ޤައުމީ އެއަރލާއިންމޯލްޑިވިއަން ބަނގުރޫޓިވި ވާހަކައަކީ ޔުނިވާސިޓީތަކުގައި ދިވެހި ދަރިވަރުންނަށް ކިޔަވައިދޭންޖެހޭ މުހިންމު ފިލާވަޅެއްކަމަށް އައިލެންޑް އޭވިއޭޝަންގެ ކުރީގެ ޑިރެކްޓަރ އޮފް އޮޕޮރޭޝަންސް ކެޕްޓަން މުހައްމަދު އަމީން ވިދާޅުވެއްޖެއެވެ. އަމީން މިހެން ވިދާޅުވީ، ސަރުކާރުން ގާތް މީހުންނަށް ބައި އަޅަން ހަދައިގެން މިތިބީ "ބޮޑި ބޮއިފައި" ކަމަށް ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވި ވާހަކަފުޅާއި ގުޅިގެންނެވެ.

ޤައުމީ އެއަރލާއިން މޯލްޑިވިއަންއަށް ފާޑުވިދާޅުވެ ކެޕްޓަން އަމީން ވިދާޅުވީ، ރައީސް ނަޝީދުގެ އެ ވާހަކަފުޅަކީ ތެދުފުޅެއްކަމަށެވެ. މޯލްޑިވިއަންގެ ބޭންކުރަޕްސީ އަކީ ރަނގަޅު ދިރާސާއަކަށްފަހު ޔުނިވާސިޓީތަކުގައި ދިވެހި ސަރިވަރުންނަށް ކިޔަވާދޭންޖެހޭ މުހިންމު ފިލާވަޅެއްކަމަށެވެ. މޯލްޑިވިއަން އެއަރލައިން ޤުރުބާންކޮށް ބަނގްރޫޓްވީ ރައީސްގެ އާއިލާއަށް ޓަކައިކަމަށްވެސް އަމީން ވިދާޅުވިއެވެ.

ޤައުމީ އެއަރލައިން ހިންގާ މޯލްޑިވިއަނަށް މާލީ ބޮޑެތި މައްސަލަތަކެއް ދިމާވެފައިވާކަމަށް ބައެއް ފަރާތްތަކުން ވަނީ ބުނެފައެވެ. މިގޮތުން ކޯވިޑާއި ގުޅިގެން ޕައިލެޓުންގެ މުސާރައިން އުނިކުރި ބައި އިއާދަކޮށްދިނުން ލަސްވެގެން ޕައިލެޓުން ވަޒީފާއަށް ނިކުންނަށްވެސް އުޒުރުވެރިވިއެވެ. ނަމަވެސް ސަރުކާރުން ފަހުން ވަނީ ޕައިލެޓުންނާއި ވާހަކަދައްކައިގެން އެ މައްސަލަ ހައްލުކޮށްފައެވެ.

މޯލްޑިވިއަނުން އެތެރޭގެ އުދުހުންތަކުގައި ފަސިންޖަރުންނަށް ދޭ ބުއިންތައްވެސް ދާދިފަހުން ހުއްޓާލާފައިވެއެވެ. މޯލްޑިވިއަން ދަރަނިވެރިވެ ކޮންޓްރޯލް ގެއްލިފައިވާކަމަށް މޯލްޑިވިއަންގެ ކުރީގެ ބައެއް މުވައްޒަފުންވެސް ވިދާޅުވެއެވެ.