މާލޭގައި ދިރިއުޅޭ މީހުންގެ ތެރެއިން ދަފްތަރުގައި ޖެހިފައިވާ މީހުންގެ ބޭނުން ވޯޓަށް ކުރުމަށްފަހު ސަރުކާރުން ހިލޭ ގޯތި ދޭ ހިސާބުން ދަފްތަރުގައި ތިބި މީހުން ބާކީ ކުރުމަކީ ވަރަށް ޒިންމާދާރުކަން ކުޑަކަމެއްކަމަށްބުނެ ކުރީގެ ބަންޑާރަ ނައިބް ދިޔާނާ ސައީދުގެ ފާޑުކިޔުން ސަރުކާރަށް އަމާޒުވެއްޖެއެވެ.

ސަރުކާރުގެ ބޯހިޔާވަހިކަމުގެ ސިޔާސަތުގެ ދަށުން މާލޭގެ ރައްޔިތުންނަށް ދޫކުރާ ގޯއްޗާއި ފްލެޓަށް އެދި ކުރިމަތިލުމަށް ސަރުކާރުން އިއްޔެ ވަނީ ހުޅުވާލާފައެވެ. ގޯއްޗާއި ފްލެޓަށް ކުރިމަތިލިވޭނީ މާލޭގެ ރައްޔިތުންނަށް އެކަނިކަމަށް ސަރުކާރުން ވަނީ ކަނޑައަޅާފައެވެ.

ސަރުކާރުގެ މިނިންމުމަށް ފާޑުވިދާޅުވެ ދިޔާނާ ވިދާޅުވީ ނިމިދިޔަ ރައްޔިތުންގެ މަޖިލީހުގައި މާލެ ތަމްސީލް ކުރާ މެމްބަރުންގެ އަދަދު 15 އަށް އިތުރުކޮށް، ދަފްތަރުގައި ތިބި މީހުންގެ ވޯޓާއިއެކު މަޖިލީހުގެ ސުޕަ މެޖޯރިޓީ އެމްޑީޕީން ހޯދާފައިވާކަމަށެވެ. އޭގެ ބަދަލެއްގެ ގޮތުގައި ދަފްތަރު މީހުންނަށް ދީފައިވަނީ ބޮޑިއެއްކަމަށް ދިޔާނާ ވިދާޅުވިއެވެ. ދަފްތަރުގައި ތިބި މީހުންނަށްވެސް އެންމެ ބޮޑު ގޮންޖެހުމެއްގެ ގޮތުގައި އޮތް ބޯހިޔާވަހިކަމާއި ޖެހުނު ހިސާބުން އެމީހުން މިވީ ބާކީ ކަމަށް ދިޔާނާ ވިދާޅުވިއެވެ.

އަސްތާ، މާލޭގެ ދަފްތަރުގައި ޖައްސައިގެން މާލޭގެ އާބާދީ އެތައް ގުނައަކަށް ބޮޑުކޮށް، މާލެއަށް 15 ގޮޑި މަޖިލިސްގަ ކަނޑައަޅާ އިތުރުކޮށް މި އެންމެންލައްވައި ވޯޓު އަޅުއްވާ އެގޮނޑިތަކަށް މެމްބަރުން ހޮވާ، އެންމެ ފަހުން ވަރުގަދަ ބޮޑިއެއް މިދިނީ! ގޯތި ބަހަންވީމާ ދަފްތަރުގައި ޖެއްސި މީހުން ބާކީ.

– ދިޔާނާ ވިދާޅުވިއެވެ.

މިސްކީމުގެ ދަށުން ދޫކުރާނެ ގޯތީގެ ބޮޑުމިން ކަނޑައަޅާނީ މައިގަނޑު 3 އުޞޫލަކުންނެވެ. މި އުޞޫލުތަކާއި، ފްލެޓާއި ގޯއްޗަށް އެދި ކުރިމަތިލާ މީހުންގެ ކިބައިގައި ހުންނަންޖެހޭ ޝަރުތުތައް ހައުސިންގ މިނިސްޓްރީން މިއަދު ވަނީ އިޢުލާންކުރައްވާފައެވެ.

ދޫކުރާ ގޯތީގެ ބޮޑުމިން ކަނޑައަޅާނެ އުޞޫލު:

* އެޕްލިކޭޝަނަކަށް ލިބޭނެ ގޯތީގެ އެންމެ ކުޑަ ސައިޒަކީ 1،250 އަކަފޫޓު
* ޖޮއިންޓް އެޕްލިކޭޝަނެއްނަމަ، އިތުރުވާ ކޮންމެ މީހަކަށް 400 އަކަފޫޓު އިތުރުކުރެވޭނެ
* 7 މީހުންނަށްވުރެ ގިނަ މީހުން އެއްކޮށް ބައިވެރިވާނަމަ ޖުމްލަ 4،000 އަކަފޫޓު

ގޯއްޗަށް އެދި ކުރިމަތިލާ މީހުންގެ ޝަރުތުތައް:

* މާލޭގެ ރައްޔިތެއްކަމުގައިވުން
* 18 އަހަރު ފުރިފައިވާ މީހެއްކަމުގައިވުން
* މާލޭ ސަރަޙައްދުގައި އަމިއްލަ ނަމުގައި 600 އަކަފޫޓަށްވުރެ ބޮޑު ތަނެއް ނެތުން
* 600 އަކަފޫޓަށްވުރެ ބޮޑުތަނެއް ރަޖިސްޓްރީވެފައިވާނަމަ، އެތަނެއް ދޫކޮށްލަން އެއްބަސްވުން
* އަސާސީ ބޯހިޔާވަހިކަމުގެ ސްކީމަކުން އެއްވެސް ބޯހިޔާވަހިކަމެއް ލިބިފައިވާ މީހެއްކަމުގައި ނުވުން
* ބަންޑާރަ ގޯއްޗަކުން ބަހައިގެން ވާރުތައިން ލިބެންއޮންނަ ތަނެއް ދޫކޮށްލަން އެއްބަސްވުން
* އަމިއްލަ ނަމުގައި އޮތް ބަންޑާރަ ގޯއްޗެއް އެހެން ފަރާތަކަށް ދީފައި ނުވަތަ ވިއްކާލާފައިނުވުން

ފްލެޓަށް އެދި ކުރިމަތިލާ މީހުންގެ ޝަރުތުތައް:

* މާލޭގެ ރައްޔިތެއްކަމުގައިވުން
* 18 އަހަރު ފުރިފައިވާ މީހެއްކަމުގައިވުން
* މާލޭގެ ރަށްވެއްސަކަށްވެފައިވާތާ ނުވަތަ ދިރިއުޅޭތާ 15 އަހަރު ވެފައިވާ ފަރާތެއްކަމުގައިވުން
* އެއްވެސް މަޝްރޫޢަކުން މީގެކުރިން ބޯހިޔާވަހިކަމެއް ލިބިފައިވާ ފަރާތަކަށްނުވުން
* މާލޭ ސިޓީން 600 އަކަފޫޓުގެ ނުވަތަ އެއަށްވުރެ ބޮޑު ޔުނިޓެއް/ބިމެއް ތަނެއް ގަނެފައިވާ ފަރާތަކަށްނުވުން
* ވޭތުވެދިޔަ 3 އަހަރުގެ ތެރޭގައި 600 އަކަފޫޓަށްވުރެ ބޮޑު ބިމެއް ވިއްކާފައިނުވުން
* މަހަކަށް ޖެހޭ ޖުމްލަ އާމްދަނީ 60،000 ރުފިޔާވުރެ ބޮޑުނުވުން

ގޯތި ނުވަތަ ފްލެޓަށް އެދި ހުށަހެޅިދާނެ ގޮތްތަކާއި، ގޯތި ނުވަތަ ފްލެޓް ލިބޭ ފަރާތްތައް ކަނޑައެޅުމުގައި ޢަމަލުކުރާނެގޮތާއި، އެހެނިހެން ތަފްޞީލު ދިވެހި ސަރުކާރުގެ ގެޒެޓުގައި ޝާއިޢުކޮށްފައިވާ ބިންވެރިޔާ ސްކީމުގެ ދަށުން މާލެ ސަރަޙައްދުން ބަންޑާރަ ގޯތި ދޫކުރުމުގެ އުޞޫލާއި، ގެދޮރުވެރިޔާ ސްކީމުގެ ދަށުން ފްލެޓް ދޫކުރުމުގެ އުޞޫލުގައި ވަނީ ބަޔާންކޮށްފައެވެ.

މި ދެ ސްކީމަށް ޝަރުތު ހަމަވިނަމަވެސް، ގެދޮރުވެރިން ޕޯޓަލް މެދުވެރިކޮށް ފޯމު ހުށަހެޅޭނީ އެ ފަރާތަކުން އިޚްތިޔާރުކުރާ ކޮންމެވެސް އެއް ސްކީމަކަށްކަމަށް ހައުސިންގ މިނިސްޓްރީން ވިދާޅުވެއެވެ.