ބޮލީވުޑްގައި ބޮޑު ކުރިއެރުމެއް ހޯދަމުން އަންނަ އެކްޓްރެސް ޝްރައްދާ ކަޕޫރު ބޭނުން ވަނީ އޭނާގެ ބައްޕަ ޝަކްތީ ކަޕޫރާއި އެކުގައި ކޮމެޑީ ފިލްމެއް ކުޅެލަށް ކަމަށް އޭނާ ބުނެފިއެވެ.
"އާޝިގީ 2″، "ހައިދަރް"، "އޭބީސީޑީ" ފަދަ ފިލްމްތަކުގައި މޮޅު އެކްޓިންއެއް ދައްކާފައިވާ ބަތަލާ އީ ޓައިމްސްއާ ވާހަކަދައްކަމުން ބުނެފައި ވަނީ ބައްޕަ އާއެކު ހެއްވާ މަޖާ ފިލްމެއް ކުޅެލަން ބޭނުން ވާކަމަށެވެ.
ޝްރައްދާގެ ބައްޕަ ޝަކްތީއަކީ ވެސް ބޮލީވުޑްގެ ގިނަ ފިލްމުތަކެއް ކުޅެ އާންމުންގެ ލޯބި ހޯދާފައިވާ އެކްޓަރެކެވެ. އޭނާއަކީ ހެއްވާ މަޖާ ބައިތަކުން ބެލުންތެރިން ހެއްވާލާ ކުޅަދާނަ އެކްޓަރެކެވެ.
ޝްރައްދާ ބުނީ އޭނާގެ ބައްޕައަކީ ވަރަށް މަޖާ މީހެއް ކަމަށާއި ގޭގައިވެސް އަބަދުވެސް ކޮންމެވެސް މަޖާ ވާހަކައެއް ދައްކައިގެން އެންމެން ހެއްވާލާކަމަށެވެ. ނަމަވެސް ޝަކްތީ މިހާރު ފިލްމީ މަސައްކަތަކުން ނުއެއް ފެނެއެވެ. އެހެންކަމުން ޝްރައްދާގެ މި އުންމީދު ފުރިހަމަވާނެ ތޯ އެއީ ކުރެވޭ ސުވާލެކެވެ.
ޝްރައްދާ ކަޕޫރު ބޮލީވުޑަށް ތައާރަފްވީ ފިލްމު "ތީން ޕައްތީ" އިން 2010 ވަނަ އަހަރުއެވެ. އޭނާ އެންމެ ފަހުން ފެނިގެން ގޮސްފައިވަނީ ޓައިގާ ޝްރޮފް އާއެކު "ބާގީ 3″ އިންނެވެ.
ކޮމެންޓު ފޮނުވާ