ރާއްޖޭގައި އެއްޖިއްސުން ގުޅުންހިންގުމާއި، ފާޚިޝް ޢަމަލުތައް އާންމުވަމުންދާއިރު ސަރުކާރު އޮތީ ކުޅިބަލަން ކަމުގައި ކުރީގެ ހޯމް މިނިސްޓަރ އުމަރު ނަސީރު ވިދާޅުވެއްޖެއެވެ.

އޭނާ މިހެން ވިދާޅުވީ އެއްޖިއްސުން ގުޅުންހިންގުމުގެ ބޮޑެތި ތުހުމަތުތަކެއް ވެރިކަން ކުރާ މައި ޕާޓީ އެމްޑީޕީގެ މަތިފަޑީގައި ހިމެނޭ ބައެއް ބޭފުޅުންނާއި، މަޖިލީހުގައި ހިމެނޭ އެމްޑީޕީގެ ބައެއް މެމްބަރުންނަށް ކުރެވެމުންދާ ދަނޑިވަޅެއްގައެވެ. އެގޮތުން ރައީސް މުހައްމަދު ނަޝީދުގެ ކޮއްކޮ ނާޒިމް ސައްތާރު ހިމެނޭހެން ބައެއް އިސް ބޭފުޅުންގެ ފޮޓޯއާއި ވީޑިއޯވެސް ސޯޝަލް މީޑިއާގައި ދަނީ ދައުރުވަމުންނެވެ.

މިކަމުގެ ކަންބޮޑުވުން ފާޅުކޮށް އުމަރު ވިދާޅުވީ ލިވާތު ކުރުމަކީ ބޮޑުކަމެއް ނޫން ކަމަށް ދައްކާ، ރާއްޖޭގައި LGBT ފެތުރުމަށް ދަނީ މަސައްކަތްތަކެއް ކުރެވެމުން ކަމަށެވެ. މި މަސައްކަތުގައި، ރާއްޖޭގައި އޮފީސް ގާއިމް ކޮށްގެން ތިބެ މަސައްކަތްކުރާ ބައިނަލް އަޤްވާމީ ޖަމާއަތްތަކާ ރާއްޖެ ބައިވެރިވެފައިވާ ބައިނަލް އަޤްވާމީ ޖަމާއަތްތައްވެސް ހިމެނޭކަމަށް އޭނާ ވިދާޅުވިއެވެ.

ދިވެހިންގެ ތެރޭގައި ފާހިޝް އަމަލުތައް ބޮޑުވުމުގެ ސަބަބުން ބަލިތައް ފެތުރުމާ، ރޭޕް ގިނަވުމާ، ހަށިވިއްކުމާ، ކުޑަކުދިންނާމެދު ބަދު އަޚުލާގީ އަމަލު ހިންގުން ފަދަ ކަންކަން މިދަނީ އާންމު ވަމުން. މި ހުރިހާ ކަމެއް ފެންނަމުންދާއިރު، ސަރުކާރު ފެންނަނީ ކުޅިބަލާ މީހެއްގެ ސިފައިގައި.

– އުމަރު ވިދާޅުވިއެވެ.

އޭނާ ވިދާޅުވީ ކޮންމެ ޤައުމެއްގައިވެސް އެ ޤައުމަކުން ޤަބޫލުކުރާ ދީނީ އަދި އަޚުލާގީ މިންގަޑުތަކެއް ހުންނާނެކަމަށެވެ. އެމިންގަޑުތައް ދިފާޢުކޮށް، އެ މިންގަޑުތައް ދެމެހެއްޓުމަކީ އެ ޤައުމަކުން ކުރަން ޖެހޭނެ ކަމެއްކަމަށް އުމަރު ވިދާޅުވިއެވެ. އަދި ރާއްޖޭގައި ގާއިމް ކޮށްފަ ހުންނަ އޮފީހަކުން ނުވަތަ އެ އޮފީހުގައި ހުންނަ ފަރާތަކުން މިފަދަ ކަމަކަށް ހިތްވަރު ދީފިނަމަ އެ އޮފީހެއް ބަންދު ކުރަން ވާނެކަމަށާއި، ނުވަތަ އެ މީހަކު ފޮނުވާލަންވާނެކަމަށް އުމަރު ވިދާޅުވިއެވެ.

ދިވެހިންގެ ތެރެއިން ބަޔަކު އެފަދަ އަމަލެއް ކޮށްފިނަމަ، ހައްޔަރު ކޮށް ފަޑިޔާރެއްގެ ކުރިމައްޗަށް ގެނެސް، ހައްގު އަދަބު ދޭންޖެހޭކަމަށް އުމަރު ވިދާޅުވިއެވެ. އެކުށެއް ކުރީ ކޮން އާއިލާއެއްގެ ކާކުތޯ ނުބަލައި މުހިންމީ ހައްގު އަދަބު ދިނުންކަމަށް އުމަރު ވިދާޅުވިއެވެ.