އެމްޑީޕީގެ ރައީސް މުހައްމަދު ނަޝީދު އެމްޑީޕީން އެއްފަރާތްކޮށް، އެކަހެރިކުރުމަށް ވަރަށް ބޮޑަށް އެޕާޓީ ތެރެއިން މަސައްކަތް ކުރެވެމުންދާކަމަށް އެމްޑީޕީގެ ކުރީގެ ޗެއާޕާސަން ހަސަން ލަތީފް ވިދާޅުވެއްޖެއެވެ.
އެމްޑީޕީ ތެރޭގައި އެފެދިފައިވާ ޚިޔާލު ތަފާތުވުމުގެ ތެރެއިން ރައީސް ނަޝީދަށް ތާއީދު ކުރާ ފަރާތްތަކައި ރައީސް ޞާލިހަށް ތާއީދު ކުރާ މެމްބަރުންގެ މެދުގައި މިއަދުވެސް ވަނީ ބަހުގެ ހޫނު ހަމަލާތަކެއް މަޖިލީހުގައި ބަދަލު ކުރެވިފައެވެ. މިއަދުގެ ޖަލްސާގައި ރައީސް ޞާލިހަށް ތާއީދު ކުރާ މެމްބަރުންގެ ވާހަކަ ތަކަށް ރައްދު ދެއްވަމުން ހަސަން ވިދާޅުވީ، އެމްޑީޕީ ތެރެއިން ރައީސް ނަޝީދު އެކަހެރި ކުރުމަށް ވަކި ބަޔަކު ވަރަށް މަސައްކަތް ކުރާކަމަށެވެ.
އަޅުގަނޑުމެން ރަށްރަށަށް ދިޔާމަ ރައްޔިތުން އަހާ ހަސަން ލަތީފޭ އެމީހުން އެއުޅެނީ ކީތްކުރަންހޭ. ރައީސް ނަޝީދު މިޕާޓީން އެއްކައިރި ކުރަންހޭ. އާދެ! ވަރަށް ސާފުކޮށް އަޅުގަނޑަށް މިއަދު އެގޭ ބޭނުން ވެގެން މިއުޅެނީ ސަރުކާރު ޖަވާބު ދާރީ ކުރުވާތީ، ސަރުކާރުގެ ތެރޭގައި ނާޖައިޒް ފައިދާ ނަގަންތިބި މީހުން އެކުރާ ކަންކަން ހުއްޓުވަން ރައީސް ނަޝީދު މަސައްކަތް ކުރާތީ އެމްޑީޕީން އެއްކައިރިކޮށް، އެހެން އެމްޑީޕީއެއް އުފެއްދުމުގެ މަސައްކަތް.
– ހަސަން ވިދާޅުވިއެވެ.
ރައީސް ނަޝީދަށް ތާއީދު ކުރާ މެމްބަރުން ސަރުކާރަށް އެއްބާރުލުން ނުދޭކަމަށް ވަޒީރަކު ވިދާޅުވިއިރު، މަޖިލީހަށް ސަރުކާރުން ފޮނުވި ހުރިހާ ބިލްތަކުގެ މަސައްކަތުގައި އެނޫން ކަންކަމުގައިވެސް ފުރިހަމަ އެއްބާލުދުންދީފައިވާކަމަށް ހަސަން ވިދާޅުވިއެވެ.
ރައީސްއަށް މަޖިލީހުގެ ފުރިހަމަ އިތުބާރު އޮތްކަމަށް ވިދާޅުވާއިރު، ވަޒީރަކު ނިކުމެ މަޖިލީހުގެ އިތުބާރު ނެތްކަމަށް ވާހަކަ ދެއްކުމަކީ ހަމަޖެހޭ ކަމެއްނޫން ކަމަށްވެސް ހަސަން ވިދާޅުވިއެވެ. އެގޮތަށް ވާހަކަ ދައްކަވަނީ ރައީސް ނަޝީދާއިމެދު ހިތްހަމަ ނުޖެހުމުންކަމަށް ހަސަން ވިދާޅުވިއެވެ. އޭނާ ވިދާޅުވީ ގެއްލިފައިވާ މީހުންނާއި މަރާލެވިފައިވާ މީހުންގެ މައްސަލަތަކުގެ ތަފްސީލް ބޭނުންވާކަމަށާއި، ވައްކަމާއި ގުޅޭ ކަންކަމުގެ ތަފްސީލްވެސް މަޖިލީހަށް ބޭނުންވާކަމަށެވެ. އެކަން ބެލުމަށް ކިތަންމެ ހިތްހަމަ ނުޖެހުނަސް އެކަން ކުރާނެކަމަށް ހަސަން ވިދާޅުވިއެވެ.
