އިނގިރޭސިވިލާތުގެ ބޮޑުވަޒީރު މަގާމުން އިސްތިއުފާ ދެއްވައިފިއެވެ. އިސްތިއިފާ ދެއްވާން ނިންމަވާފައިވާކަން ހާމަކުރަންވަމުން ޖޯންސަން ވިދާޅުވި ގޮތުގައި އޭނާ މިއަދުން ފެށިގެން ޕާޓީގެ ލީޑަރުކަމުން އިސްތިއުފާ ދެއްވާކަމަށާއި އާ ބޮޑުވަޒީރަކު އައްޔަން ކުރެވެންދެން އޭނާ މަގާމުގައި ދެމިހުންނަވާނޭ ކަމުގައެވެ.
ބޮޑުވަޒީރު ޖޯންސަން މަގާމުން އިސްތިއިފާ ދެއްވާފައި މިވަނީ، ފާއިތުވެދިޔަ ދެދުވަހު އޭނާގެ ކެބިނެޓުގެ ގިނަ އަދަދެއްގެ ވަޒީރުން ކެބިނެޓުން އިސްތިއުފާ ދެއްވާފައި ވަނިކޮށެވެ.
އިސްތިއުފާ ދެއްވަމުން ޖޯންސަން މިއަދު ވިދާޅުވެފައިވަނީ، ކޮންޒަވޭޓިވް ޕާޓީގެ މެމްބަރުން އެޕާޓީއަށް އާ ލީޑަރަކު ބޭނުންވާކަން މިހާރު ވަރަށްވެސް ބޮޑަށް ސާފު ވެފައި ވާކަމުގައެވެ. އަދި އާ ލީޑަރަކު އައްޔަން ކުރެވެންދެން މަގާމުގައި ދެމިހުންނަވާނޭކަމަށް ވިދާޅުވި ނަމަވެސް، ކޮންޒަވޭޓިވް ޕާޓީގެ ގިނަ މެމްބަރުން ވިދާޅުވަމުން ގެންދަވަނީ، އޭނާ މިހާރުން މިހާރަށް ބޮޑުވަޒީރުގެ ގެކޮޅު، ޑައުނިންގ ސްޓްރީޓް ދޫކުރައްވާ ވަޑައިގަންނަވަން ޖެހޭނެ ކަމުގައެވެ.
މަގާމުން އިސްތިފާ ދެއްވާނޭކަން ހާމަ ކުރައްވަމުން، އާ ބޮޑުވަޒީރަކު އައްޔަން ކުރެވެންދެން މަގާމުގައި ދެމިހުންނަވަން އިއުލާން ކުރެއްވުމާއި ގުޅިގެން، ލޭބަރ ޕާޓީގެ މެމްބަރުންވެސް ވިދާޅުވަމުން ގެންދަވަނީ، ޖޯންސަންއަށް ބޮޑުވަޒީރުކަމުގައި ނުހުންނެވޭނެ ކަމަށާއި، އިތުރަށް މަގާމުގައި ހުންނަވަން މަސައްކަތް ކުރައްވާނަމަ، ޖޯންސަންގެ އިތުބާރު ނެތްކަމަށް ގާނޫނުހަދާ މަޖިލީހުން ފާސްކުރުމަށް ހުށަހަޅާނޭ ކަމުގައެވެ.
އިނގިރޭސި އާ ބޮޑުވަޒީރަކު އައްޔަން ކުރުން ކުރިޔަށް ދާނޭގޮތުގެ ތާވަލެއް އަންނަ ހަފްތާގައި އިއުލާން ކުރެވޭނެއެވެ.
ބޮރިސް ޖޯންސަން އޭނާގެ އިސްތިއުފާ އިއުލާން ކުރަމުންވަމުން، މިއަދުވަނީ، އޭނާގެ އަނބިކަބަލުން ކެރީއާއި، ދަރިންނަށާއި، އިންރޭސިވިލާތުގެ ނޭޝަނަލް ހެލްތު ސާވިސްއަށާއި، އަސްކަރިއްޔާގެ އިތުރުން ޑައުނިންގ ސްޓްރީޓްގެ ސްޓާފުންނަށްވެސް ޝުކުރު އަދާކުރައްވާފައެވެ.
