ހުޅުމާލޭގައި ހިންގާ ހާންޖީ ރެސްޓޯރެންޓްގެ ވެއިޓަރަކަށް ހަމަލާދީ މަރާލިކަމުގެ ތުހުމަތުގައި ހައްޔަރުކުރި ޕާކިސްތާނުގެ މުހައްމަދު އާބިދުގެ މައްޗަށް ކުރާ ދައުވާތަކުގެ ޝަރީއަތް ފަށައިފިއެވެ.
ހުޅުމާލޭ ނިރޮޅުމަގުގެ 19 ވަނަ ގޯޅީގައި ހުންނަ ހާންޖީ ރެސްޓޯރެންޓް ތެރޭ ހިނގި މި ހާދިސާގައި ވަޅިޔަކުން ހަމަލާދިނުމުގެ ސަބަބުން މަރުވެފައިވަނީ އެ ތަނުގައި ވެއިޓަރެއްގެ ވަޒީފާ އަދާކުރަމުންދިޔަ ބަންގްލަދޭޝް ރައްޔިތެކެވެ. އޭނާ މަރުވީ ފަރުވާއަށް ހުޅުމާލޭ ހޮސްޕިޓަލަށް ގެންދިޔަތާ ކުޑައިރުކޮޅެއްގެ ތެރޭގައިކަމަށް އެ ހޮސްޕިޓަލުން ބުނެފައިވެއެވެ.
މި މައްސަލާގައި އާބިދު ބުނެފައިވަނީ، އެނާ، ރެސްޓޯރަންޓުގެ ކައްކާ ޝާހީނަށް ހަމަލާ ދީފައިވަނީ އަމިއްލަ ނަފްސުގެ ދިފާއުގައި ކަމަށެވެ. އަދި އޭނާ އެކަމާ ދެރަވެ ހިތާކުރާކަމަށްވެސް ބުނެފައި ވެއެވެ. މަފަށް އެދުމަށްފަހު، އާބިދު ބުނެފައިވަނި އޭނާ ޝާހީނަށް ހަމަލާ ދީފައިވަނީ އޭނާ މަރާލުމުގެ ނިޔަތުގައި ނޫންކަމަށާއި އަދި ޝާހީނަށް އެއްވެސް ގެއްލުމެއް ދިނުމަކީވެސް އޭނާގެ ނިޔަތެއް ނޫންކަމުގައެވެ.
އަދި މިސަބަބަށްޓަކާ އޭނާގެ މައްޗަށް ދައުލަތުން އުފުލާފައިވާ ތޫނު އެއްޗަކުން ހަމަލާދީ މީހަކު މަރާލުމުގެ ދަައުވާއަށް އިންކާރު ކުރާކަމަށްވެސް ޝަރީއަތުގައި އާބިދު ބުނެފައި ވެއެވެ. އަދި ބުނެފައިވަނީ މީހަކު މަރާލުމުގެ ނިޔަތުގައި ހަމަލާ ދީފައި ނުވާނެ ކަމަށާއި، މިހާދިސާ ހިގަން މެދުވެރިވީ އޭނާ އަމިއްލަ ނަފްސުގެ ދިފާގައި ކުރަންޖެހުނު ކަންކަމުގެ ސަބަބުން ކަމުގައެވެ.
ކުރިމިނަލް ކޯޓުގެ ގާޒީ އިސްމާއިލް ޝަފީއު ބައްލަވާ މިމައްސަލާގައި، އާބިދުގެ މައްޗަށް ދައުލަތުން ކުރާ ދައުވާ ސާބިތުވެއްޖެނަމަ އޭނާއަށް 15 އަހަރާއި 25 އަހަރާ ދެމެދުގެ ޖަލު ހުކުމެއް އަންނާނެއެވެ.
މިހާދިސާއަށްފަހު، ހުޅުމާލޭގައި ހިންގާ ހާންޖީ ރެސްޓޯރެންޓްގައި މީހަކަށް ހަމަލާދީ މަރާލިކަމުގެ ތުހުމަތުގައި ފުލުހުން އޭނާ ހޯދަމުންދަނިކޮށް ފުލުހުންނަށް އާބިދު ފެނިފައިވަނީ ހުޅުމާލެ ދެވަނަ ފިޔަވަހީގެ ބީޗު ސަރަހައްދުންކަމަށް ފުލުހުން ބުނެފައި ވެއެވެ.
މިހާދިސާއަށްފަހު މަރުވި ބަންގްލަދޭޝް މީހާ ރެސްޓޯރަންޓް ތެރެއަށް ވެއްޓިފައި އޮތް ވީޑިއޯއެއްވެސް ވަނީ އާއްމުވެފައެވެ. މި ވީޑިއޯއިން ފެންނަގޮތުގައި އެމީހާ ލައިގެން އޮތް ޓީޝާޓް އޮތީ ލެއިން ފޯވެފައެވެ. އަދި އެމީހާގެ ފުރާނަ ސަލާމަތްކުރުމަށް އެހެން މީހަކު ސީޕީއާރު ދޭތަންވެސް މި ވީޑިއޯއިން ފެނިފައި ވެއެވެ.
