ހިޔާ މަޝްރޫއުގެ ދަށުން ހުޅުމާލޭ ދެވަނަ ފޭސްގައި އިމާރާތްކޮށްފައިވާ ހިޔާ ޓަވަރުތަކަށް ބަދަލު ގެނައުމަކީ ވެފައިވާ އެއްބަސްވުމާއި، ގަވާއިދާއި ޚިލާފް ކަމެއްކަމަށް އެޗްޑީސީން ބުނެފިއެވެ.
އެޗްޑީސީން ނެރުނު ބަޔާނެއްގައި ބުނެފައިވަނީ ވެށިފަހިމާލެ މަޝްރޫޢުގެ ދަށުން ހުޅުމާލޭގައި ތަރައްޤީކުރެވިފައިވާ ފުލެޓުތަކަށް އެކޯޕަރޭޝަންގެ ހުއްދަނެތި ބަދަލު ގެނައުމާއި ގުޅޭ ވެށިފަހިމާލެ ޕްރޮގްރާމްގެ ދަށުން ހުޅުމާލޭގައި ތަރައްޤީ ކުރެވިފައިވާ ފުލެޓުތަކަށް އެކޯޕަރޭޝަންގެ ހުއްދައާއި ނުލާ ބަދަލު ގެންނަމުން ދާކަމަށް ފާހަގަ ކުރެވިފައިވާކަމަށެވެ.
ފާހަގަ ކުރެވިފައިވާ ކަންކަމުގެ ތެރޭގައި:
l. ބެލްކަނީ އަށް ބަދަލު ގެނެސް ބެލްކަނީ އިތުރަށް ފުޅާކުރުން.
2. ބިންމަތީ ފުލެޓުން އިމާރާތުގެ ކުރިމައްޗަށް ދޮރެއް ހަދައި، އިމާރާތުގެ ކުރިމަތިން ފުލެޓަށް ވަދެވޭނެ ގޮތް ހެދުން.
3. ފުލެޓުގެ އެތެރޭ ފާރަށް ބަދަލު ގެނެސް، އެއްކޮޓަރިއާއި އަނެއް ކޮޓަރި ގުޅުވާލުން. މީގެތެރޭގައި ސިޓިންގރޫމުން ކޮމަން ފާޚާނާ އަށް ވަދެވޭ ގޮތަށް ދަރު ހަރުކުރުން ހިމެނެއެވެ.
4. ފުލެޓުގެ އެތެރޭގައި ޑެގުއަޅައިގެން، ނުވަތަ ޕާޓިޝަން ޖަހައިގެން އިތުރު ކޮޓަރި ހެދުން.
5. ދެވަނަ ފަންގިފިލާއިން މަތީ ފަންގިފިލާތަކުގައި ސީލިންގ ހެދުން. މިކަމުގެ ސަބަބަބުން ދެންނެވުނު ފަންގިފިލާގެ ޝީޓުގައި
ރެނދުއެޅުންފަދަ ކަމެއްވެއްޖެމަނަ ސީލިންގެ ސަބަބުން އެފަދަ ކަންކަން ދެނެގަތުމަށް ހުރަސްއެޅެއެވެ.
6. ފުލެޓުގައި ޖަހާފައިވާ ތަށިމުށުގެ މަތިން އައު ތަށިމުށި ޖެހުން.
ވެށިފަހިމާލެ ޕްރޮގްރާމްގެ ދަށުން ތަރައްޤީކޮށްފައިވާ އިމާރާތްތައް ފަރުމާކުރެވިފައިވަނީ އިމާރާތުގެ ބަރުމިން ވަކި މިންގަނޑަކަށް ފެތޭގޮތަށް ހެދިފައިވާ ލޯޑް ކަލްކިއުލޭޝަނަށް ބިނާކޮށް ކަމަށާއި، އަދި އިމާރާތަށް މިފަދަ ބަދަލުތައް ގެނައުމަކީ އިމާރާތުގެ ސްޓްރަކްޗަރ އަށް ގެއްލުންލިބި، އިމާރާތުގެ އުމުރު ކުރުވުމަށް މެދުވެރިވެދާނެ ކަމެއްކަމަށް އެޗްޑީސީން ބުނެއެވެ. އަދި މީގެއިތުރުން، އިމާރާތް ފަރުމާކުރެވިފައިވަނީ އިމާރާތުގަޔާއި، ފުލެޓުތަކުގައި ވައި ދައުރުވުމާއި، ވަދެނިކުތުމާއި، ފުލެޓުގައި ދިރިއުޅެވޭނެ މީހުންގެ އަދަދާއި، އެފަރާތްތަކަށް ލިބެންޖެހޭ އަސާސީ ޚިދުމަތްތަކާއި ވާޞީލަތްތަކާއި ބެހޭގޮތުން ސަރުކާރުން ހަދާފައިވާ މިންގަނޑުތަކާއި ޤަވާއިދުތަކާއި އެއްގޮތަށްކަމަށެވެ. އެހެންކަމުން މިފަދަ ބަދަލު ގެނައުމަކީ ކަމާބެހޭ ޤަވާއިދުތަކާއި ޚިލާފު ކަމެއްކަމަށް އެޗްޑީސީން ވަނީ ބުނެފައެވެ.
ބައެއް ފުލެޓުގެ އެތެރެއަށް ގެނެވޭ ބަދަލުތަކުގެ ސަބަބުން ދިމާވާ މައްސަލަތަކުގެ ސަބަބުން އަވަށްޓެރި ފުލެޓުތަކަށް އެކަމުގެ އަސަރު ކޮށް، ގެއްލުން ލިބެމުން ދާކަމަށް މަޢުލޫމާތު ލިބެމުންދާކަމަށާއި، އަދި އެޗްޑީސީގެ ހުއްދައާއި ނުލާ މިފަދަ ބަދަލުތައް ގެނައުމަކީ ފުލެޓު ލިބިފައިވާ ފަރާތްތަކުން އެކޯޕަރޭޝަނާއިއެކު ވެފައިވާ އެއްބަސްވުމާއި ޚިލާފު ކަމެއްކަމުގައި އެޗްޑީސީން ވަނީ ބުނެފައެވެ. މިފަދަ ބަދަލުތައް ގެނެސްފައިވާ ފަރާތްތަކުން، އެޗްޑީސީގެ ފެސިލިޓީސް މެނޭޖްމަންޓްގެ އިރުޝާދުގެ މަތިން އެ ބަދަލުތައް ރަނގަޅުކުރުމަށް ވަނީ އަންގާފައެވެ. އަދި އެއްބަސްވުމާއި ޚިލާފަށް މިފަދަ ބަދަލުތައް ގެންނަ ފަރާތްތަކާއިމެދު ފިޔަވަޅު އަޅަމުން ގެންދާނެ ކަމަށްވެސް އެޗްޑީސީން ވަނީ ބުނެފައެވެ.
