ކަންގަނާ ރަނާވަތު މި ދުވަސްކޮޅު އުޅެނީ އޭނާގެ ކުރިއަށް އޮތް ފިލްމުގެ ޕްރޮމޯޝަންގައި ވަރަށް އަވަދިނެތިއެވެ. ފިލްމު ޕްރޮމޯޝަންގައިވެސް އާދައިގެ މަތިން އޭނާ އަންނަނީ ބޮލީވުޑްގެ ތަރިންގެ ވާހަކަތައް ދައްކަމުންނެވެ.
އެގޮތުން އޭލިސްޓްގެ ތަރިން އޭނާ ދެކެ ބިރު ގަންނަ ކަމަށާއި އެމީހުން އޭނާގެ ފިލްމާގުޅޭ ކަންކަން ސޯޝަލް މީޑީއާގައި ހިއްސާކުރުމަށް ބިރުގަންނަ ކަމަށް ބުނެ އޭނާ އަންނަނީ ތަފާތު ވާހަކަތައް ދައްކަމުންނެވެ.
އަދި ހަމައެއާއެކު މި ހަފްތާ ތެރޭގައި އަމީތާބް ބައްޗަންކުރި ކަމަކުން އޭނާ ވަރަށް ބޮޑަށް ހިތްހަމަ ނުޖެހުނެވެ. އަމިތާބް ޓްވިޓާގައި ކަންގާނާގެ ފިލްމުގެ ޓްރެއިލާ ހިއްސާ ކުރުމަށް ފަހު ކުޑަ އިރުކޮޅެއްގެ ތެރޭގައި ވަނީ ޓްވީޓް ޑިލީޓްކޮށްލާފައެވެ. މިކަމާ ކަންގަނާ ވަރަށް ބޮޑަށް ހިތްހަމަ ނުޖެހުނެވެ.
ނަމަވެސް ސަލްމާން ޚާން ވަނީ ކަންގާނާގެ ފިލްމުގެ ޓްރެއިލާ ސޯޝަލް މީޑީއާގައި ހިއްސާކޮށް ކަންގަނާ އަށާއި ފިލްމުގެ މުޅި ޓީމަށް ތަހުނިޔާ ކިޔާފައެވެ.
އެކަމުގެ ސަބަބުން ކަންގަނާ ވަރަށް އުފަލުން ހުރެ ސަލްމާނަށް ވަނީ ޝުކުރު އަދާ ކޮށްފައެވެ. އަދި ސަލްމާން އެނާގެ ފިލްމުގެ ޓްރެއިލާ ހިއްސާކުރުމުން އުފަލުން ހުރި ކަމަށާއި އިންޑަސްޓްރީގައި އޭނާ އެކަނިވެރި ނޫންކަމަށް، 4 ފަހަރު ނޭޝަނަލް އެވޯޑް ހޯދާފައިވާ ކަންގަނާ ވަނީ ބުނެފައެވެ.
View this post on Instagram
ކަންގަނާއަކީ އެއްވެސް ޖެހިލުމެއް ނެތި ކޮންމެ މީހަކާ ދިމާއަށްވެސް ބަސްބުނާ، ވަރަށް ގޮތުގައި ހިފަހައްޓާ ތަރިއެއްގެ ގޮތުގައި ފާހަކަ ކުރެވޭ ތަރިއެވެ.
ކަންގަނާގެ އުންމީދީ ފިލްމް "ދާކަޑް" ރިލިޒް ކުރުމަށް ނިންމާފައި ވަނީ މި މަހުގެ 20 ގައެވެ. މި ފިލްމުގެ ލީޑުން ކަންގަނާ ފެނިގެން ދާއިރުގައި މުހިންމު ރޯލަކުން އަރުޖުން ރާމްޕަލް އަދި ދިވްޔާ ދައްތާ ފެނިގެން ދާނެއެވެ.
