ކޯވިޑް-19އާއި ގުޅިގެން ރާއްޖޭގައި ކޯވިޑްގެ ކޭސްތައް ކޮންމެވެސް ވަރަކަށް އިތުރުވަމުން ދިޔަނަމަވެސް، އަޅާފައިވާ ފިޔަވަޅު ތަކާއިއެކު ޢަމަލު ކުރުމަކީ އެންމެ ރަނގަޅުގޮތްކަމަށާއި، ލޮކްޑައުންކަށް ދިއުމުގެ ވިސްނުމެއް ސަރުކާރުން ނުގެންގުޅުއްވާކަމަށް ހެލްތު މިނިސްޓަރ އަހުމަދު ނަސީމް ވިދާޅުވެއްޖެއެވެ. މިނިސްޓަރ ނަސީމް މިހެން ވިދާޅުވީ ރާއްޖޭގެ ކޯވިޑްގެ ހާލަތާއި ގުޅިގެން ކާށިދޫ ދާއިރާގެ މެމްބަރު އަބްދުﷲ ޖާބިރު ކުރެއްވި ސުވާލަކަށް ޖަވާބު ދެއްވަމުންނެވެ.

ކޯވިޑްގެ އަދަދުތައް އަނެއްކާވެސް އިތުރުވާން ފަށާފައިވަނީ މިމަހުގެ ކުރީކޮޅުން ފެށިގެންނެވެ. މިދިޔަ ހަފްތާގައި ރާއްޖެއިން ކޯވިޑަށް ޕޮޒިޓިވްވީ މީހުންގެ އަދަދުވަނީ 1200 އަށް ވުރެއް މައްޗަށް އަރާފައެވެ. މިދުވަސްވަރު ރާއްޖޭގައި ކޯވިޑް ފެތުރޭ މިންވަރު އިތުރުވުމާ ގުޅިގެން މީހުން ގިނައިން އުޅޭ ތަންތަނުގައި މާސްކްއެޅުމަށާއި ދަތުރުފަތުރު ކުރާއިރު ސަމާލުވުމަށް ހެލްތު ޕްރޮޓެކްޝަން އެޖެންސީ އެޗްޕީއޭއިން ވަނީ އިލްތިމާސްކޮށްފައެވެ.

ރާއްޖޭގައި ކޯވިޑްގެ ކޭސްތައް އިތުރުވަމުންދާތީ އިތުރު ލޮކްޑައުންއަކަށް ގޮސްދާނެތޯ ޖާބިރު ކުރެއްވި ސުވާލަށް ޖަވާބު ދެއްވަމުން މިނިސްޓަރ ނަސީްމ ވިދާޅުވީ ރާއްޖޭގެ އިޤްތިޞާދީ ހާލަތަށާއި އާންމު ދިރިއުޅުމުގެ ކަންކަން ކުރިއަށް ގެންދިއުމަށްޓަކައި ލޮކްޑައުން ކުރުމަކީ ސަރުކާރުން ގެންގުޅޭ ވިސްނުމެއް ނޫންކަމަށެވެ.

ކޮރޯނާ ވައިރަސްގެ ކަންތަކުގައި އަޅުގަނޑުމެން ލޮކްޑައުން ހަދާކަށް އަދިއެއް ގަސްތު ކުރެވިފައިނުވޭ. އެއްގޮތަކަށްވެސް އެއީ އަޅުގަނޑުމެން ބޭނުންވާ ކަމެއްވެސް ނޫން ކުރާކަށް އިގޭތޯ. ދިވެހި ރާއްޖޭގެ އިޤްތިޞާދީ ހުރިހާކަމެއް ރަނގަޅަށް ހިނގަންޖެހޭނެ. ކޮރޯނާ ވައިރަސްއާއިއެކީ އުޅެން ދަސްކުރަންޖެހޭނެ. އަޅުގަނޑުގެ ނަސޭހަތަކީ ހުރިހާ ބޭފުޅުންވެސް މިހެން ބަދުވެފައި ހުންނަ ތަންތަނުގައި އުޅެއިރު ތަންކޮޅެއް ބޮޑަށް ވިސްނާލަންޖެހޭ.

– މިނިސްޓަރ ނަސީމް ވިދާޅުވިއެވެ.

ވޭތުވެދިޔަ ހަފްތާގައި ރާއްޖޭގައި ކޯވިޑްގެ އަދަދުތައްވަނީ ވަރަށް ބޮޑަށް މަތިވެފައެވެ. އެޗްޕީއޭގެ ތަފާސް ހިސާބުތަކުން ދައްކާގޮތުގައި މިދިޔަ ހަފްތާގައި 1202 ކޭސް ރިޕޯޓްކުރިއެވެ. އޭގެ ކުރީ ހަފްތާގައި މިއަދަދު ހުރީ 400ގައެވެ.

ކޯވިޑް ޖެހިގެން އެޑްމިޓް ކުރަމުންދާ މީހުންގެ ޢަދަދުވެސްވަނީ އިތުރުވެފައެވެ. އެގޮތުން މިދިޔަ ހަފްތާގައި ބައްޔަށް ޕޮޒިޓިވްވެގެން 51 މީހަކުވަނީ އެޑްމިޓްކޮށްފައެވެ. އަދި މިދިޔަ ހަފްތާގައި މި ބަލީގައި 3 މީހުން ނިޔާވިއެވެ. މިއާއެކު ރާއްޖެއިން މިބަލީގައި ނިޔާވި މީހުންގެ ޢަދަދުވަނީ 305އަށް އަރާފައެވެ. ކޯވިޑް-19 ފެތުރޭ މިންވަރު އިތުރުވާން ފެށުމާއެކު މާލެ ސަރަހައްދުގެ ފްލޫ ކްލިނިކްތަކުގެ ހިދުމަތްވެސް އެޗްޕީއޭއިން ވަނީ ފަށަފައެވެ.