މިއަހަރުގެ މިނިވަން ދުވަހުގެ މުނާސަބަތުގައި ރައީސުލްޖުމްހޫރިއްޔާ އިބްރާހިމް މުހައްމަދު ޞާލިޙް މާދަމާ ޤައުމާއި މުޚާޠަބުކުރައްވާނެކަމަށް ހޯމް މިނިސްޓްރީން ބުނެފިއެވެ.
އެމަނިކުފާނު ޤައުމާއި މުޚާތަބު ކުރައްވާނީ މާދަމާ ހެނދުނު 10:00 ޖަހާއިރުއެވެ. މިއަހަރުގެ މިނިވަން ދުވަހުގެ ޖަލްސާ ނުބާއްވާގޮތަށް ސަރުކާރުން ވަނީ ނިންމާފައެވެ. އެގޮތަށް ނިންމީ ޚަރަދުކުޑަކުރުމުގެ ސިޔާސަތުގެ ދަށުންނެވެ.
މިނިވަންދުވަހުގެ ޕްރޮގްރާމް 2022 pic.twitter.com/NjMezsKaOr
— Home Ministry, MV (@HomeMinistrymv) July 25, 2022
މިނިވަން ދުވަހުގެ މުނާސަބަތުގައި ރާއްޖޭގެ މީހުން ދިރިއުޅޭ ހުރިހާ ރަށެއްގައި މާދަމާ ހެނދުނު 06:00 ގައި ދިދަނެގުމުގެ ރަސްމިއްޔާތު އޮންނާނެއެވެ. މާލޭގައި ދިދަނެގުމުގެ ރަސްމިއްޔާތު އޮންނާނީ ޖުމްހޫރީ މައިދާނުގައެވެ. މި ރަސްމިއްޔާތުގައި ރައީސުލްޖުމްހޫރިއްޔާ ބައިވެރިވެވަޑައިގަންނަވާނައެވެ. ހޯމް މިނިސްޓްރީން ވިދާޅުވީ، ރަށްރަށުގައި ދިދަ ނެގުމުގެ ރަސްމިއްޔާތު އޮންނާނީ އެރަށެއްގައި ހުރި ސަރުކާރުގެ އެންމެ އިސް އިދާރާއެއްގައި ކަމަށެވެ.
މިނިވަން ދުވަހުގެ ގޮތުގައި ފާހަގަކުރަނީ ކޮންމެ އަހަރެއްގެ ޖުލައި މަހުގެ 26 ވަނަ ދުވަހުއެވެ. އެއީ 1965 ވަނަ އަހަރުގެ ޖުލައިމަހުގެ 26 ވަނަ ދުވަހު އިނގިރޭސިންގެ ހިމާޔަތުގެ ދަށުން ދިވެހި ރާއްޖެއަށް ފުރިހަމަ މިނިވަންކަން ހޯއްދަވައިދެއްވުމަށް އިނގިރޭސި ސަރުކާރާއި ދިވެހި ސަރުކާރާ ދެމެދު ރާއްޖެއަށް މިނިވަންކަން ދިނުމުގެ އެއްބަސްވުމުގައި ސޮއިކުރި ދުވަހެވެ.
