ފަނަރަ އަހަރު ވަންދެން ރާއްޖޭގެ ގައުމީ ކްރިކެޓް ޓީމަށް ކުޅުނު ބެޓްސްމަން އަހުމަދު ހަސަން (އައްމަޑޭ) ބައިނަލްއަގްވާމީ ކްރިކެޓުން ރިޓަޔާކޮށްފިއެވެ.
އޭނާ ކުޅުން ހުއްޓާލިއިރު އުމުރަކީ 33 އަހަރެވެ. އެންމެފަހުން އޭނާ ކުޅުނު މުބާރާތަކީ މެލޭޝިއާގައި ކުރިއަށްދިޔަ ކުއަޑްރަންގިއުލާ ޓީ20 ސީރީސްއެވެ. މި ސީރީޒްގައި ރާއްޖެ ކުޅުނު ފަހު މެޗަކީ އައްމަޑޭ ގައުމީ ޓީމަށް ކުޅެދިން ފަހު މެޗެވެ.
މެލޭޝިއާ އާއި ދެކޮޅަށް ރާއްޖެ ކުޅުނު މުބާރާތުގެ ފަހު މެޗަށްފަހު އައްމަޑޭ ގައުމީ ޓީމަށް ކުޅުން ހުއްޓާލާ ރިޓަޔާވިކަން ވަނީ ރަސްމީކޮށް އިއުލާނުކޮށްފައެވެ. އައްމަޑޭގެ ގައުމީ ހިދުމަތުގެ އަގުވަޒަންކޮށް ގާޑް އޮފް އޮނާއެއް ވަނީ އަރުވާފައެވެ. އައްމަޑޭ އަކީ 2014 ވަނަ އަހަރު ކްރިކެޓް ބޯޑުން ހޮވި އެންމެ މޮޅު ކުޅުންތެރިޔާގެ އިތުރުން އެންމެ މޮޅު އޮފް ސްޕިނާ އަދި ބެޓްސްމަނެވެ. އޭނާ ވަނީ 2015 ގެ ފަހުން ޖުމްލަ 408 ލަނޑު ހަދައި، 18 ވިކެޓް ނަގައިފައެވެ.
ރިޓަޔާމެންޓް އިއުލާނުކުރުމަށް ފަހު މީޑިއާއާ ވާހަަކަ ދައްކަމުން އައްމަޑޭ ބުނީ ހަޔާތުގައި ހުސްކޮށް ލިބުނު ގިނަ ވަގުތުތައް ހޭދަކުރީ ކްރިކެޓް ކުޅުމުގައި ކަމަށެވެ. އަދި ގައުމީ ޖޯޒީގައި އެންމެ ފަހު މެޗުގައި ގައުމީ ކުޅުންތެރިންނާ އެކު އުފާވެރި ވަގުތުތަކެއް ހޭދަކޮށްލެވުމަކީ ލިބުނު ވަރަށް ބޮޑު ހިތްހަމަޖެހުމެއް ކަމަށް އައްމަޑޭ ބުނެފައިވެއެވެ.
އައްމަޑޭ ބޭނުންވީ ގައުމީ ޖޯޒީގައި ކުޅުނު ފަހު މެޗުގައި މޮޅަކާ އެކު ނިންމާލުމަށެވެ. އެކަމަކު، މެލޭޝިއާއާ ދެކޮޅަށް 94 ލަނޑުން ރާއްޖެ ބަލިވުމުން އެންމެ ބޭނުންވި ގޮތަށް ހުރިހާ ކަމެއް ނުދިޔަކަން އައްމަޑޭ ފާހަގަކުރިއެވެ.
