ހުނަރުވެރި ޑައިރެކްޓަރު އިލްޔާސް ވަހީދު (އިއްލެ)، ބެލުންތެރިިންނަށް ގެނެސްދޭން ތައްޔާރުވަމުން އަންނަ ސީރީޒް "ބިރުވެރި ވާހަކަ"ގެ ޕްރޮމޯޝަނަލް ލަވަ "ޝައިތޯނާ" ދައްކާލައިފިއެވެ.
އިއްލެގެ އައި ފިލްމްސް އިން ނެރެން ތައްޔާރުވަމުން އަންނަ "ޝައިތޯނާ"ގެ ޕޯސްޓަރެއް މީގެ ކުރިން ވަނީ އާންމު ކޮށްފައެވެ. އެއާއެކުވެސް "ޝައިތޯނާ"ގެ ތަފާތު ކަން ވަރަށް ބޮޑަށް އެނގިގެން ގޮސްފައިވެއެވެ.
ވަރަށް ތަފާތު ގޮތަކަށް ވީޑިއޯ ގެނެސްދީފައިވާ މި ލަވަ ކިޔާފައި ވަނީ އަންދަލާ ހަލީމެވެ. ލަވައިގާ އޭނަ ވަރަށް ތަފާތުކޮށް ޕްރެޒެންޓްކޮށްދީ، ސީރީޒްގެ އެކިއެކި މަންޒަރުތައް ވެސް ވީޑިއޯގެ ތެރެއިން ގެނެސްދީފައި ވެއެވެ.
ސީރީޒްގެ ފުރަތަަމަ ލަވަ "ޝައިތާނާ" އާންމު ކުރި ނަމަވެސް، "ބިރުވެރި ވާހަކަ"ގެ އެޕިސޯޑުތައް ދައްކާނެ ވަކި ދުވަހެއް ހާމަ ކޮށްފައެއް ނުވެއެވެ.
ދިރާގު ޓީވީން މި ސިލްސިލާ ޑްރާމާ ގެނެސްދެން ނިންމާފައިވާއިރު، އިއްލެގެ ހިޔާލީ ވާހަކައެއްގެ މައްޗަށް ބިނާކޮށްފައިވާ މި ސީރީޒްގައި ޖުމުލަ 15 އެޕިސޯޑް ހިމެނެއެވެ.
މި ސީރީޒްގައި އާ ދެތިން މޫނުގެ އިތުރުން އިންޑަސްޓްރީގައި މިހާރުވެސް މަސައްކަތް ކުރަމުންދާ ފަންނާނުން ކަމަށްވާ މަރްޔަމް އައްޒަ، ނުޒުހަތު ޝުއައިބް، ޝަރަފް، އަދި އައިޝަތު ރިޝްމީވެސް މި ސީރީޒްގެ އެޕިސޯޑުތަކުން ފެނިގެންދާނެއެވެ.
އިއްލެއަކީ އޭނާގެ އައި ފިލްމްސް އިން 2019ގެ ސައިކޮލޮޖިކަލް ތުރިލާ "ބަވަތި" ގެނެސްދީގެން އާންމުންގެ ސަމާލުކަން ހޯދި ޑައިރެކްޓަރެވެ. އެއާއެކުގައި އޭނާގެ ހުރިހާ މަސައްކަތެއްވެސް ވަރަށް ތަފާތުވެފައި މޮޅު، ކުޅަދާނަ ޑައިރެކްޓަރެއްކަން ވަނީ ސާބިތު ކޮށްދީފައެވެ. އޭނާގެ ކުރިއަށް އޮތް ފީޗާ ފިލްމަކީ "ނީނާ" އެވެ.
