ތިމާއަށް ހައްގުނުވާ މުދަލެއް ކެއުމަކީ އަނގުރު އަލިފާން ކެއުން ފަދަ ކަމެއް ކަމުގައި މިއަދު ހުކުރު ޚުތުބާގައި ވިދާޅުވެއްޖެއެވެ.
ވާރުތަ މުދަލަށް ރައްކާތެރި ވުމާއި ގުޅޭގޮތުން ޚާއްސަ ކޮށްފައިވާ މިއަދުގެ ޚުތުބާގައި ވިދާޅުވެފައިވަނީ، މީހަކު މަރުވުމުން އޭނާ ދޫކޮށްފައިދާ ތަރިކައަކީ، އެ ބަހާނެ އުސޫލުތަކާއި، ޤަވާއިދުތަކެއް މާތްﷲ ކަނޑައަޅުއްވާފައިވާ ތަކެތި ކަމުގައެވެ.
މިގޮތުން، ވަސިއްޔަތަކީ ތަންފީޒު ކުރެވެން ޖެހޭނެ އެއްޗެއްކަމާއި، މިކަމަށް ވަސިއްޔަތް ކުރާ ފަރާތަކީ ﷲތަޢާލާ ކަމަށްވުމުން، އެކަލާނގެ ވަސިއްޔަތް ތަންފީޒު ކުރުމަށް ވަކީން ބޮޑަށް ސަމާލުކަން ދޭންޖެހޭނެ ކަމުގައި ޚުތުބާގައި ބަޔާން ކުރައްވާފައި ވެއެވެ.
ވާރުތަ މުދަލަށް ރައްކާތެރިވުމުގެ މުހިންމުކަން ބަޔާން ކުރައްވަމުން ޚުތުބާގައި ވިދާޅުވެފައިވަނީ، ނިސާ ސޫރަތުގެ 11 ވަނަ އާޔަތާއި، 12ވަނަ އާޔަތާއި، 176ވަނަ އާޔަތުގައި އެ މުދާ ބަހަންވީ ގޮތުގެ ތަފްސީލީ ގަވާއިތުތައް މާތްﷲ ބަޔާން ކުރައްވާފައިވާކަމަށާއި، މިއާޔަތްތަކުން އެގެން އޮތް ގޮތުގައި ތަރިކަ މުދަލަކީ އެ މުދާ ބެހުން މާތްﷲ ފަރުޟު ކުރައްފާއިވާ ކަމެއް ކަމުގައެވެ.
އެއީ ހެޔޮ ކަމެއްގެ ގޮތުން ކުރާންޖެހޭ ކަމެއް ނޫނެވެ. ތަރިކަ މުދާ ބެހުމުގެ މައްސަލާގައި، އެއްވެސް ފަރާތަކަށް އިޚްތިޔާރު ލިބިގެނެއް ނުވެއެވެ. އެމުދާ ބަހަންޖެހޭނީ މާތްﷲ ކަނޑައަޅުއްވާފައިވާ ގޮތަށެވެ. ތަރިކައަކީ މާތްﷲ ގެ ހައްގުތަކުގެ ތެރޭގައި ހިމެނޭ ކަމެކެވެ. އެކަލާނގެ ހައްގަކަށް އަރައިގަނެގެން ނުވާނެއެވެ.
ޚުތުބާގައި ވިދާޅުވެފައި ވެއެވެ.
މިއަދު ޚުތުބާގައި ވިދާޅުވެފައިވާ ގޮތުގައި، ދުޝްމަނުން އިސްލާމް ދީނުގެ ބުރުސޫރަ ހުތުރު ކުރުމަށްޓާކާ ދައްކާ އަސާސެއް ނެތް ވާހަކަތަކުގެ ތެރޭގައި، ތަރިކަ މުދާ ބެހުމުގައި، އިސްލާމް ދީނުގައި އަންހެނުންނަށް އަނިޔާވެރި ވެފައިވާ ވާހަކަ ހިމެނޭކަމަށް ބަޔާން ކުރައްވާފައި ވެއެވެ.
ޚުތުބާގައި ވިދާޅުވެފައިވާ ގޮތުގައި މިފަދަ މީހުން އަންހެނުންނާމެދު ވިސްނަމުންދަނީ ޖާހިލިއްޔަ ޒަމާނުގެ މިންގަޑުންނެވެ. އަދި ވާރިސުންނަށް ތަރިކަ މުދަލުން ލިބޭ މިންވަރު ތަފާތުވަނީ އަންހެން ފިރިހެން ވެގެން ނޫންކަން އެނގޭކަން ބަޔާން ކުރައްވަމުން ޚުތުބާގައި ވިދާޅުވެފައިވަނީ، ތަރިކަމުދާ ބެހުމުގެ އިސްލާމީ ފަލްސަފާއަށް ބަލާއިރު އޭގައި އިލާހީ ހިކުމަތްތަކެއް ވާކަމުގައެވެ.
މިގޮތުން ޚުތުބާގައި ވިދާޅުވެފައިވަނީ، ތަރިކަ މުދަލާބެހޭ މައްސަލަތައް ދިރާސާ ކުރައްވާ ބޭފުޅުންގެ ޚުލާސާތައް ބުނާ ގޮތުގައި ފިރިހެނަކަށް ލިބޭ މިންވަރުގެ ދެބައިކުޅަ އެއްބައި އަންހެނަކަށް ލިބެނީ އެންމެ ހަތަރު ހާލަތެއްގައި ކަމުގައެވެ. އަދި މި ހަތަރު ހާލަތަށްވުރެ މާގިނަ ހާލަތުގައި އަންހެނާއަށާއި ފިރިހެނާއަށް ލިބޭ މިންވަރު އެއްވަރު ވެފައި ވެއެވެ. ދިހަވަރަކަށް ހާލަތުގައި ފިރިހެނާއަށް ލިބޭ މިންވަރަށްވުރެ އަންހެނާއަށް ލިބޭ މިންވަރު އިތުރު ވެފައިވެއެވެ. ތިރީހަކަށް ހާލަތުގައި ފިރިހެނާއާއި އަންހެނާއަށް ލިބޭ މިންވަރު އިތުރުވެ، ނުވަތަ އަންހެނާއަށް ލިބޭ މިންވަރު އިތުރުވެ، ނުވަތަ އަންހެނާއަށް ލިބި ފިރިހެނާއަށް ނުލިބޭ ހާލަތްތަކެއް ވާކަމުގައިވެސް ޚުތުބާގައި ބަޔާން ކުރައްވާފައި ވެއެވެ.
