މާތްވެގެންވާ އިސްލާމްދީނާއި، މާތް ރަސޫލާއަށް ފުރައްސާކޮށް ހިންގާ އެއްވެސް ޢަމަލަކީ ބަލައި ގަނެވޭނެ ޢަމަލެއް ނޫންކަމުގައި ދިވެހި ސަރުކާރުން ވިދާޅުވެއްޖެއެވެ.

މާތް ރަސޫލާއާއި، އިސްލާމްދީނަށް ފުރައްސާރަކޮށް، އިންޑިއާގެ ބީޖޭޕީގެ އޮފިޝަލަކު ދެއްކި ވާހަކަ ކުށވެރި ކުރައްވައި ސަރުކާރުން ނެރުނު ބަޔާނުގައި ވިދާޅުވީ، މާތްވެގެންވާ އިސްލާމްދީނުގެ މަތިވެރި އުސޫލުތަކާއި، މާތް ރަސޫލާގެ ރިވެތި އުސޫލުތަކާއި، ދެކޮޅަށް ހިންގާ އެއްވެސް ޢަމަލެއް ބަލައި ނުގްނަނާނެކަމަށެވެ. އަދި އެފަދަ ކޮންމެ ޢަމަލެއްވެސް އެންމެ ހަރުކަށީ އިބާރާތުން ދިވެހި ސަރުކާރުން ކުށްވެރި ކުރާކަމުގައެވެ.

މިކަމުގައި ޝާމިލުވި އޮފިޝަލަށް ޕީޖޭޕީން ފިޔަވަޅު އަޅާފައިވާތީ އެކަމަށް ސަރުކާރުން ވަނީ މަރުހަބާ ދަންނަވާފައެވެ. ސަރުކާރުން ވަނީ މީގެ ކުރިންވެސް ދުނިޔޭގެ އެކި ޤައުމުތަކުގައި މާތް ރަސޫލާއާއި، އިސްލާމްދީނަށް ފުރައްސާރަކޮށް ހިންގާ އަމަލުތައް އެންމެ ހަރުކަށި އިބާރާތުން ކުށްވެރިކޮށްފައެވެ.

އިންޑިއާގެ ބީޖޭޕީގެ ބައެއް އޮފިޝަލުން، އިސްލާމް ދީނާއި މާތް ރަސޫލާ އަށް ފުރައްސާރަކޮށް ދެއްކި ވާހަކަތަކާ މެދު ދިވެހި ސަރުކާރުން ކަންބޮޑުވެއެވެ.

– ބަޔާނުގައި ބުނެފައިވެއެވެ.

ޕީޖޭޕީގެ އިސް ތަރުޖަމާން ނުޕުރު ޝަރުމާ ރަސޫލާއަށް ފުރައްސާރަ ކުރުމާއި ގުޅިގެން ދުނިޔޭގެ ގައުމުތަކުން ދަނީ އޭނާގެ އަމަލު ކުށްވެރި ކުރަމުންނެވެ. އަދި އަރަބި އިސްލާމީ ގައުމުތަކުގައި ދަނީ އިންޑިއާގެ އުފެއްދުންތައް ބޮއިކޮޓް ކުރުމަށްވެސް ގޮވާލާ އަޑު އުފުލަމުންނެވެ.

މިގޮތުން މިއަމަލު ކުށްވެރިކޮށް ސައުދީ ފޮރިންގ މިނިސްޓްރީން ނެރުނު ބަޔާނުގައި ބުނެފައިވަނީ، ބީޖޭޕީގެ އިސް ތަރުޖަމާން ރަސޫލާއާއި ގުޅޭގޮތުން ދައްކާފައިވާ ވާހަކައަކީ އެކަލޭގެފާނަށް ފުރައްސާރަ ކުރުން ކަމަށާއި، މިއަމަލު ހަރުކަށި އިބާރާތުން ކުށްވެރި ކުރާ ކަމުގައެވެ.

ސައުދީ އަރަބިއާގެ އިތުރުން، އަރަބި ގައުމުތައް ކަމުގައިވާ ޤަތަރާއި ކުވައިތުންވަނީ، މިއަމަލު ކުށްވެރި ކުރުމުގެ ގޮތުން، އެގައުމުތަކުގައި ތިއްބަވާ ސަފީރުން ފޮރިންގ މިނިސްޓްރީއަށް ހާޒިރު ކޮށްފައެވެ. އަދި ޔުނައިޓެޑް އަރަބި އެމިރޭޓްސްގެ ދޯހާއިން ވަނީ ޝަރުމާގެ ކޮމެންޓްތަކާއި ގުޅިގެން އިންޑިއާއިން މާފަަށް އެދުމަށްވެސް ގޮވާލާފައެވެ.

ޝަރުމާ މާތް ނަބިއްޔާއަށް ފުރައްސާރަ ކުރުމާއި ގުޅޭގޮތުން ކުރެއްވި ޓުވީޓުގައި ޕާކިސްތާންގެ ބޮޑުވަޒީރު ޝެހެބާޒް ޝަރީފްވަނީ އިންޑިއާގެ ވެރިކަންކުރާ ޕާޓީގެ އިސް އޮފުޝަލުގެ އަމަލް ވަރަށް ބޮޑަށް ކުށްވެރިކުރާކަމަށް ވިދާޅުވެފައެވެ. އަދި އޭނާ ވިދާޅުވެފައިވަނީ، އިންޑިއާގެ ބޮޑުވަޒީރު މޯޑީގެ ވެރިކަމުގައި އިންޑިއާގައި ދީނީ މިނިވަންކަން ގެއްލިފައިވާ ކަމަށާއި، މުސްލިމުންލިމުންނާމެދި ބޭއިންސާފަވަމުން ދާކަމަށް ވިދާޅުވެފައެވެ.