ބައެއް މީހުނަށް ރަހުމަތްތެރިންނާ އޮންނަ ގުޅުން ގިނަ ދުވަހަށް ދެމެހެއްޓުން ވަރަށް އުނދަގޫ ކަމަކަށްވެއެވެ. އެކުގައި އުޅޭ މީހުންވެސް ތިމާ ބާކީކޮށް އެކަހެރި ކުރާހެން ހީވާ ފަހަރު އާދެއެވެ.
އެއްވެސް ސަބަބެއްނެތި މިހެން ރަހުމަތްތެރިން ހަދަނީ ގިނަފަރަށް ތިމާގެ މިޒާޖުގައި ހުންނަބައެއް ކަންތަށްތަކުގެ ސަބަބުންނެވެ. އެފަދަ ކަންތައްތައް ދެނެގަތުމަށްޓަކައި ތިރީގައިވާ ޕޮއިންޓުތައް ކިޔާލާށެވެ.
- މާބޮޑަށް އެހެން މީހުންގެ ސަމާލުކަން ހޯދަން މަސައްކަތްކުރާ މީހުންނަކީ ގިނަ ފަހަރަށް ގިނަމީހުން ފޫހިވާ ބައެކެވެ. އެފަދަ މީހުން ކުރާ ކޮންމެ ކަމެއްގައިވެސް ބަލާނީ ދެންތިބި މީހުންގެ ސަމާލުކަން އެމީހަކަށް ލިބޭނެގޮތަކަށް ކަންތައްކުރުމަށެވެ. ގަދަކަމުންނަމަވެސް އެސަމާލުކަން ހޯދުމަށް މަސައްކަތްކުރެއެވެ.
- އަބަދުވެސް ކަންކަމުގައި ނުބައިކޮށް ދެކޭ މީހުންނަކީވެސް އެމީހުންގެ ވިސްނުން ހުންނަގޮތުން އެހެން މީހުންނަށް އުދަނގޫވާ ބައެކެވެ. އެމީހުން ކޮންމެ ކަމެއްގައިވެސް ދެކޭނީ ނުބައިކޮށެވެ. މިސާލަކަށް އެންމެން އެކީ ކޮފީއަކަށް ދާން ބުންޏަސް، އެއީ ދެން މިއުމުރުގަ ކުރާ ކަހަލަ ކަންކަންހޭ؟ މިކަހަލަ ސުވާލުތައް އެފަދަ މީހުން ކުރެއެވެ. ކަމުގައި އޮންނަ ރަނގަޅަށް ނުވިސްނާ އެކަމުން އަބަދުވެސް ގޯހެއް ދެއްކޭތޯބަލާނެއެވެ.
- އަމިއްލަ އެދުން ބޮޑު މީހުންނާއެކު އުޅުމަކީވެސް ވަރަށް ގިނަ ފަހަރަށް ރަހުމަތްތެރިންނަށް އުނދަގޫކަމަކަށް ވެއެވެ. މިފަދަ މީހުން ރަހުމަތްތެރިޔާގެ ވާހަކަތަކަށް މާބޮޑު ސަމާލުކަމެއް ނުދޭނެއެވެ. އަބަދުވެސް ބޭނުންވާނީ އޭނާގެ އަމިއްލަ ވާހަކަ ދައްކާށެވެ.
- އަނެކާގެ ހުންނަ އުނި ސިފަތަކުގެ ވާހަކަ ދައްކާ އެކަމާ ހީ، ޖޯކު ޖަހާމީހުންނަކީ އެބަޔަކާ ދުރުގައި އުޅުމަށް ގިނަ ބަޔަކު އިޙްތިޔާރުކުރާ ބައެކެވެ. މިފަދަ މީހުން އަނެކާގެ ދިރިއުޅުމުގެ ފެނަވަރާއި ހުންނަ ގޮތާއި ކާތަކެތީގެ އިތުރުން އަނބިދަރިންގެ ކަންތައްތަކަށްވެސް ޖޯކުޖަހާ މަލާމާތްކުރެއެވެ.
- އަވަހަށް ރުޅިއަންނަ މީހުންނަކީ ފޫހި ބައެއްގެ ގޮތުގައި ބަލައިގަނެއެވެ. ބުނެވޭ އެއްޗަކުން، ކުރެވޭ ކަމަކުން ރުޅިއައިސް މައްސަލަބޮޑުކުރާނަމަ ރަހުމަތްތެރިންގެ ތެރޭގައި މަޤުބޫލުކަން ކުޑަވެއެވެ.
ތިބާގެ ރަހުމަތްތެރިން ތިބާ ބާކީ ކުރާކަމުގެ އިހުސާސްވާނަމަ މިހިރަ ކަންތައްތައް ރަގަނޅުކޮށްލާށެވެ. ނޫންނަމަ އެކަނިވެރިކަން ތިމާ ވަށާލުން ވަރަށް ގާތެވެ.
