ސްރީލަންކާއަށް ކުރިމަތިވެފައިވާ އިޤްތިޞާދީ ކާރިސާއާ ގުޅިގެން އެ ޤައުމުގެ ސަރުކާރާ ދެކޮޅަށް އަޑުއުފުލުމަށް ނިކުތް އެތައްހާސް ރައްޔިތުން ކޮންޓްރޯލްނުވެ، ރައީސް ގޮޓަބަޔަ ރާޖަޕަކްސަގެ ގެކޮޅު ކައިރިއަށް ޖަމާވެ އެންމެ ފަހުން ގެކޮޅަށް ވަދެގެންފިއެވެ.
މިއަދުގެ މުޒާހަރާތައް ދުރާލައި ބާއްވާނެކަން އިއުލާން ކުރި ހިސާބުން ލަންކާ ސަރުކާރުންވަނީ ކާފިއު އިއުލާންކޮށްފައެވެ. ނަމަވެސް މިއީ ޢައިރު ޤާނޫނީ ކާފިއުއެއްކަން ޤާނޫނީ ވަކީލުންނާއި، ސިޔާސީ އިސްބޭފުޅުން ވިދާޅުވެ، ކުރިމަތިވި ބޮޑެތި ފިއްތުންތަކާއިކު ސަރުކާރަށް މަޖުބޫރުވީ ކާފިއު އުވާލާށެވެ.
މުޒާހަރާތަކުގައި އެތައްސަތޭކަ ބަޔަކު ބައިވެރިވަމުންދާއިރު، މުޒާހަރާ ކޮންޓްރޯލް ކުރުމަށް ސަލާމަތީ ބާރުތަކުން ބާރުގެ ބޭނުންވެސް ކޮށްފައިވެއެވެ. ނަމަވެސް ފަސް ހަސަފަށް އަތުރާލާފައި އޮތް ސަލާމަތީ ބާރުތަކުގެ ސަފުތައް ފޫއަޅުވައި ރައީސްގެ ގެކޮޅާއި ހަމަޔަށް މުޒާހަރާގެ ބައިވެރިން ގޮސްފައިވަނީ ބަރަށް ފަސޭހަކަމާއިއެކުއެވެ. މުޒާހަރާގެ ތެރެއިން ބައެއް ފުލުހުން ވަނީ މުޒާހަރާގެ ބައިވެރިންނާއިވެސް ގުޅިފައެވެ.
ލަންކާގެ ނޫސްތަކުން ރިޕޯޓުކޮށްފައިވާ ގޮތުގައި ލަންކާގެ ރައިސްވަނީ ގިނަ އަދަދެއްގެ ރައްޔިތުން ސަލާމަތީ ބާރުތަކުގެ ސަފުތައް ފޫއަޅުވާލުމާއިއެކު ގެކޮޅު ދޫކުރައްވައި ވަޑައިގެންފައެވެ. މުޒާހަރާގެ ބައިވެރިން ލަންކާ ރައީސްގެ ގެކޮޅުގައި ތިބިއިރު ސިފައިންވެސް އެގޭތެރެއަށް ވަތް މީހުން ނެރެ ކޮންޓްރޯލް ކުރުމަށް މަބޮޑު މަސައްކަތެއް ކުރާތަން ނުފެނެއެވެ.
Protestors breach several barriers and now attempting to enbreach the President's House in Colombo.#LKA #SriLanka #July9th pic.twitter.com/bMPwsyRz24
— Sri Lanka Tweet 🇱🇰 💉 (@SriLankaTweet) July 9, 2022
މުޒާހަރާތަކާއި ގުޅިގެން ލަންކާގައި ދަތުރުފަތު ކުރުމަށާއި، އާންމު އެކި ކަންކަންވެސް މިއަދު ވަނި ހުއްޓުމަކަށް އައިސްފައެވެ. މި މުޒާހާރާގައި އާންމު ރައްޔިތުންގެ އިތުރުން ގައުމުގެ ނަގާކިޔާ އެތައް ބަޔަކު ބައިވެރިވެއެވެ. އޭގެ ތެރޭގައި ސިޔާސީ ބޭފުޅުންނާއި ދީނީ ލީޑަރުންނާއި ހައްގުތަކަށް ވަކާލާތުކުރާ އިސް އެކްޓިވިސްޓުން ވެސް ހިމެނެއެވެ.
އެޤައުމުގެ ޢާންމު ރައްޔިތުންނަށް ތެޔޮ ވިއްކުން ހުއްޓައިލާފައިވާ އިރު، ކާބޯތަކެތި ހޯދުމަށް ވެސް އެ މީހުންނަށް ވަނީ ހުރަސްތައް ކުރިމަތިވެފައެވެ. އަދި، ތަކެތީގެ އަގު އިންތިހާއަށް އުފުލިފައި ވާއިރު، ކަރަންޓުގެ ޚިދުމަތް މެދުކެނޑުން މި ވަނީ ޢާންމު ކަމަކަށް ވެފައެވެ. މިއީ، ސްރީލަންކާގެ ބޮޑުވަޒީރު ގޮތަބަޔާ ރާޖަޕަކްސަގެ ސަރުކާރުގެ ނާގާބިލު ކަމުން އެ ޤައުމަށް ކުރިމަތިވި ކާރިސާއެއްގެ ގޮތުގައި އެ ޤައުމުގެ ގިނަ ރައްޔިތުން ދެކެއެވެ.
ރާޖަޕަކްސަ ވިދާޅުވީ، ސްރީލަންކާގެ ރައްޔިތުންނަށް އޮޅުވައިލައި ނުރަނގަޅު މަޢުލޫމާތު ދިނުމަށް ސަރުކާރާ ދެކޮޅު ފަރާތްތަކުން މަސައްކަތް ކުރަމުންދާ ކަމުގައެވެ. އަދި، ކުރިއަށް އޮތް މަދު ދުވަސްކޮޅެއްގެ ތެރޭގައި އެ ޤައުމަށް ބޭނުންވާ މުދަލާއި އެހެނިގެން ސާމާނު ލިބޭނެ ކަމަށް ރާޖަޕަކްސަގެ އޮފީހުން ނެރުނު ބަޔާނެއްގައި ބުނެފައިވެއެވެ.
މުޒާހަރާތަކާ ގުޅިގެން ކޮލަމްބޯގައި ސަލާމަތީ ފިޔަވަޅުތައް ވަނީ ވަރުގަދަކޮށްފައެވެ. މި ގޮތުން، ސިފައިންނާއި ފުލުހުންގެ މައްޗަށް އެކުލެވިގެންވާ 3,000 އަށްވުރެ ބޮޑު ފައުޖެއް އަމަން ބެލެހެއްޓުމުގައި ހަރަކާތްތެރިވަމުންދާ ކަމުގައި ފުލުހުން ބުނެއެވެ. މުޒާހަރާތައް ރޫޅައިލުމަށް ފުލުހުން ބާރުގެ ބޭނުން ކުރާތީ އ.ދ.ގެ އިންސާނީ ހައްޤުތަކާ ބެހޭ އިދާރާއިން ވަނީ ކަންބޮޑުވުން ފާޅުކޮށްފައެވެ.
