އެއްޖިންސުން ގުޅުންހިންގި މީހުންގެ ތެރޭގައި ސްކޫލްތަކުގެ ބައެއް ޓީޗަރުންވެސް ހިމެނޭކަމަށް ތުހުމަތުކުރައްވާ، ދަރިވަރުންގެ ސަލާމަތަށް އެ ޓީޗަރުން ވަކިކުރެއްވުމަށް ދީނީ ޢިލްމުވެރިޔާ ޝައިޚް ޢަލީ ޒައިދު ސަރުކާރަށް ގޮވާލައިފިއެވެ.
ޢަލީ ޒައިދު މިހެން ވިދާޅުވީ ބަންގްލަދޭޝްގެ އަލަމްގިރި އާއިއެކު 50އަށްވުރެ ގިނަ ދިވެހި ފިރިހެނުން އެއްޖިންސުން ގުޅުންހިންގި ވީޑިއޯ ފުލުހުން އަތުލައިގެންފައިވާކަމަށް ސޯޝަލް މީޑިއާގައި އަޑު ފެތުރެމުންދަނިކޮށެވެ.
ޢަލީ ޒައިދު ވަނީ، އަލަމްގިރިއާއެކު ލިވާޠުކުރި މީހުންގެ ތެރޭ މާލޭގެ ބައެއް ސްކޫލްތަކުގެ ޓީޗަރުން ހިމެނޭ އިރު، އަދި މިނިސްޓްރީއަށް ވެސް އެކަން އެނގޭއިރު އެމީހުންނާމެދު ފިޔަވަޅު ނާޅަނީ ކީއްވެތޯ ސުވާލުކުރައްވާފައެވެ. އޭނާ ވަނީ ދަރިވަރުންގެ ސަލާމަތަށްޓަކައި އެމީހުން ވަކިކުރެއްވުމަށް ގޮވާލައްވާފައެވެ. އަދި މިފަދަ މީހުން ހިމާޔަތްކޮށް ނުވާނެކަމަށް ޒައިދު ވިދާޅުވިއެވެ.
އަލަމްގިރިއާއެކު ލިވާޠުކުރި މީހުންގެ ތެރޭ މާލޭގެ ބައެއް ސްކޫލްތަކުގެ ޓީޗަރުން ހިމެނޭ އިރު، އަދި މިނިސްޓްރީ އަށް ވެސް އެކަން އެނގޭ އިރު އެމީހުންނާމެދު ފިޔަވަޅު ނާޅަނީ ކީއްވެތޯ؟
ދަރިވަރުންގެ ސަލާމަތަށްޓަކައި އެމީހުން ވަކިކުރައްވާ!
މިފަދަ މީހުން ހިމާޔަތްކޮށް ނުވާނެ!
— Ali Zaid (@alizaid1000) July 22, 2022
ޢަލީ ޒައިދު މިހެން ވިދާޅުވެފައިވާއިރު އަލަމްގިރިއާއި އެކު ގުޅުންހިންގިކަމަށް ތުހުމަތުކުރެވޭ އެއްވެސް މީހަކު މިހާތަނަށް ހައްޔަރުކޮށްފައިނުޥާތީ ގިނަބަޔަކު އަންނަނީ ކަންބޮޑުވުން ފާޅުކޮށް ސަރުކާރަށް ފާޑުކިޔަމުންނެވެ.
އަލަމްގިރި ހައްޔަރުކޮށް ބަންދުކޮށް، ފުރުން މަނާކޮށްފައިވީނަމަވެސް އިތުރު ބަޔަކު ހައްޔަރުކުރިކަމެއް ފުލުހުން ހާމަކޮށްފައެއް ނުވެއެވެ. އަލަމްގިރިއާއިއެކު އެއްޖިންސުން ގުޅުންހިންގިކަމުގެ ތުހުމަތުގައި ރައްޔިތުންގެ މަޖިލީހުގެ ރައީސް މުޙައްމަދު ނަޝީދުގެ ކޮއްކޮ ނާޒިމް ސައްޠާރުގެ ޕާސްޕޯޓް ވަނީ ހިފަހައްޓާފައެވެ.
މީގެ އިތުރުން މަޖިލީހުގެ ހެންވޭރު ދެކުނު ދާއިރާގެ މެންބަރު އަނދުން ޙުސައިންއާއި އިތުރުބަޔަކާއެކު ބަރަހަނާ ފޮޓޯއެއް ލީކުވެފައިވާއިރު، ރާއްޖެ ޓީވީގެ ކުރީގެ ނޫސްވެރިޔާ ނަޞީރު އެއްޖިންސުން ގުޅުންހިންގާ ވީޑިއޯއެއްވެސް ލީކުވެފައިވެއެވެ. މީގެ އިތުރުން ޑީއާރުޕީގެ ކުރީގެ ލީޑަރު އަދި ނޮޅިވަރަމް ދާއިރާގެ ކުރީގެމެންބަރު މުޙައްމަދު ނަޝީދު (ކާނަލް)ވެސް އަލަމްގިރި ކޮޓާރިއަށް ދާ ވީޑިއޯއެއް ދައުރުވެފައިވެއެވެ.
މި މައްސަލަ ބަލަމުން އަންނަކަމަށް ފުލުހުން ބުނެފައިވެއެވެ. ނަމަވެސް އިތުރު ތަފްސީލެއް ހާމަކޮށްފައެއް ނުވެއެވެ.
One Response
ޢިސްލާމް ދީނުގައި ޢުޤޫބާތް ކަނޑައެޅިފަިވާ މިފަދަ ބޮޑެތި ޖަރީމާ ހިންގާ މީހުން ވަޤްތުން ވަޤްތަށް ހައްޔަރުކޮށް ޝަރީޢަތް ނުހިންގާތީ ހިތާަމައާއިއެކު ޙަިރާންވަމު!