އިންޑިއާގެ އެހީގައި ރާއްޖޭގައި ކުރިޔަށްގެންދާ ތަރައްގީގެ މަޝްރުއުތައް އިތުރަށް ހަލުއިކޮށް މަޝްރޫޢުތައް އަވަހަށް ނިމުމަށްޓަކާ އިތުރު 100 މިލިއަން ޑޮލަރުގެ ކްރެޑިޓް ލައިނެއް ހަމަޖެއްސުމަށް ނިންމާފައިވާކަން އިންޑިއާގެ ބޮޑުވަޒީރު ނަރެންދުރަ މޯޑީ މިއަދު ހާމަ ކުރައްވައިފިއެވެ.
މޯޑީގެ ދައުވަތަކަށް ރައީސް ސާލިހު މިހާރު އިންޑިއާއަށް ކުރައްވަމުން ގެންދަވާ ދަތުރުފުޅުގައި މިއަދުވަނީ ތިލަމާލެ ބުރިޖްގެ ބިންގާ އަޅުއްވާފައެވެ. އޭގެ އިތުރުން 6 އެމްއޯޔޫއެއްގައި ސޮއިކުރެއްވުމަށްފަހު، ދެބޭފުޅުން ވަނީ ޖޮއިންޓް ޕްރެސް ބްރީފިންއެއް ބާއްވަވާފައެވެ.
މޯޑީ ވިދާޅުފައިވާ ގޮތުގައި އިންޑިއާއިން މި ހަމަަޖައްސާ ކްރެޑިޓް ލައިންގެ މަގުސަދަކީ ރާއްޖޭގައި ހިންގަމުންދާ ތަރައްގީގެ ބޮޑެތި މަޝްރޫއުތައް އަވަހަށް ނިމުމަކާއި ހަމައަށް ގެނައުން ކަމުގައެވެ.
އިންޑިއާއިން މިއަދު ހަމަޖެއްސި ކްރެޑިޓްލައިންއާއެކީ، މިހާތަނަށް އެގައުމުން ރާއްޖެއަށް ދޫކޮށްފައިވާ ކްރެޑިޓް ފެސިލިޓިގެ އަދަދު 900 މިލިއަނަށް އަރާނެއެވެ. އެއީ މީގެ ކުރިމަޖައްސާ ދީފައިވާ 800 މިލިއަން ޑިލަރުގެ ފެސިލިޓީ ހިމަނައިގެންނެވެ.
މިއަދު ދެގައުމުގެ ވެރީން ބޭއްވެވި ޖޮއިންޓް ޕްރެސް ކޮންފަރެންސްގައި ވާހަކަ ދައްކަވަމުން ރައީސް ސާލިހުވަނީ އިންޑިއާގެ އެހީގައި މާލޭ ސަރަހައްދުގައި އިތުރު 2،000 ހައުސިންގ ޔުނިޓް އެޅުމަށް ނިންމާފައިވާކަން ހާމަ ކޮށްފައެވެ. މި ހައުސިންގ ޔުނިޓް އެޅުމަށް ނިންމާފައިވަނީ އިންޑިއާގެ އެގްޒިމް ބޭންކުން އިންޑިއާގެ އެގްޒިމް ބޭންކުން ދޫކުރާ 119 މިލިއަން ޑޮލަރުގެ ލޯން އެހީގައެވެ.
އިންޑިއާގެ އެހީގައި ހުޅުމާލޭގައި މިހާރުވެސް ދަނީ 4،000 ހައުސިންގ ޔުނިޓް އެޅުމުގެ މަސައްކަތް ކުރަމުންނެވެ.
މިއަދުގެ ރަސްމިއްޔާތުގައި ދެ ގައުމުގެ ދެމެދުގައި ސޮއިކުރި އެއްބަސްވުންތަކަކީ؛
1. އަންހެނުންގެ ތަރައްގީ އަށް މަސައްކަތް ކުރާ ކޮމިޓީތަކާއި ކައުންސިލްތަކަށް ތަމްރީނުދިނުމުގެ އެއްބަސްވުމެއް.
2. ސައިބާ ސެކިއުރިޓީއާ ގުޅޭ މައުލޫމާތު ދެ ގައުމުގެ ދެމެދު ބަދަލުކުރުމުގެ އެއްބަސްވުމެއް.
3. މަސްވެރިކަން ކުރެވޭނެ ސަރަހައްދުތައް ދެނެގަތުމުގެ ގާބިލުކަން އިތުރުކުރުމުގެ އެއްބަސްވުމެއް.
4. ކާރިސާތަކުގައި ދިމާވާ ކަންކަން މެނޭޖުކުރުމުގެ ދާއިރާއިން ދެ ގައުމު ގުޅިގެން މަސައްކަތް ކުރުމުގެ އެއްބަސްވުމެއް.
5. ފުލުހުންގެ ހިދުމަތް ހަރުދަނާ ކުރުމުގެ ގޮތުން 41 މިލިއަން ޑޮލަރުގެ ލޯނެއް ދަށުން ހިންގާ އުމްރާނީ ތަރައްގީގެ މަޝްރޫއުގެ އެއްބަސްވުން.
6. މާލެ ސަރަހައްދުގައި އިތުރު 2،000 ހައުސިން ޔުނިޓް އެޅުމަށް ހެދި އެއްބަސްވުން.
