ކލ.ދިއްފުށީގައި މީހަކަށް އަނިޔާކުރަމުން ދަނިކޮށް، އޭނާ ސަލާމަތްކުރަމުން ދިޔަ ފުލުހަކަށް ހަމަލާދިން މައްސަލާގައި މީހަކު ހައްުޔަރުކޮށްފިއެވެ.
ދިއްފުށީގައި މީހަކަށް ގިނަ ބަޔަކުވެގެން އަނިޔާކޮށްފައިވަނީ ކުޑަކުއްޖަކާ ބެހުނުކަމުގެ ތުހުމަތުގައެވެ. އެއީ އެރަށަށް ގޮސް އުޅުނު ގއ.ވިލިނގިލި މީހެކެވެ. އޭނާ ސަލާމަތްކުރަން އުޅުނު ފުލުހަކަށް ހަމަލާދިން މައްސަލާގައި ޢުމުރުން 22އ މީހަކު ހައްޔަރުކޮށްފައިވާ ފުލުހުން ބުންޏެވެ. އަދި އޭނާގެ ބަންދަށް 10 ދުވަސް ޖަހާފައިވާކަމަށްވެސް ފުލުހުން ބުންޏެވެ.
ނަމަވެސް އެމީހާއަށް އަނިޔާކޮށް މާރާމާރި ހިންގި ތުހުމަތުގައި އެއްވެސް މީހަކު ހައްޔަރުކޮށްފައިވާކަމށް ފުލުހުން ނުބުނެއެވެ. ކުޑަ ކުއްޖަކަށް ޖިންސީ ގޯނާކުރިކަމަށް ތުހުމަތުކޮށް އަނިޔާކުރި މީހާއަށް ވަނީ ބޮޑެތި އަނިޔާތަކެއް ލިބިފައެވެ. މިކއޭނާ ވަނީ އެރަށު މީހުންގެ އެ ތުހުމަތުތަށް ދޮގުކޮށްފައެވެ. އޭނާގެ ގައިގެ އެތައް ތަނެއް ދުޅަވެ ލޮލަށްލޭ އަރާފައިވެއެވެ. އޭނާއަށް އަންނަނީ ހޮސްޕިޓަލުގައި ފަރުވާދެމުންނެވެ.
މިހާރު ދައުރުވާ ވީޑިއޯއެއްގައި އަނިޔާ ލިބުނު މީހާ ވަނީ އޭނާ އެފަދަ ކުށެއް ނުކުރާކަމަށް ބުނެފައެވެ. އަދި އޭނާ ސަލާމަތްކުރަން ދިޔަ ފުލުހުންވެސް އެކަން ހުއްޓުވަން މަސައްކަތް ކޮށްފައިނުވާކަމަށާއި، ފުލުސް މީހާވެސް އިންޒާރު ދިންކަމަށް ތުހުމަތުކޮށްފައިވެއެވެ.
މިކަމާއި ގުޅިގެން ފުލުހުން ބުނީ ފުލުހުންގެ ދައުރު އަދާކުރުމުގައި އިހުމާލުވެ އަޚްލާގީ މިންގަނޑުން ބޭރުން ޢަމަލުތައް ބަހައްޓާފައިވާކަމަށް އަނިޔާ ލިބުނު މީހާ ތުހުމަތުކޮށްފައިވާތީ އެކަމާއި ގުޅޭގޮތުން ބަލަންޖެހޭ ކަންކަން ފުލުހުންގެ ޕްރޮފެޝަނަލް ސްޓޭންޑާރޑްސް ކޮމާންޑުން ބަލަމުންދާކަމަށެވެ.
އަނިޔާ ލިބުނު މީހާވަނީ އެރަށު ސިއްޙީ މަރުކަޒުގެ މުވައްޒަފުންވެސް އޭނާއަށް ފަރުވާ ދިނުމަށް ދެކޮޅު ހެދިކަމަށް ބުނެފައެވެ.
ކޮމެންޓު ފޮނުވާ