ތެލުގެ އަގު އިންތިހާއަށް އުފުލެމުންދާތީ މާލެ ސަރަހައްދުގައި ޓެކްސީ ދަތުރުގެ އަގުތައް ޓްރާންސްޕޯޓް މިނިސްޓްރީން ބޮޑުކޮށްފިއެވެ.
ޓްރާސްޕޯޓުން މިބަދަލު ގެނައީ ބާޒާރުގައި ތެލުގެ އަގު އުފުލެމުންދާއިރު، އެހެނިހެން ބައެއް ޓްެރާންސްޕޯޓް ހިދުމަތްތަކުގެ އަގުތަކަށް ބަދަލު އައިނަމަވެސް، ޓެކްސީތަކުގެ އަގުތަކަށް ބަދަލު ގެނައުމުގެ ފުރުޞަތު ނެތުމަކީ ޓެކްސީ ޑްރައިވަރުންގެ ކަންބޮޑުވުން ފާޅު ކުރަމުން ދަނިކޮށެވެެ. އަދި ބައެއް ސެންޓަރުތަކުން އަގު ބޮޑުކުރަން ނިންމާފައިވާ ދަނޑިވަޅެއްގައެވެ.
ޓްރާންސްޕޯޓް މިނިސްޓްރީން މީގެ އިރުކޮޅެއް ކުރިން ވަނީ ޓެކްސީ ދަތުރުތަކުގެ އާ އަގުތައް އިއުލާނު ކޮށްފައެވެ. އާ އަގުތަކުގައިވާގޮތުން ކުރިން މާލެ ސަރަހައްދުގައި ޓެކްސީ ދަތުރު ކުރާ ވަރަށް ވުރެ އަގުތައް ވަނީ ބޮޑުކޮށްފައެވެ.
ދުނިޔޭގެ ބާޒާރުގައި ތެލުގެ އަގު އުފުލެމުންދާތީ އެސްޓީއޯއިން ވިއްކާ ތެލުގެ އަގު ބޮޑުކޮށްފައިވާއިރު މިހާރު ޕެޓްރޯލް ލީޓަރެއް ލިބޭނީ 16.55 ރުފިޔާއަށް އަދި ޑީސަލް ލީޓަރެއް ލިބޭނީ 16.77 ރުފިޔާއަށެވެ. މިފަހަރު އަގަށް އައި ބަދަލާއެކު ޕެޓްރޯލް ލީޓަރަކުން 1.95 ރުފިޔާ އަދި ޑީސަލް ލީޓަރަކުން 1.97 ރުފިޔާ ވަނީ ބޮޑުވެފައެވެ.
ތެލުގެ އަގު އެންމެ ފަހުން ބޮޑުކުރީ 5 މާރިޗު 2022 އިން ފެށިގެންނެވެ. އެއިރު ބޮޑުކުރީ ޕެޓްރޯލް ލީޓަރެއް 14.60ރ އަށް އަދި ޑީސަލް ލީޓަރެއް 14.80ރ އަށެވެ.
ދުނިޔޭގެ ބަޒާރުގައި ތެލުގެ އަގު އުފުލެން މެދުވެރިވި މައިގަނޑު އެއް ސަބަބަކީ ރަޝިއާއާއި ޔޫކްރެއިން ހަނގުރާމައިގެ ސަބަބުން ތެލުގެ އަގުތަކަށް އަންނަމުންދާ ބަދަލުތަކެވެ.
