ޔޯގާ ދުވަސް ފާހަގަނުކުރުމަށް ދައުލަތުގެ އެއްވެސް އިދާރާއަކުން އަންގާފައި ނުވާކަމަށް ޔޫތު މިނިސްޓްރީން ބުނެފިއެވެ.

ޔޯގާ ހަރަކާތާއި ގުޅިގެން ހިނގި ހަމަނުޖެހުންތަކުގެ މައްސަލާގައި މިހާތަނަށް 19 މީހަކު ފުލުހުން ހައްޔަރުކޮށްފައިވަނިކޮށް، އިސްލާމިކް މިނިސްޓްރީން ޔޯގާއަކީ ހުއްދަ ކުޅިވަރެއް ނޫން ކަމަށް ފުލުހުންނަށް އަންގާފައިވާކަން ވަނީ ހާމަވެފައެވެ. މިއާއެކު ގިނަބައެއްގެ ފާޑުކިޔުން ޔޫތު މިނިސްޓްރިއަށާއި ފުލުހުންނަށް ވަނީ އަމާޒުވެފައެވެ.

ޔޯގާ ދުވަސް ފާހަގަކުރުމަށް ޔޫތު މިނިސްތްރީއާއި ރާއްޖޭގައި ހުންނަ އިންޑިއަން ކަލްޗަރަލް ސެންޓަރުން އިންތިޒާމްކޮށްގެން ހިންގި ހަރަކާތާއި ގުޅިގެން އަމާޒުވި ފާޑުކިޔުންތަކަށް ރައްދުދީ ޔޫތު މިނިސްޓްރީން ދެންމެ ނެރުނު ބަޔާނެއްގަިއ ވަނީ އެ ހަރަކާތް ކުރިއަށް ގެންގޮސްފައިވަނީ 2014 ވަނަ އަހަރުން ފެށިގެން ކޮންމެ އަހަރަކުވެސް އެދުވަސް ފާހަގަކުރަމުން އަންނަ އުސޫލުންކަމަށެވެ.

2014 އިން ފެށިގެން ޔޫތު މިނިސްޓްރީން މިކަމުގައި ބައިވެރިވަމުން އަންނަނީ ޔޯގާ ހަރަކާތަކީ ކަސްރަތުތެރޭގައި ހިމެނޭކަމަކަށްވާތީކަމަށާއި، އެހެން ޤައުމުތަކުގައިވެސް ކުޅިވަރު މިނިސްޓްރީން ބައިވެރިވާ އުސޫލުންކަމަށް އެ މިނިސްޓްރީން ބުންޏެވެ.

އިންޓަރނޭޝަނަލް ޑޭ އޮފް ޔޯގ ފާހަގަނުކުރުމަށް އިސްލާމިކް މިނިސްޓްރީއާއި ދައުލަތުގެ އެއްވެސް އިދާރާއަކުން އެ މިނިސްޓްރީއަށް އަންގާފައިނުވާކަަމށްވެސް ޔޫތު މިނިސްޓްރީން ބުންޏެވެ. ކަނޑައެޅިގެން އިސްލާމްދީނުގައި ހަރާމްކޮށްފައިވާ ކަންކަމާއި ރާއްޖޭގެ ޤާނޫނު އަސާސީއާއި ޤާނޫނުތަކާއި ޚިލާފު އެއްވެސްކަމެއް އެ މިނިސްޓްރިން ނުހިންގާކަމުގެ ޔަޤީންކަންދޭކަމަށްވެސް އެ މިނިސްޓްރީން ބުންޏެވެ. ބައެއް މައްސަލަތަކަކީ ޢިލްމުވެރިންގެ މެދުގައި ޚިލާފު އުގެދިފައިވާ ކަންތައްތަކެއްކަމަށް ކަނޑައެޅިފައިވާ އުސޫލުތަކުގެތެރެއިން މިފަދަ މައްސަލަތަކާއި ގުޅޭގޮތުން ކަމާގުޅޭ އިދާރާތަކުން ސާފުކޮށް ރަޢުޔު ކަނޑައެޅުމަކީ މުހިއްމު ކަމެއްކަމަށް ދެކޭކަމަށްވެސް ޔޫތު މިނިސްޓްރީން ބުންޏެވެ.

ނަމަވެސް އިސްލާމިކް މިނިސްޓްރީން ފުލުހުންނަށް ފޮނުވި ސިޓީއެއް ވަނީ ޢާންމުވެފައެވެ. އެ ސިޓީގައި ވަނީ ރާއްޖޭގައި ޔޯގާ ހެދުން އާންމުވެފައިވާ ކަމަށެވެ. އެގޮތުން ޔޯގާ ހަދަމުންދަނީ މެޑިޓޭޝަންގެ ގޮތުގައާއި ކަސްރަތު އަދި ތަފާތު ބަލިތަކަށް ޝިފާ ހޯދުމުގެ ނަމުގައި ކަމަށް އެ ސިޓީގައިވެއެވެ.

ދެހާސް ހަތަރު ވަނަ އަހަރު މިސްރުގެ ފަތުވާ ދޭ މަޖިލީހުން ނެރުނު ފަތުވާއެއްގައި ޔޯގާ އަކީ މުސްލިމުންނަށް ހުއްދަ ކުޅިވަރެއް ނޫން ކަމަށް ބަޔާންކޮށްފައިވާ ކަމަށް ވެސް އެ ސިޓީގައިވެއެވެ. އަދި 2008 ވަނަ އަހަރު މެލޭޝިއާގެ ގައުމީ ފަތުވާ މަޖިލީހުން ވެސް ޔޯގާގެ ސަބަބުން މުސްލިމުންގެ އަޤީދާއަށް އަސަރު ކުރާ ކަމަށް ބަޔާންކޮށް ފަތުވާއެއް ނެރެފައިވާ ކަމަށް އެ ސިޓީގައިވެއެވެ.

އެ ސިޓީގައި ވަނީ, އެއީ އެ މީހުންގެ ދީނީ ސަޤާފަތާ ގުޅޭ މެޑިޓޭޝަންގެ ނަމުން ނަންދީ އިރުއަރާ ވަގުތު އިރަށް ކުރުނީސްކޮށް އަދި ހިންދޫން ބުދު ފައްޅީގައި އަޅުކަން ކުރުމުގައި ބޭނުންކުރާ މިއުޒިކް ހިމެނޭ ހަރަކާތެއް ކަމަށެވެ.

އިސްލާމީ ޝަރީއަތާ ޚިލާފް ކަމަކަށްވާތީ އާއި ރާއްޖޭގެ ދީނީ އެއްބައިވަންތަކަން ހިމާޔަތްކުރުމާ ބެހޭ ގާނޫނުގެ ދަށުން މަނާކުރެވިފައިވާ ކަންތަކެއް ކަމުގައިވާތީ އިސްލާމީ ޝަރީއަތާއި ދިވެހި ގާނޫނުތަކާއި ގަވާއިދުތައް ނެގެހެއްޓުމަށްޓަކައި މިފަދަ ކަންކަން ކުރާ ފަރާތްތައް ދެނެގަނެ އެކަށީގެންވާ ފިޔަވަޅު އެޅުމަށް އަންގަމެވެ.

– އެ ސިޓީގައިވެއެވެ.

ބައިނަލްއަގުވާމީ ޔޯގާ ދުވަސް ފާހަގަކުރުމަށް އިންޑިއަން ކަލްޗްރަލް ސެންޓަރާއި ޔޫތު މިނިސްޓްރީ ގުޅިގެން ބާއްވަން ނިންމި ޔޯގާ ހަރަކާތް ހުއްޓުވަން އިސްލާމިކް މިނިސްޓްރީން އެންގި އެންގުމަށް ފުލުހުން އަމަލުކޮށްފައެއްނުވެއެވެ. އެ ހަރަކާތް ކުރިއަށްދިޔަވަގުތު އެކަމަކީ ހަރާމް ކަމެއްކަން ބަޔާންކޮށްދިނުމުގެ ގޮތުން އިލްމުވެރީން ކަމަށްވާ އާދަމް ނިޝާމާއި މުޙައްމަދު ފަޒްލޫން ވަނީ ގަލޮޅު ދަނޑު ކުރިމަތީ ހަރަކާތްތެރިވެވަޑައިގެންފައެވެ. އެ ދެ ބޭފުޅުން ހަރަކާތްތެރިވީ އެކަމާ ދެކޮޅަށް ޒުވާނުންގެ ބަޔަކު ކުރި އިހްތިޖާޖެއްގެ ތެރޭގައެވެ.

އެކަމަކީ އިސްލާމްދީނުގައި ހަރާމްކަމެއް ކަމަށް އެ ދެ ބޭފުޅުން ބަޔާންކޮށްދެއްވަމުން ދަނިކޮށް، އިހްތިޖާޖުގައި ބައިވެރިވި ޒުވާނުންގެ ލޭކެކި ގަލޮޅު ދަނޑަށް ގަދަކަމުން ވަދެ ހަމަނުޖެހުން ހިންގައި އެ ހަރަކާތް ވަނީ ހުއްޓުވާފައެވެ. ނަމަވެސް އެ ވަގުތު އެ ހަމަނުޖެހުން ކޮންޓްރޯލް ކުރުމަށް އެކަށީގެންވާ މަސައްކަތެއް ފުލުހުން ކޮށްފައެއް ނުވެއެވެ. އެ ހަމަނުޖެހުންތަކާ ގުޅިގެން 19 މީހަކު މިހާތަނަށް ވަނީ ހައްޔަރުކޮށްފައެވެ. އޭގެތެރޭގައި ޝައިޚް ނިޝާނާއި ފަޒްލޫން ވެސް ހިމެނިވަޑައިގަންނަވައެވެ.

ސްލާމިކް މިނިސްޓްރީން ވަނީ އެކަމަށް އެދި ކޮމިޝަނަރު އޮފް ޕޮލިސް މުހައްމަދު ހަމީދަށް ސިޓީއެއް ފޮނުވާފައެވެ. އެ ސިޓީ ފޮނުވީ މި މަހުގެ 15 ވަނަ ދުވަހުއެވެ. އިންޑިއާ ހައިކޮމިޝަންގެ އިސް ނެގުމަށް ސަރުކާރުގެ އިދާރާތަކުގެ ފުރިހަމަ އެއްބާރުލުމާއި ފުލުހުންގެ ސެކިއުރިޓީވެސް ލިބިގެން ބޭއްވި އިވެންޓެކެވެ. ނަމަވެސް އެއީ މުންކަރާތެއް ކަމަށްވާތީ އެކަމާ ދެކޮޅަށް އިހުތިޖާޖު ކުރި ބަޔަކު ވަނީ ގަލޮޅު ދަނޑަށް ވަދެ ހަމަނުޖެހުންތަކެއް ހިންގާފައެވެ.

އެ މައްސަލަ ރައީސް ސޯލިހް އަންގަވައިގެން ދިވެހި ފުލުހުންގެ ހިދުމަތުން ދަނީ ވަރަށް ސީރިއަސްކޮށް ބަލަމުންނެވެ. ދެ އިލްމުވެރިއަކު ހިމެނޭހެން 19 މީހަކު މިވަގުތު ތިބީ ބަންދުގައެވެ.