އެމެރިކާގެ އަސްކަރިއްޔާއިން އަފްއާނިސްތާންގައި ދިން ޑްރޯން ހަމަލާއެއްގައި އަލްގައިދާގެ ލީޑަރު އައިމަން އަލް ޒަވާހިރީ މަރާލައިފި ކަމަށް އެމެރިކާގެ ރައީސް ޖޯ ބައިޑްން ވިދާޅު ވެއްޖެއެވެ.
އައިމަން އަލް ޒަވާހިރީ މަރާލާފައިވަނީ އަފްއާނިސްތާންގެ ވެރިރަށް ކާބުލްގައި އެމެރިކާގެ ސީއައިއޭއިން އާދީއްތަ ދުވަހު ހިންގި ކައުންޓަރ ޓެރަރިޒމް އޮޕަރޭޝަނެއްގައެވެ.
ބައިޑް ވިދާޅުވި ގޮތުގައި "އަލް ޒަވާހިރީ ވަނީ އެމެރިކާގެ ރައްޔިތުންނާއި ދެކޮޅަށް ގަތުލުއާންމުތައް ހިންގާ އަދި އެނޫން އެތަކެއް ހަމަނުޖެހުންތަކެއްވެސް ހިގާފައި" ކަމުގައެވެ.
"މިހާރު މިވަނީ އިންސާފު ގާއިމް ކުރެވިފަ، އަދި މި ޓެރަރިސް ލީޑަރު މިހާރު ދުނިޔެއަކު ނެތް،" ބައިޑްން ވިދާޅުވެފައި ވެއެވެ.
އޮފިޝަލުން ވިދާޅުވެފައިވާ ގޮތުގައި އެމެރިކާގެ އަސްކަރިއްޔާގެ ޑްރޯންއަކުން ފޮނުވާލި ދެ މިސައިލް ހަމަލާއެއް އޭނާއަށް އަމާޒު ވެގެންދިޔައިރު ޒަވާހިރީ ހުރީ އޭނާ ހިމާޔަތް ހޯދައިގެން ހުރި ގޭގެ ބެލްކަނީގައެވެ. އަދި އޮފިޝަލުން ވިދާޅުވެފައިވާ ގޮތުގައި ޒަވާހިރީއަށް މި ހަމަލާ އަމާޒު ކުރި އިރު އެގޭގައި އޭނާގެ އާއިލާގެ އެހެން މެމްބަރުންވެސް ތިބި ކަމަށާއި އެހެންނަމަވެސް މިހަމަލާގައި މަރުވެފައިވަނީ ޒަވާހިރީ އެކަނި ކަމުގައެވެ.
ބައިޑްން ވިދާޅުވިގޮތުގައި، ސީދާ އަމާޒަށް ދިނުމަށް ހަމަޖެހިފައިވާ މިހަމަލާ، އުމުރުން 71 އަހަރު އަލްގައިދާގެ ލީޑަރަށް އަމާޒުކޮށް ދިނުމުގެ އެންމެ ފަހުގެ ހުއްދަ ދޫކޮށްފައިވަނީ ސީދާ އޭނާ ކަމުގައެވެ.
ޒަވާހިރީ އަލްގައިދާގެ ލީޑަރުކަމާއި ހަވާލުވެފައިވަނީ، 2011 ވަނަ އަހަރު އެމެރިކާއިން އަލްގައިދާގެ އޭރުގެ ލީޑަރު އުސާމާ ބިންލާދިން މަރާލުމާއި ގުޅިގެންނެވެ. އެމެރިކާއަށް ދީފައިވާ 9/11 ޓެރަރިސްޓު ހަމަލާގެ ޒިންމާ އެމެރިކާއިން އަޅުވާފައިވަނީ ބިންލާއިންދާއި ޒަވާހިރީގެ ބޮލުގައެވެ. އަދި އެއަށްފަހު ޒަވާހިރީ އަކީ އެމެރިކާއިން އެންމެ ބޮޑަށް ބޭނުންވެފައިވާ މީހުންގެ ލިސްޓުގައި ހިމަނާފައިވާ މީހެކެވެ.
ބައިޑްން ވިދާޅުވި ގޮތުގައި އަލްގައިދާގެ ލީޑަރު މަރާލެވުމަކީ 2001 ވަނަ އަހަރު އެމެރިކާއަށް އަމާޒުކޮށް ދެވުނު ޓެރަރިސްޓު ހަމަލާގެ ޝިކާރައަކަށްވި އާއިލާތަކަށް ލިބިގެންދާނެ ވަރަށް ބޮޑު ހިންހަމަ ޖެހުމެއް ކަމުގައެވެ.
ބައިޑްން ވިދާޅުވި ގޮތުގައި 2000 ވަނަ އަހަރު އޮކްޓޯބަރުމަހު، އަދަންގައި އޮތް ޔޫއެސްއެސް ކޯލް ނޭވަލް ޑެސްޓްރޯޔަރއަށް ޖާނުންފިދާވެގެން ދިން ހަމަލާއާއި އެ މަނަވަރުގެ 17 ފަޅުވެރިން މަރުވި ހާދިސާގެ ޒިންމާވެސް އައިމަން އަލް ޒަވާހިރީ އުފުލަން ޖެހޭނެ ކަމުގައެވެ.
ތާލިބާން ސަރުކާރުގެ ތަރުޖަމާ ވިދާޅުވެފައިވަނީ އެމެރިކާއިން ހިންގި މި އޮޕަރޭޝަންއަކީ ބައިނަލްއަގުވާމީ އުސޫލުތަކާއި ޚިލާފަށް ހިންގާފައިވާ އޮޕަރޭޝަނެއް ކަމުގައެވެ.
