މިސްރުގެ ސިނާއީ ޕެނިންސޫލާއާއި އިންވެގެން އޮންނަ ސުވޭސް ކެނަލްއަށް ދޭން އުޅުނު ޓެރަރިސްޓު ހަމަލާއަކާއި ދެކޮޅަށް ހިންގި އޮޕަރެޝަނެއްގައި މިސްރުގެ 11 ސިފައިން މަރާލައިފިއެވެ. މިސްރުގެ އަސްކަރިއްޔާއިން ބުނެފައިވަނީ މި ސަރަހައްދަކީ ޓެރަރިންސްޓުން އެންމެ ގިނައިން ހަރަކާތްތެރިވަމުން ދާ ސަރަހައްދު ކަމުގައެވެ.
މިއީ ސިނާއީ ޕެނިންސޫލާއާއި އަދި އެސަހައްދުގެ ކައިރި ސަރަހައްދުގައި ހަރަކާތްތެރި ވަމުންދާ އައިސިސް ޖަމާއަތުގެ ހަނގުރާމަވެރިންނާއި ދެކޮޅަށް ދިގު މުއްދަތެއްގައި މިސްރުގެ ސިފައިން ހިންގަމުންދާ އޮޕަރޭޝަންތަކުގައި، އަސްކާރިއްޔާގެ އެންމެ ގިނަ އަދަދެއްގެ ސިފައިން މަރުވި ފަހަރެވެ.
މިސްރުގެ އަސްކަރިއްޔާއިން ބުނެފައިވާ ގޮތުގައި، ސުވޭސްކެނަލްގެ އިރުމަތީން، ސިނާއީ އައްސޭރިފަށުގައި ބަދަލު ކުރެވުނު ހަމަލާތަކުގައި މިސްރުގެ ސިފައިންގެ އިތުރު 5 މީހަކަށް އަނިޔާވެސް ވެފައި ވާކަމުގައެވެ. "އަސްކަރިއްޔާއިން ދަނީ، މި ސަރަހައްދުގައި ހަރަކާތްތެރި ވަމުންދާ ޓެރަރިސްޓުން ދުރަށް ޖައްސާ، ސިނާއީގެ ވަކިން އޮންނަ ސަރަހައްދެއްގައި މިމީހުން ވަށާލުމަށް މަސައްކަތް ކުރަމުން،" އަސަކަރިއްޔާއިން އިތުރަށް ބުނެފައި ވެއެވެ.
މިސްރުގެ ރައީސް އަބުދުލް ފައްތާހު އަލްސީސީވަނީ އޭނާގެ ފޭސްބުކްގައި، މަރުވި ސިފައިންނަށް އިހުތިރާމް އަދާކޮށް، ޓެރަރިސްޓުންނާއި ދެކޮޅަށް ކުރާ ހަގުރާމަ ހުއްޓާ ނުލާނެކަމަށް ވިދާޅުވެއެވެ. އަދި އޭނާ ވިދާޅުވެފައިވަނީ، ޓެރަރިޒަމް މުލުން ލުހެލާނެ ކަމުގައެވެ.
މިސްރުގެ ސިނާއީ ސަރަހައްދުގެ ބައެއް އާންމު ރައްޔިތުން ބައެއް މީޑިއާތަކަށް މައުލުމާތު ދީފައިވާ ގޮތުގައި، އެސަރަހައްދުގެ ޕަމްޕިންގ ފެސިލިޓީއެއް ހިމާޔަތް ކުރަމުންދިޔަ ސިފައިންނަށް ހަމަލާ ދިނުމަށްފަހު ހަނގުރާމަވެރިންވަނީ، ސިނާއީ ސަރަަހައްދުގެ ޖަންގަލިތަކުގެ ތެރެއަށް ވަދެ ފިލާފައެވެ.
މިހަމަލާގެ ޒިންމާ އެއްވެސް ގުރޫޕަކުން އަދި އުފުލާފައެއް ނުވެއެވެ.
މިސްރުގެ ސިނާއީ ޕެނިންސޫލާއަކީ ފާއިތުވެދިޔަ 10ވަރަކަށް އަހަރު ތެރޭގައިވެސް ހަގުރާމަވެރިންގެ ހަރަކާތްތެރި ވަމުންދާ ސަރަހައްދެކެވެ. އަދިއެގައުމުގެ ރައީސް މުރުސީ 2013ވަނަ އަހަރު މަގާމުން ދުރު ކުރެވުނުފަހުން މިސަރަހައްދުގައި ދެމުންދާ ހަމަލާތައް ވަނީ އިތުރު ވެފައެވެ.
ކޮމެންޓު ފޮނުވާ