މިއަހަރު އެންމެ ކުލަގަދަކޮށް އީދު ފާހަގަ ކުރަމުންދާ މާފުށީގެ އީދު ހަރަކާތްތަކުގައި ސްޓެލްކޯއިންވެސް ބައިވެރި ވެއްޖެއެވެ.
މާފުށީގައި ހިންގާ އެކި ހަރަކާތްތަކުގައި ސްޓެލްކޯގެ އިސްވެރިންވެސް ދަނީ ބައިވެރިވަމުންނެވެ. އެގޮތުން ކުންފުނީގެ މެނޭޖިންޑިރެކްޓަރ އަހުމަދު ޝަރީފާއި، ގިނަ އަދަދެއްގެ މުވައްޒިފުންވެސް ދަނީ ބައިވެރިވަމުންނެވެ. ސްޓެލްކޯގެވެސް އެހީތެރިކަމާއިއެކު ކުރިއަށް ގެންދާ މިއީދުގައި ރައީސުލްޖުމްހޫރިއްޔާވެސް ބައިވެރިވެ ވަޑައިގަންނަވައެވެ.
މާފުށީގެ ހިތްގައިމު މާހައުލުން ރައީސް އިބްރާހިމް މުހައްމަދު ޞާލިހު އާާއިއެކު ފިތުރު އީދު ފާހަގަކުރުން. އިޖުތިމާއީ ގުޅުންތައް ބަދަހިކޮށް ރަށުފެންވަރުގައި ފާހަގަކުރާ މިފަދަ ހަރަކާތްތަކަށް އެހީތެރިވެދީ، މިކަންކަމުގައި އަމަލީގޮތުން ބައިވެރިވުމަކީ އަޅުގަނޑުމެންނަށް ލިބޭ އުފަލެއް.
– ސްޓެލްކޯއިން ބުނެފައެވެއެވެ.
މާފުށީގެ ހިތްގައިމު މާހައުލުން ރައީސް @ibusolih އާާއިއެކު ފިތުރު އީދު ފާހަގަކުރުން. އިޖުތިމާއީ ގުޅުންތައް ބަދަހިކޮށް ރަށުފެންވަރުގައި ފާހަގަކުރާ މިފަދަ ހަރަކާތްތަކަށްއެހީތެރިވެދީ، މިކަންކަމުގައި އަމަލީގޮތުން ބައިވެރިވުމަކީ އަޅުގަނޑުމެންނަށް ލިބޭ އުފަލެއް. pic.twitter.com/c7Va0wde8G
— STELCO (@STELCOMALDIVES) May 2, 2022
މިއަހަރުގެ ޢީދު މާފުށީގައި ކުލަގަދަކޮށް ފާހަގަކުރުމަށް ކައުންސިލުން ވަނީ ތަފާތު ހަރަކާތްތަކެއް ހިންގުމަށް ރާވާފައެވެ. އެގޮތުން ޢީދުގެ ހަރަކާތްތައް ފެށިގެން ދިޔައީ ޓާފްދަނޑުގައި ބޮޑު ޖަމާޢަތުގައި ބޭއްވުނު ޢީދު ނަމާދުންނެވެ. ޢީދު ނަމާދުގައި ގިނަ ޢަދަދެއްގެ ރައްޔިތުން ވަނީ ބައިވެރިވެފައެވެ. އެއަށްފަހު މިއަދު ހެނދުނު ރަށުގެ ރައްޔިތުންނަށް ހުޅުވާލެވިގެން ހެނދުނުގެ ސައެއް ސްކޫލުގައި ކުރިއަށްގެންގޮސްފައިވެއެވެ.
މީގެ އިތުރުން ޢީދާއި ގުޅިގެން ކުލަޖެހުމާއި ފެން ޖެހުމާއި، އެކި ކަހަލަ ބީޗު ކުޅިވަރުތައް މިއަދު ހެނދުނާއި މެންދުރު ވަނީ ކުރިއަށްގެންގޮސްފައެވެ. މި ހަރަކާތްތަކުގައި ރަށުގެ އެކި އުމުރުފުރާގެ މީހުންގެ އިތުރުން ރަށަށް ޗުއްޓީހޭދަކުރުމަށްގޮސް ތިބި ފަތުރުވެރިންނާއި، އަދި ރަށުން ބޭރުން ޢީދުގެ ހަރަކާތްތަކުގައި ބައިވެރިވުމަށް މާފުއްޓަށް ދިޔަ ދިވެހިންވެސް ބައިވެރިވެފައިވެއެވެ.
މިއަހަރުގެ ޢީދުގެ ހަރަކާތްތަކަކީ ކާމިޔާބު ހަރަކާތްތަކެއްގެ ގޮތުގައި މާފުށީ ކައުންސިލުން ފާހަގަކުރެއެވެ. އެގޮތުން ޢީދަށް މާލެއިންނާއި ކައިރި ރަށްރަށުން ގިނަ ޢަދަދެއްގެ ދިވެހިން މާފުއްޓަށް އަދިވެސް އަންނަމުންދާކަމަށާއި، ގިނަ ގެސްޓް ހައުސްތަކުގެ ބުކިންތައްވެސް ފުލްވެފައިވާކަމަށް ކައުންސިލުން ވިދާޅުވެއެވެ.
ފިޠުރު ޢީދު ފާހަގަކުރުމަށް މާފުށީގައި މިރޭ ޚާއްސަ ޢީދު ޝޯވއެއްވެސް އޮންނާނެއެވެ. މި ޝޯވގައި ބޮޑުބެރުގެ ހަރަކާތްތަކާއި، މުނިފޫހިފިލުވުމުގެ ތަފާތު ހަރަކާތްތައް ކުރިއަށްގެންދިއުމަށް ވަނީ ހަމަޖެހިފައެވެ. އަދި މިރޭ މާފުށީގައި ހަވާ އެރުވުމަށްވެސް ހަމަޖެހިފައިވެއެވެ.
