މުސްތަފާބެއަކީ ވަރަށް ތަފާތު މީހެއްކަން އެންމެންވެސް ގަބޫލުކުރެއެވެ. މުސްތަފާބޭގެ ޒިންމާ ވަރަށްބޮޑެވެ. އެޒިންމާތަކުގައި ޝާމިލްވާ އެތައް ރައްޔިތަކު އެބަތިއްބެވެ. މުސްތަފާބެއާއި ޙަވާލުވެފައި ހުންނަނީ، އެއްގަމާ ކަނޑުދަތުރު ފަތުރާއި ވައިގެ ދަތުރުތަކުގެ މިނިސްޓްރީއެވެ. މިފަދަ ބޮޑު ވުޒާރާއަކާ ހަވާލުވެގެން ހުންނަވާ އަދި, މީގެކުރިން މިބާވަތުގެ އެއްވެސް ޒިންމާއެއް މުސްތަފާބޭ އުފުލާފައިނުވާއިރު، ސަރުކާރުގެ އެއްވެސް މަގާމެއް އަދާކޮށްފައިނެތް، ހިންގުމުގެ ދާއިރާއިން ތަޖްރިބާގެ ކުޑަވެސް ކަންފުޅެއްނެތް ބޭފުޅަކު ސަރުކާރުގެ ބޮޑު މަގާމަކަމާ ޙަވާލުވުމުން ވާނެ ހައެތި ވެގެން މިހެރަގެންދަނީއެވެ.

މުސްތަފާބޭއެވެ. މިއީ ސަރުކާރުން ރައްޔިތުންނަށް ކުރަމުންދާ ފާޑެއްގެ ޖެއްސުމެއްތޯއެވެ. ނޫނީ ސަރުކާރުގެ ހަގީގީ ފެންވަރުތޯއެވެ. އެހެން ނޫނީ, ފަސޭހަކަމާއެކު ރައްޔިތުންނަށް ޚިދުމަތް ދިނުމުގައި އަޅަންޖެހޭ މުހިއްމު ފިޔަވަޅުތައް މި ސަރުކާރަށް ނޭގެނީއެވެ. އޭގެ ނަތީޖާއެއްގެ ގޮތުން އަތޮޅުތަކުގެ މެދުގައާއި، ރަށްރަށުގެ މެދުގައި މުސްތަފާބޭ ގެންގުޅުއްވާ މިންގަނޑު ތަފާތުވަނީއެވެ.

މުސްތަފާބޭއެވެ. ކަންތައް ވަމުން މިދަނީ ކިހިނަކުން ހެއްޔެވެ. މުސްތަފާބޭ މަގާމުގައި ހުރެގެން ރައްޔިތުންނާ ވަރަށްބޮޑަށް ޒާތީވުން ގެންގުޅޭ ކަމަށް ގިނަބަޔަކު ދެކެއެވެ. "އެއާޕޯޓް އެއޮތީ ދަމާ ގެނެސްފައޭ" ބުނުންފަދަ ރައްޔިތުންގެ ހިތުގައިޖެހޭ ފަދަ ބަސްތަކެވެ. މިއީ، މުސްތަފާބޭ ތިޔަފަދަ މަގާމެއްގައި ހުރެގެން ރައްޔިތުންނާ މުހާތަބް ކޮށްގެންވާނޭ ގޮތެއް ނޫނެވެ. މިއީ ކިހާ ނޭއްގާނީކަންބޮޑު ބަސްތަކެއް ތޯއެވެ.

މުސްތަފާބެއެވެ. އެއާޕޯޓްގައި އަޅަންބުނި ޖެޓީ ނޭޅިގެން މިއުޅޭގޮތެއް ބުނެދޭންވެއްޖެ ނޫންތޯއެވެ. ޖެޓީ އަޅަން ބޭނުންވާ އެތައް ރަށެއްގެ އެތައް ރައްޔިތެއްގެ ޝަކުވާއެވެ. އެތައް ކައުންސިލަކުން ބަޔާންތައް ނެރެފައި ނުވޭތޯއެވެ. ރައްޔިތުންގެ ނިންމުންތަކަށް އިހްތިރާމް ނުކުރާ ވެރީންގެ ނިންމުން ރައްޔިތުން ބަލައެއްވެސް ގަންނާނޭ ނޫންތޯއެވެ.  އެތައްބައެއްގެ އާދޭހެވެ. ރައްކާތެރިކަމުގެ މުހިއްމު ފިޔަވަޅެއް ނޫންތޯއެވެ. މުސްތަފާބޭ މަގާމާ ހަވާލުވެގެން ހުންނަ މުއްދަތުގައި ރައްޔިތުންނަށް ޖެއްސުން ނުކޮށްވޭތޯ ބައްލަވާށެވެ. ސަރުކާރާ ރައްޔިތުންގެ ތަކެއްޗަކީ އެއްވެސްމީހެއްގެ ތަރިކަމުދާ ކަމަށް ހަދައިގެން ހިތު ހުރިހައި ގޮތަކަށް ކަންތައްތައް ކުރަން އުޅުމަކީ ބުއްދީވެރިގޮތެއް ނޫންކަން މުސްތަފާބޭވެސް ދަންނަންވާނެއެވެ. ފަހުން ނުކުމެދާނެ ނުރަގަޅު ނަތީޖާއަށް ވިސްނައިގެން ކަންތައްތައް ކުރުމަށް އަބަދުވެސް ވިސްނަންވާ ނެއެވެ. މިއީ ހެޔޮ ނަސޭހަތެއް ކަމުގައި މުސްތަފާބޭ ބަލައި ނުގަތަސް، މި ނަސޭހަތް އަހަރެން މުސްތަފާބޭއަށް އަރުވައި ފީމެވެ.

ރައްޔިތުންދެކެނީ، މުސްތަފާބެ ޙަވާލުވެ ތިޔަހުރި މިނިސްޓްރީއަކީ ކޮރަޕްޝަނާ ފަސާދައިގެ ހާއްޔެއްގެ ގޮތުގައެވެ. އެއްބަޔަކު ޚިދުމަތްތައް ހޯދުމަށް އެތައްދުވަހެއް ހޭދަކުރަމުން ދާއިރު އަނެއްބަޔަކަށް އެއީ މާކަބޮޑު ކަމަކަށް ނުވެއެވެ. އެހެން އެވަނީ ކޮންމެވެސް އެހެން ގޮތަކުން ޚިދުމަތް ހޯދަން ވަންނާނެ ވަލު ދޮރޯއްޓެއް ހުންނާތީ ނޫންތޯއެވެ.

އެކަމަކުވެސް ވަރިހަމަތާއެވެ. މުސްތަފާބޭ ތިޔަ ހުންނެވީ ވަންނަންވާ ދޮރާށިން ވަދެގަނެ، ހާސިލްކުރާންވީ ހުރިހާ ކަމެއް ހާސިލް ކޮންގެން ނޫންހެއެވެ. މުސްތަފާބޭއަކީ ބޮޑު މުސްތަފާބޭގެ މިވެނި މީހަކަށް ވީމާ، މުސްތަފާބޭއަށް އެވެނި މަގާމެއް ހައްގުވީ ކަމުގައި ދުށްބަޔަކު ދުށީއެވެ. ކަމަށް ގާބިލްވެސް ވީއެވެ. ރައްޔިތުން ދެކޭ ގޮތާއި، އިހުސާސްތަކާއި، އިންސާފާއި ނާއިންސާފުގެ މަތިން ވިސްނާނޭ ކަމެއް ނެތެވެ.

މުސްތަފާބެއެވެ. ތިޔަ މިނިސްޓްރީން ވަރަށް ރަގަޅަށް ރައްޔިތުންނަށް  ޚިދުމަތްދިން ދުވަސްވަރެއްވެސް ދިޔައެވެ. އެއިރުގެ އިންތިޒާމްތައްވެސް ފުރިހަމައެވެ. ޖަވާބު ލިބޭލެއް އަވަހެވެ. ދަތުރު ވެރިންނަށް ފަސޭހައަށް ޖަހާފައިވާ ބައްތިތައްވެސް ދިއްލުނެވެ. މުޅި ރާއްޖެ ޒޯންތަކަކަށް ބަހާލިއެވެ. ތަފާތުކަމެއް ނުގެންގުޅުއްވައި ޚިދުމަތްތައް ފުޅާކުރެއްވިއެވެ. ތަޖްރިބާހުރި ވެރިންގެފަރާތުން ފެންނާނީވެސް އެގޮތް ނޫންތޯއެވެ. މިއަދު އެހެންތޯއެވެ. ސަހަރޯއެވެ. އެމީހަކާ އެމީހެކެވެ. ވެރިއެއް އެހެން މީހެއް ވަތްކެއް ނުވެއެވެ. އެބުރޭ ވަހުތާނެއްފަދަ ތަނެކެވެ. މުސްތަފާބޭގެ އާރުކާޓީކަމުގައި ތިޔަތަން ދަށުން ދަމާތަނަކަށް މިހާރު ވެއްޖެނޫންތޯއެވެ.

މުސްތަފާބޭގެ ޢަމަލުތައް ހުންނަގޮތުން ބައެއްފަހަރު ސަރުކާރުން ރައްޔިތުންނަށް ދޭންޖެހޭ ޚިދުމަތްތައް ދިނުމުގައި، މުސްތަފާބޭ ޖެއްސުންކުރަން އުޅޭހެން މިހާރު ހީވާން ފަށައިފިއެވެ. އަދި މިކަން މިބީދައިން ގަބޫލުކުރާ ރައްޔިތުންގެ އަދަދުވެސް ގިނަވާން ފަށައިފިއެވެ. މުސްތަފާބޭގެ ފަރާތުން ރައްޔިތުންނަށް ޚިދުމަތްތައް އެކަށީގެންވާ އެންމެ އަވަސްމިނުގައި ފޯރުކޮށް ނުދެވޭކަން ގިނަބަޔަކު ގަބޫލުކުރަން ފަށައިފިއެވެ. ވާނީވެސް އެހެން ނޫންތޯއެވެ. ދުވަހަކުވެސް ސަރުކާރުގެ އިސްމަގާމެއް މުސްތަފާބޭ އަދާ ކުރައްވާފައެއް ނުވެއެވެ.

މުސްތަފާބޭގ ނިކަން ވިސްނާ ބަލާށެވެ. ތިޔަ މިނިސްޓްރީއަކީ، ރައްޔިތުންނާ އޭގެ އިންތިހާއަށް ގުޅި ލާމެހިފައިވާ ތަނެއް ނޫންތޯއެވެ. އެހެންވީމާ، އެތަނުގެ ޚިދުމަތްތަކާ އެއްވަރަށް ރައްޔިތުންގެ ބޭނުންތައްވެސް ފުދެންވާނެ ނޫންތޯއެވެ. މިހާރު މިވާގޮތަކީ، ތިޔަ ތަނުގައި އުފެދޭ ވައްކަމާ ކޮރަޕްޝަންގެ ސަބަބުން ރައްޔިތުންނަށް ދޭންޖެހޭ ޚިދުމަތްތައް ލަސްވެގެންދަނީ ނޫންތޯއެވެ. އަތޮޅުތަކަށް ދީފައިވާ އިޚްތިޔާރުތައް އަތުލައްވަނީއެވެ. މަރުކަޒު ކުރައްވަނީއެވެ. އެކަމަކު މުސްތަފާބޭވެސް ވިދާޅުވަމުން ގެންދަވަނީ ލާމަރުކަޒީ އުސޫލުން ރާއްޖޭގެ ރަށްތައް ހިންގަމުން އަންނަވާހަކަ ނޫންތޯއެވެ. ލާމަރުކަޒު ކުރެވޭނީ މިހާކަށް ވަރަކަށެވެ. މިބާވަތުގެ ކަންކަމުގެ ސަބަބުން ރައްޔިތުންގެ އެތައްބައެއްގެ ފާޑުކިޔުންތައް މުސްތަފާބެއަށާއި، ތަނަށް އަމާޒުވެގެން ދަނީއެވެ. ކައުންސިލްތަކަށް ދެމުންދަނީ ފޮތުގައި އޮތްބާރެވެ. އަތުގައި ނެތްބާރު ނޫންތޯއެވެ. އެހެންނަމަވެސް މުސްތަފާބޭ ތިޔަ ހުންނަވަނީ ކަހާތަން ހިރުވާވެސް ނުލައެވެ. މިއީ ދެރަ މައްސަލައެއް ނޫންތޯއެވެ.

މުސްތަފާބެ މިއަދު މަޖިލީހުގައިވެސް ދައްކަމުންދާ ވާހައަކީ ބަޖެޓް ލިބުމުގެ ދަތިކަމުގެ ވާހަކައެވެ. ބަލަ އެއިރު މުސްތަފާބޭމެން ވެރިކަން ހޯދަންވެގެން ރައްޔިތުންނަށް ދައްކަމުންދިޔަ ވާހަކަތައް މިއަދު މިވަނީ ވަރަށްބޮޑު އޮޅުވާލުމެއްގެތެރޭގައި އެއްލާލާފައެވެ. ވާ ވައްދާފަނޫންތޯއެވެ. ރައްޔިތުން އެއްގަމުގައި ކަނޑުވީ ނޫންތޯއެވެ. މުސްތަފާބޭވެސް ލައިފް ޖެކެޓާއި ނުލާ ކަނޑަށް ފުންމާލީ ހެއްޔެވެ.

ބަސްދަތުރުތައް ފަށާނެ ވާހަކައަކީ ވެރިކަމަށް މުސްތަފާބޭމެން ހަވާލުވީއްސުރެ ދައްކަމުން ގެންދާ ވާހަކަތައް ނޫންތޯއެވެ. އެވާހަކަތަކަށް ނިމުމެއް އަންނާނެ ދުވަހެއް ނެތެވެވެ. ދައުރު ހަމަވާން ދެން މާކަ ގިނަދުވަހެއް ނެތެވެ. ފޮށިތަންމަތި ބަނދެގެން ރަށަށްދާންޖެހޭ ދުވަސް ދާދި ކައިރިވެއްޖެ ކަމުގައި މީހުން ބުނާތީ އަޑުއިވެން ފަށައިފިއެވެ. ރައްޔިތުން އެތިބީ ކެތްމަދުވެފައެވެ. މުސްތަފާބޭމެން މިހާރު ފެންނެތް ތަނުގައި ބަކަތަޅަނީހެން ހީވޭނޫންތޯއެވެ. އެކަހަލަ އިހްސާސެއް ނުވޭތޯއެވެ. މީ އަޅެ ފަހެ ދޮގެއްތޯއެވެ.