އަންނަ މަހުން ފެށިގެން ހިޔާ މަޝްރޫއުގެ އެއްމެދު އިމާރާތްތަކުގެ ފުލެޓުތަކުން އުކާލާ ގާކުނި އަދި އެފަދަ ކުނިތައް ނެގުމުގެ އިންތިޒާމުތަކަށް ބަދަލުތަކެއް އަންނާތީ އެކަމަށް ސަމާލުވުމަށް އެޗްޑީސީން އިލްތިމާސްކޮށްފިއެވެ.
ހިޔާ 7000 މަޝްރޫއުގެ ފުލެޓުތަކުގެ އެތެރޭގެ މަސައްކަތްތައް ކުރުމުގެ އުސޫލުގައި ބަޔާން ކުރެވިފައިވާ ފަދައިން، ހިޔާ ފުލެޓު ތަކުގައި މަސައްކަތް ކުރަމުންދާ ގޭބިސީން އުފެދޭ ގާކުނި އަދި އެފަދަ އެހެނިހެން ކުނި އުކުމަށް ޚާއްސަ ސަރަހައްދެއް ކަނޑައެޅި، އެކުނިތައް އުކާލުމުގެ އިންތިޒާމް މިހާތަނަށް ބަލަހައްޓަމުން ގޮސްފައިވަނީ އެޗްޑީސީ ފަރާތުންނެވެ.
ނަމަވެސް، މިމަހުގެ 31 އިން ފެށިގެން މިމަސައްކަތް ހުއްޓާލުމަށް އެޗްޑީސީން ވަނީ ކަނޑައަޅާފައެވެ. އަދި އަންނަ މަހުގެ 1 އިން ފެށިގެން މި ޒާތުގެ ކުނި އުކާލަންޖެހޭނީ އެ ފުލެޓެއްގެ ވެރިފަރާތުން އެކަމަށް ޚާއްސަ ކުރެވިފައިވާ މުއައްސަސާ ތަކާއި ގުޅިގެން ކަމަށް އެޗްޑީސީން ވަނީ ބުނެފައެވެ.
އެހެން ކަމުން އަންނަ މަހުގެ 1 އިން ފެށިގެން މިހާތަނަށް ކުނި އަޅަމުންދިޔަ ސަރަހައްދުތަކަށް ކުނި އެޅުމަކީ މަނާ ކަމެއް ކަމަށް އެޗްޑީސީން ވަޏީ ބުނެފައެވެ. މީގެ އިތުރުން، ފުލެޓުތަކުގައި މަސައްކަތް ކުރަމުން ގެންދާ ފަރާތްތަކުން މިމަހުގެ 31 ގެ ކުރިން އެޗްޑީސީން ކަނޑައަޅާފައިވާ ސަރަހައްދުތަކަށް ކުނި ޖަމާކުރުމަށް ވަނީ އިލްތިމާސް ކޮށްފައެވެ.
