ދުނިޔޭގެ އެންމެ ދުވަސްވީ މީހާހެ ރެކޯޑް އޮތް، ޖަޕާންގެ ކަނެ ޓަނަކާ މި ހަފްތާގެ ހޯމަ ދުވަހު މަރުވުމާއި ގުޅިގެން، ދުނިޔޭގައި މިހާރު ހުރި އެންމެ ދުވަސްވީ މީހާގެ ރެކޯރޑް، ފްރާންސްގެ އުމުރުން 118 އަހަރާއި 73 ދުވަސްވީ، ސިސްޓަރ އަންޑްރޭ (އަސްލު ނަމަކީ ލޫސިލް ރަންޑޮން) އަށް ގިނެސް ވާރލްޑް ރެކޯރޑްސްގެ ފަރާތުން އަރުވައިފިއެވެ.
ފްރާންސްގައި، 1904ވަނަ އަަހަރުގެ ފެބްރުއަރީމަހުގެ 11 ވަނަ ދުވަހު އުފަންވީ ލޫސިލް އޭނާގެ ނަމެއްގެ ގޮތުގައި ސިސްޓްރ އަންޑްރޭގެ ނަން އިޚްތިޔާރު ކޮށްފައިވަނީ 1944 ވަނަ އަހަރުއެވެ. އަދި އޭނާއަކީ ފްރާންސްގައި ތިންވަނައަށް އެންމެ ދިގު މުއްދަތަކަށް ދުނިޔޭގައި ހުރި މީހާގެ އިތުރުން އޭނާ ހިމެނިގެން ގޮސްފައިވަނީ ޔޫރަޕްގައިވެސް ތިންވަނައަށް އެންމެ ދިގު މުއްދަތަކަށް ދުނިޔޭގައި ދިރިއުޅެމުންދާ މީހާކަމުގައިވެސް މެއެވެ.
ސިސްޓަރ އަންޑްރޭއަކީ އޭނާގެ ޅަ އުމުރުގައި ޓީޗަރެކެވެ. އޭނާ ކިޔަވާދީފައިވަނީ އަމިއްލަ ސްކޫލެއްގައި ކުޑަ ކުދިންނަށެވެ. އެއީ ދުނިޔޭގެ ދެވަނަ ބޮޑު ހަނގުރާމައިގެ ތެރޭގައެވެ.
އަދި ދެވަނަ ބޮޑު ހަނގުރާމައަށްފަހު، 28 އަހަރު ވަންދެން އޭނާ މަސައްކަތް ކޮށްފައިވަނީ، ފްރާންސްގެ އަވާންޖް ރޮން އަލްޕްސް ރީޖަންގެ ވިޗީގައި ހުންނަ ހޮސްޕިޓަލެއްގައި ޔަތީމު ކުދިންނާއި މުސްކުޅިން ބެލެހެއްޓުމުގައެވެ. އެއަށްފަހު އޭވާނީ ކެތޮލިކް ނަން (އަޅުކަމާއި އެހީތެރިކަން ފޯރު ކޮށްދިނުމަށް އެކަނި ޚާއްސަވާ، ކުރިސްޓިއަން ދީނު އެންހެނުން) އަކަށް ބަދަލު ވެފައެވެ.
އޭނާގެ ހަޔާތުގެ ބޮޑުބައި ދީނީ އަޅުކަމުގައި ހޭދަކޮށްފައިވާ ސިސްޓަރ އަންޑްރޭ އަކީ މިހާރު ދުނިޔޭގައި ހުރި، އެންމެ ދުވަސްވީ ކެތަލިކް ނަންވެސް މެއެވެ.
2019ވަނަ އަހަރު އޭނާއަށްވަނީ، އޭނާ ދިރިއުޅެމުންދާ ސިޓީ ކަމުގައިވާ، ޕްރޮވެންސް އަލްޕްސް ކޯޓް ޑީ އަޒޫރު ރީޖަންގެ ޓޯލަންއިން ޝަރަފްވެރި ރައްޔިތެއްގެ ހައިސިއްޔަތު އަރުވާފައެވެ. އަދި ކުރިންޓިއަން ދީނުގެ އިސް ފާދިރީ ޕޯޕޮ ފްރާންސިސްގެ ފަރާތުން އޭނާއަށް ޚާއްސަ ސިޓީއެއްވެސް އަރުވާފައި ވެއެވެ.
ދާދި ފަހުން، ސިސްޓަރ އަންޑްރޭއަށްވަނީ، ކޯވިޑް19 އަށް ޕޮޒިޓިވްވެ، ދުނިޔޭގައި ހުރި އެންމެ ދުވަސްވީ މީހާގެ ރެކޯޑްވެސް ލިބިފައެވެ. 1918ވަނަ އަހަރު ދުނިޔެއަށް އާންމު ސްޕެނިޝް ފުލޫއަށްވެސް އޭނާއަށް ޖެހިފައިވެއެވެ. އޭނާ ކޯވިޑް19އަށް ޕޮޒިޓިވްވީ 2021ވަނަ އަހަރުގެ ޖެނުއަރީމަހުގެ 16ވަނަ ދުވަހުއެވެ. ކޯވިޑް19އަށް އޭނާ ޕޮޒިޓިވް ވުމާއެކު، އެކިހެރިކޮށް އޭނާގެ ރިޓަޔަމަންޓް ގޭގައި ބަހައްޓާއިގެން ފަރުވާ ދީފައި ވެއެވެ.
މިހާރު އުމުރުން 118 އަހަރުގައި ސިސްޓަރ އަންޑްރޭ ވަނީ ކޮންމެވެސް ވަރަކަށް ބީރު ވެފައެވެ. އެހެންނަމަވެސް އޭނާގެ ސިނކުޑި ރަގަޅަށް ދަނީ މަސައްކަތް ކުރަމުންނެވެ.
