅުމަށް ހެދި އެއްބަސްވުން.
