ބޮލީވުޑުގެ ޒުވާން އެކްޓްރެސް ޕަރީނިތީ ޗޯޕްރާ އަކީ ފިލްމީ ދާއިރާއަށް ވަނުމުގެ ކުރިން ހަށިގަނޑު ފަލަ، ބަރު ކުއްޖެކެވެ. ކެއުމަށް ފޯރިހުންނަ، ކަސްރަތުކުރާ ހިތް ނުވާ، ޕަރީނިތީ ހިކުނުގޮތުގެ ވާހަކައިން ފަހަރުގައި އަހަރެމެންތެރޭގައި އުޅޭ ކަސްރަތުކުރަން ބޭނުންނުވާ ކުދިންނަށް އިބުރަތެއް ލިބިދާނެއެވެ.

ނެށުމާއި މޫދަށް ދިއުމަށް ޝައުޤުވެރިކަން ހުންނަ ޕަރީނިތީ ކަސްރަތު ކުރުމުގެ ބަދަލުގައި ކުރަނީ މިކަންކަމެވެ. ކޮންމެ ދުވަހަކު ފެތުމާއި ނެށުމުން އޭނަގެ ހަށިގަނޑަށް ބެނުންވާ ކަސްރަތު ހޯދައެވެ. އިތުރަށް އޭނާ ޔޯގާއަށް ވަގުތުކޮޅެއް ހޭދަކުރާއިރު ކެއުމުގެ ވައްޓަފާޅިއަށްވެސް ކޮންމެވެސް ވަރެއްގެ ބަދަލެއް ގެނައެވެ.

ޕަރީނިތީ ބުނާގޮތުގައި ނުކައި ހުރުމަކީ އޭނާއަށް ކުރަން ވަރަށް އުނދަގޫކަމެކެވެ. އެހެން ނަމަވެސް ކެއުމަށްޓަކައި ބެނުންކުރެވޭ ބައެއްތަކެތި އޭނާ ބަދަލުކުރިއެވެ. އޭނާގެ ކެއުމުގައި ހަށިގަނޑަށް ފައިދާހުރި ތަކެތި ހިމަނާލާ ކެލޮރީސް ނައްތާލާފަދަ ކާނާ އިތުރުކުރިއެވެ. ޕެކެޓްކުރި ކާނާގެ އިތުރުން ފޮނިތަކެތި މަދުކޮށް ޕްރޮޓީން ގިނަ ބިހުގެ ހުދުބަޔާއި ކިރު ފަދަ ތަކެތި އިތުރުކުރިއެވެ.

ޕަރީނިތީ ކެއުމާއި ބުއިމަށް އާއްމުކޮށް ބޭނުންކުރާ ކާނާތައް ހިއްސާކުރަމުން އޭނާ ބުނެފައިވަނީ މުޅިންވެސް ބޮނީ ޝުގަރ ފްރީ ކިރު އަދި ޖޫސް ކަމަށެވެ. އަދި ބޮޑެތި ކެއުންތަކުގައި ބުރައުން ބަތާއި ބުރައުން ބުރެޑް ބޭނުންކުރާއިރު އެއްވެސް ވަރަކަށް ހުދު ހަނޑޫ އަދި ހުދު ޕާން ނުކާކަމަށް ޕަރީނިތީ ބުނެއެވެ. އަދި އެންމެ ހާއްސަ ކަމެއްގެ ގޮތުގައި އޭނާ ފާހަގަކުރީ ރޭގަނޑުގެ ކެއުން ލަސްވެގެން 8 ޖެހުމުގެ ކުރިން ކެއުމެވެ.

ޕަރީނިތީއަކީ ބޮލީވުޑާ ގުޅުނު ހިސާބުން ފެށިގެން މިއަދާ ހަމައަށްވެސް ހަށިގަނޑު އެއް ހަމައަކަށް ބަހައްޓާ ކުޅަދާނަ ތަރިކެވެ. ގޯލްމާލް އެގެއިން، ޖަބަރިޔާ ޖޯޅީ، އިޝްގްޒާދޭ ފަދަ މަޝްހޫރު ފިލްމުތަކުން ޕަރީނިތީ ވަނީ ފެނިގެން ގޮސްފައެވެ.