މިއީ އެއްވެސް ބާވަތެއްގެ ޓެކްސްއެއް އިތުރުކުރަންޖެހޭ ވަގުތެއް ނޫންކަމަށް ވިދާޅުވެ ކުރީގެ ނާއިބު ރައީސް ޑރ.މުޙައްމަދު ޖަމީލް އަޙްމަދު ފާޑުވިދާޅުވެއްޖެއެވެ.
ޖީއެސްޓީއާއި ޓީޖީއެސްޓީ ބޮޑުކުރަން ސަރުކާރުން ނިންމުމާއި ގުޅިގެން ޑރ.ޖަމީލް ވިދާޅުވީ، ދަރަނި ނަގައިގެން ސަރުކާރުން މިހާތަނަށް މުޅިންވެސް ކުރީ އިސްރާފުކަމަށެވެ. ކުޑަކުރި ޚަރަދެއް އޮތްތޯ ސުވާލުކުރައްވާ ޑރ.ޖަމީލް ވަނީ ރައްޔިތުން ދަރަނީގެ ދަންތުރެއްގައި ޖައްސާކަމަށް ވިދާޅުވެފައެވެ. އަދި އިތުރަށް އޮޅުވާނުލައި ރައްޔިތުންގެ ޖީޞަށް އަތްބޭނުން ހުއްޓާލުމަށް ޖަމީލު ގޮވާލެއްވިއެވެ.
އެއްވެސް ބާވަތެއްގެ ޓެކްސްއެއް އިތުރުކުރަންޖެހޭ ވަގުތެއް ނޫން މިއީ. ދަރަނި ނަގައިގެން ތިކުރީ ހުސް އިސްރާފު. ކުޑަކުރި ޚަރަދެއް އެބައޮތް؟ މިހާރު ތިތިބީ ދަރަނި ދަންތުރައެއްގައި ނޫންތަ؟ އިތުރަށް އޮޅުވާނުލައި ރައްޔިތުންގެ ޖީބަށް އަތްބޭނުން ހުއްޓާލާ. ބާސާ ކަނޑަން ތިއްބާ އިނދެޖެހުނީ؟ pic.twitter.com/luM9XUCgay
— Mohamed Jameel Ahmed (@MJameelAhmed) July 6, 2022
ޑރ.ޖަމީލް މިހެން ވިދާޅުވެފައިވާއިރު، ޓެކްސް ބޮޑުކުރަން ސަރުކާރުން ނިންމި ނިންމުމަށް ގިނަ ބަޔަކު އަންނަނީ ފާޑުކިޔަމުންނެވެ. އޭގެ ތެރޭގައި އިޤްތީޞާދީ މާހިރުންވެސް ހިމެނިވަޑައިގަންނަވައެވެ.ސަރުކާރުގެ އެ ނިންމެވުމަށް އެމްޑީޕީގެ ރައީސް އަދި މަޖިލީހުގެ ރައީސް މުޙައްމަދު ނަޝީދުވެސް ވަނީ ފާޑުވިދާޅުވެފައެވެ.
ދުނިޔޭގައި ތަކެތީގެ އަގުތައް އިންތިހާ އަށް އުފުލެމުން އަންނަ އިރު، ޓީޖީއެސްޓީ ބޮޑުކުރުމުން ރާއްޖޭގެ ޓޫރިޒަމަށް އޮތް ޑިމާންޑް ގެއްލުމުގެ ފުރުސަތު ވަރަށް ބޮޑު ކަމަށްބުނެ މަޓޯޓާއިންވެސް ވަނީ ކަންބޮޑުވުން ފާޅުކޮށްފައެވެ.
