ހުޅުމާލޭ ހޮސްޕިޓަލުގެ އިހުމާލުން މާބަނޑު މީހެއްގެ ބަނޑަށް ދަރިއަކު މަރުވިކަމަށް ބުނާ މައްސަލަ ބަލަމުން އަންނަކަމަށް ހުޅުމާޅެ ހޮސްޕިޓަލުން ބުނެފިއެވެ.
އަށް މަހުގައި އަންހެން މީހާގެ ބަނޑަށް ދަރިފުޅު މަރުވި ކަމަށް ބެލެވެނީ ހޮސްޕިޓަލުން ދޭންޖެހޭ މައުލޫމާތު ނުދީ އަދި އީދު ޗުއްޓީއާ ދިމާކޮށް ޕަބްލިކް ހެލްތު ޔުނިޓާއި މާބަނޑު މީހުންގެ ކްލިނިކް ބަންދުވުމާ ގުޅިގެންކަމަށް އާއިލާއިން ބުނެފައިވެއެވެ.
މި މައްސަލައާއި ގުޅިގެން ހުޅުމާލެ ހޮސްޕިޓަލުން ނެރުނު ބަޔާނެއްގައ ވަނީ، އެ މައްސަލަ އެ ހޮސްޕިޓަލުގެ ކޮލިޓީ އެޝުއަރެންސް ޑިޕާޓްމަންޓުން ބަލަމުންދާކަމަށެވެ. އަދި މިކަން ހިނގާދިޔަގޮތް ބެލުމަށްފަހު، ހޮސްޕިޓަލުގެ ޕޭޝަންޓް ކެއަރ ރަނގަޅުކުރުމަށް ކުރަންޖެހޭކަމެއްވާނަމަ އެކަންކަން ކުރުމަށް ހޮސްޕިޓަލުގެ ފަރާތުން ކުރަންޖެހޭ މަސައްކަތްތައްކުރުމުގައި އެ ހޮސްޕިޓަލުން ފަސްނުޖެހޭނެކަމަށްވެސް ހުޅުމާލޭ ހޮސްޕިޓަލުން ބުންޏެވެ.
ހުޅުމާލޭ ހޮސްޕިޓަލުން ބުނީ، އެ ހޮސްޕިޓަލުގެ އަބަދުވެސް އަމާޒަކީ ބަލިމީހުންގެ ރައްކާތެރިކަން ކަށަވަރުކޮށްދީ، ހޮސްޕިޓަލުން ދެވޭ ޚިދުމަތްތަކަކީ ރައްޔިތުން ބަލައިގަންނަފަދަ ފުރިހަމަ ހަރުދަނާ ޚިދުމަތަކަށް ހެދުންކަމަށެވެ.
އެ އަންހެން މީހާ އަށް 14 އަހަރު ފަހުން ލިބުނު ދަރިފުޅު މިކަހަލަ ގޮތަކަށް މަރުވުމުގެ ސަބަބުން އަންހެން މީހާ އާއި އާއިލާ ވަރަށް ބޮޑަށް ނަފްސާނީވެފައިވާކަމަށް އާއިލާއިން ބުނެފައިވެއެވެ.
