މާލޭގެ ހުރިހާ މަގުތަކުގައި ހުރި ސްޕީޑް ބްރޭކަރުތަކުގައި ދަވާދު އާކޮށް ނިންމައިފައިވާކަމަށް މާލެ ސިޓީ ކައުންސިލުން ބުނެފިއެވެ.

މާލޭގެ ގހުރިހާ ސްޕީޑް ބްރޭކަރެއްގައި ދަވާދު އައުކޮށްފައި މިވަނީ މާލެ ސިޓީގެ އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ މެންބަރަކު ހުޅުމާލެ ސްޕީޑް ބްރޭކަރެއްގެ ކުލަ ފަނޑުވެފައި ވަނިކޮށް ކަހާލައިގެން ވެއްޓި ނިޔާވެފައިވަނިކޮށެވެ. މިއާއެކު މާލެ ސިޓީ ކައުންސިލުން ވަނީ ކުލަ ފަނޑުވެފައިވާ ހުރިހާ ސްޕީޑް ބްރޭކަރެއްގައި ކުލަ އައުކުރަން ފަށާފައެވެ.

ސްޕީޑް ބްރޭކަރުތަކުގެ މަސައްކަތް ތަފްޞީލް ކޮށްދެއްވަމުން ކުރެއްވި ޓްވީޓެއްގައި މާލެ ސިޓީ ކައުންސިލްގެ އާއްމު ޚިދުމަތްތަކާއިބެހޭ މަސައްކަތްތަކާއި ހަވާލުވެ ހުންނެވި ކައުންސިލަރު އާދަމް ރަމީޒް ވިދާޅުވީ ސްޕީޑް ބްރޭކަރުތަކުގައި ދަވާދު އާކުރުމުގެ މަސައްކަތުގެ ތެރެއިން އަލަށް ހެދުނު ސްޕީޑް ބްރޭކަރު ހިމަނައިގެން 323 ސްޕީޑް ބްރޭކަރުގައި ވަނީ ދަވާދު އާކޮށް ނިމިފައި ކަމަށެވެ.

މާލެ ސިޓީގެ މަގުތަކުގައިހުރި ހުރިހާ ސްޕީޑް ބްރޭކަރުތަކުގައި ދަވާދު އާކޮށް ނިމިއްޖެ. އަލަށް ހެދުނު ބްރޭކަރާއިއެކު ޖުމްލަ 323 ސްޕީޑް ބްރޭކަރު ގެ ދަވާދު އާކޮށް 103 ރޭމްޕް ވަނީ ހެދިފަ. pic.twitter.com/JrZvs9JmcX

— Adam Rameez ( Ramy ) (@AdamRamyz) April 1, 2022

މީގެ އިތުރުން ޚާއްސަ އެހީއަށް ބޭނުންވާ ފަރާތްތަކަށް ރޭމްޕް ހެދުމުގެ މަސައްކަތްތައްވެސް ދަނީ ކާމިޔާބު ކަމާއެކު ކުރެވެމުންނެވެ. އެގޮތުން މާލެ ސިޓީ ކައުންސިލްގެ 4 ވަނަ ދައުރު ފެށުނުފަހުން މިއަދާއި ހަމަޔަށް މުޅިން އަލަށް 103 ރޭމްޕް ހެދިފައިވާ ކަމަށްވެސް ރަމީޒް ގެ ޓްވީޓްގައި ވިދާޅުވިއެވެ.

މަގުތަކުގައި ރޭމްޕް ހެދުމުގެ މަސައްކަތުގެ ތެރެއިން.

މި މަސައްކަތްތަކާއި ގުޅޭގޮތުން މާލެ ސިޓީ ކައުންސިލްގެ އާއްމު ޚިދުމަތްތަކާއިބެހޭ މަސައްކަތްތަކާއި ހަވާލުވެ ހުންނެވި ކައުންސިލަރު އާދަމް ރަމީޒް ވިދާޅުވީ މިއީ ބުރަ މަސައްކަތް ތަކެއް ނަމަވެސް މުވައްޒަފުންގެ ހިތްވަރާއި އެކު ރޯދައިގެ ކުރިން މިކަން ނިންމާލެވުމަކީ ވަރަށްބޮޑު ހިތްހަމަ ޖެހުމެއްކަމަށެވެ.