ދީނީ އިލްމުވެރިޔާ ޝައިޚް އާދަމް ނިޝާން ހައްޔަރު ކޮށްފިއެވެ.
ޝައިޚު ނިޝާން ހައްޔަރުކޮށްފައިވަނީ، ދިރިއުޅުއްވާ ރެހެންދި ފްލެޓުންނެވެ. މޫނު ނިވާކޮށްގެންތިބި ފުލުހުން ވަނީ، ނިޝާން ހައްޔަރުކޮށްގެން ގެންގޮސްފައެވެ.
ޝައިޚު ނިޝާން ހައްޔަރު ކޮށްފައިވާއިރު، މިރޭ ވަނީ ދީނީ އިލްމުވެރިޔާ ޝައިޚް މުހައްމަދު ފަޒްލޫންވެސް ހައްޔަރުކޮށްފައެވެ. ފަޒްލޫން ހައްޔަރުކޮށްފައިވަނީ މިރޭގެ އިރާކޮޅުގެ ވަގުތެއްގައެވެ. މައުލޫމާތު ލިބިފައިވާ ގޮތުގައި އޭނާ ހައްޔަރު ކޮށްފައިވަނީ، މިހަފްތާގެ އަންގާރަ ދުވަހު ހިންގި ޔޯގާ ހަމަނުޖެހުމާއި ގުޅިގެން ފުލުހުން ހިންގަމުންދާ އޮޕަރޭޝަންގެ ދަށުންނެވެ.
މި މައްސަލައިގެ ތުހުމަތުގައި ޕީޕީއެމްގެ އިވެންޓް ކޯޑިނޭޓަރު މުހައްމަދު އިސްމާއީލާއި އެކު ޕީޕީއެމްގެ ކައުންސިލް މެމްބަރު އިބްރާހިމް ރައްޒާންވެސް ވަނީ ހައްޔަރުކޮށްފައެވެ. ގަލޮޅު ދަނޑުގައި ގައުމުތަކުގެ ޑިޕްލޮމޭޓުންނާއި އަދި ސަރުކާރުގެ އިސް ބައެއް ބޭފުޅުން ޔޯގާ ހައްދަވަން ތިއްބަވަނިކޮށް ދަޑުތެރެއަށް ވަދެގައް މީހުން ހިފަހައްޓައިގެން ތިބި ދިދަތަކާއި ޝިއާރުތައް ޕީޕީއެމް އޮފީހުން ނެރެނިކޮށް ނަގާފައިވާ ފޮޓޯތަކެއް މި ހާދިސާ ހިނގި ދުވަހުވަނި ސޯޝަލް މީޑިއާގައި އާންމު ވެގެން ގޮސްފައެވެ.
އަދި އެދުވަހު ފުލުހުން ނެރެފައިވާ ބަޔާނުގައި ވިދާޅުވެފައިވާ ގޮތުން، މުޒާހިރާކޮށް ގަލޮޅު ދަނޑުގެ ތެރެއަށް ވަދެގަތް މީހުން ނޭނުންކޮށްފައިވާ ސާމާނު ނެރެފައިވަނީ ޕީޕީއެމްގެ އޮފީސްތެރެއިން ކަމަށެވެ.
