ބޮލީވުޑް ދުއް އެފަދަ ދެވަނައެއް ނެތް ބަތަލާ ޝްރީދޭވީގެ ހަގު ދަރިފުޅު ޚުޝީ ކަޕޫރު އަންނަނީ ބޮލީވުޑަށް ތައާރަފް ވުމަށް މަސައްކަތް ކުރަމުންނެވެ.
އެގޮތުން އޭނާ ބޮލީވުޑަށް ނުކުންނަނީ ޒޯޔާ އަޚްތަރް ގެ "އާޗީ" އިންނެވެ. މި ފިލްމުން ޚުޝީގެ އިތުރުންވެސް ބޮލީވުޑް އިތުރު ބައެއް ސްޓާ ކިޑުން ފިލްމީ ދާއިރާއަށް ނުކުންނާނެއެވެ.
ޝްރީދޭވީ އާއި ޑައިރެކްޓަރ އަދި ޕްރޮޑިއުސަރ ބޯނީ ކަޕޫރުގެ ދެ އަހެން ކުދިންގެ ތެރެއިން ދޮށީ ދަރިފުޅު ޖާންވީ ކަޕޫރު މިހާރު ވަނީ ބޮލީވުޑަށް ތައާރަފް ވެފައެވެ. އޭނާ އަންނަނީ މަޑު މަޑުން ބޮލީވުޑްގައި ފައިތިލަ ސާބިތު ކުރަމުންނެވެ.
2018 ވަނަ އަހަރު ސްރީދޭވީ މަރުވީ އުމުރުން 55 އަހަރުގައެވެ. އޭރު ވެސް އޭނާ އަކީ ޒުވާން ބަތަލާއިންނާ އެއް ހަމައެއްގައި ފައިތިލަ ސާބިތު ކުރަމުން ދިޔަ ތަރިއެކެވެ.
ޚުޝީ އަކީ ސްޓާ ކިޑަކަށް ވުމުން އާންމުންގެ ފަރާތުން ތަފާތު ވައްތަރުގެ ފާޑުކިއުން ތަކާއި ސޯޝަލް މީޑިއާގެ ޓްރޯލް ތަކާއި ކުރިމަތިލާން ޖެހެއެވެ. އަދި ހާއްސަކޮށް އޭނާ ބޮލީވުޑްއަށް ނުކުތުމުން މިކަންކަން އިތުރު ވާނެއެވެ.
ޚުޝީގެ ފުރަތަމަ ފިލްމު އަޅުވާނެ ތާރީހެއް އަދި އިއުލާނެއް ނުކުރެއެވެ. ނަމަވެސް މިހާރުން ސުރެ ވެސް ޖާންވީ ހުރީ ކޮއްކޮގެ އައްޑަނަ އަކަށް ވެގެންނެވެ. ޓްރޯލް ކުރުން ތަކާއި މަލާމާތް ކޮއްކޮއަށް ރައްދުވިޔަ ނުދިނުމަށް ކުރެވެން ހުރި ހުރިހާ ކަމެއް ކުރާނެ ކަމަށް އޭނާ ވަނީ ބުނެފައެވެ.
ކިތަންމެ މަސައްކަތް ކުރި ނަމަވެސް ޓްރޯލްގެ ޝިކާރަކަށް ނުވެ ނުދާނެކަން މާޒީން ވަނީ އެނގިގެން ގޮސްފައެވެ.
