މިއަދުވެސް މުޅި ރާއްޖެއަށް މޫސުން ގޯސްވާނެކަމަށް ލަފާކުރެވޭތީ މުޅި ރާއްޖެއަށް ހުދު ސަމާލު، ނެރެފިއެވެ. މޫސުމާބެހޭ ޤައުމީ އިދާރާއިން ހުދު ސަމާލު ނެރެފައިވަނީ، ގުގުރުމާއެކު ބޯކޮށް ވާރޭ ވެހޭނެކަމަށް ލަފާކޮށެވެ. ސަމާލު ނެރެފައިވަނީ މިއަދު ހެނދުނު 08:45އިން ފެށިހެން މެންދުރު 14:45އާއި ހަމައަށެވެ. އެ އިދާރާއިން އިއްޔެވެސް ހުދު ސަމާލު ނެރެފައިވެއެވެ.
އެ އިދާރާއިން ބުނީ، މިއަދު އާއްމުގޮތެއްގައި ވައިޖެހޭނެކަމަށް ލަފާކޮށްފައިވަނީ 19 މޭލާއި 24 މެލާ ދެމެދުވެ ބާރުމިނުގައެވެ. އަދި ވިލާގަނޑުގައި 45 މޭލާ 50 މޭލާ ދެމެދުގެ ބާރުމިނަށް ވައިގަދަވާނެކަމަށް ވަނީ ލަފާކޮށްފައެވެ.
— Maldives Meteorology (@MetMaldives) July 18, 2022
ވައިގަދަވެ ރާއްޖޭގެ ހުރިހާ ހިސާބުތަކުގެ ކަނޑުތައްވެސް ގަދަވާނެކަމަށް ލަފާކުރެއެވެ. އަދި ވިލާގަނޑުގައި އިތުރަށް ގަދަވާނެކަމަށް ލަފާކޮށްފައިވެއެވެ. ރާޅުތަކުގެ އުސްމިން ހުންނާނީ 3 ފޫޓާ 6 ފޫޓާ ދެމެދުގައިކަމަށްވެސް މެޓް އޮފީހުން ލާފާކުރެއެވެ.
މެޓް އޮފީހުންވަނީ ބައެއް ރަށްތަކަށް ބޯކޮށް ވާރޭވެހޭނެކަމަށްވެސް ލަފާކޮށްފައެވެ. ވޭތުވެދިޔަ 24 ގަޑިއިރުވެސް ރާއްޖޭގެ ހުރިހާ ސަރަޙައްދަކަށް ވިއްސާރަކޮށްފައިވެއެވެ. ބައެއް ރަށްތަކަށް ބޯކޮށް ވާރޭވެހި ފެންބޮޑުވުމުގެ ހާދިސާވެސް ކުރިމަތިވިއެވެ.
މިއަދާހަމައަށް ބަލާއިރު އެންމެ ގިނައިން ވާރޭވެހުނުކަމަށް ރެކޯޑްކޮށްފައިވަނީ އއ.ތޮއްޑޫއަށެވެ. ތޮއްޑުއަށް 147.4 މިލިމީޓަރުގެ ވާރޭ ވެހިފައިވެއެވެ. ދެން އެންމެ ބޯކޮށް ވާރޭ ވެހިފައިވަނީ މާލެ ސަރަޙައްދަށެވެ. އެގޮތުން ހުޅުލެއަށް 139.4 މިލިމީޓަރުގެ ވާރޭ ވެހުނުކަމަށް ރެކޮޑްކޮށްފައިވެއެވެ.
