ވެރިކަން ކުރާ މައި ޕާޓީ އެމްޑީޕީގެ ރައީސް މުހައްމަދު ނަޝީދު، އެމްޑީޕީން އެއްފަރާތްކޮށްގެން އެމްޑީޕީއަށް ހޯދޭނެ ވެރިކަމެއް ނޯންނާނެކަމަށް ރައްޔިތުންގެ މަޖިލީހުގެ ބިލެތްދޫ ދާއިރާގެ މެމްބަރު އަހުމަދު ހަލީމް (ދޮންބިލޭ) ވިދާޅުވެއްޖެއެވެ.

ރައްޔިތުންގެ މަޖިލީހުގެ އަންގާރަ ދުވަހުގެ ޖަލްސާގައި ހުށަހެޅުނު ކުއްލި މައްސަލައަށް ވާހަކަ ދައްކަވަމުން ހަލީމް ވިދާޅުވީ، އެމްޑީޕީގެ ބައެއް މަޖިލިސް މެމްބަރުންނަށް ރައީސް ނަޝީދަކީ އެމްޑީޕީ ހިސޯރުކޮށްގެން އުޅޭ ބޭފުޅެއްކަމަށް ސިފަވާކަމަށެވެ. ނަމަވެސް އެގޮތަށް ސިފަވާ ބޭފުޅުންނަށް އުޅެނީ ވަރަށް ބޮޑަށް އޮޅިގެންކަމަށާއި، ރައީސް ނަޝީދާއި ނުލައި އެމްޑީޕީއަށް ހޯދޭނެ މޮޅެއް ނޯންނާނެކަމަށް ހަލީމް ވިދާޅުވިއެވެ.

ބައެއް ބޭފުޅުންނަށް މިއަދުވެސް ވިދާޅުވެވޭ، އަބަދަކު ޕާޓީ ހިސޯރުކޮށްގެން ނުހުރެވޭނެއޭ. އެވިދާޅުވަނީ ރައީސް ނަޝީދުގެ ވާހަކަ. އަޅުގަނޑުމެން މިޕާޓީން ރައީސް ނަޝީދު ނެރެގެން، މިޕާޓީއަށް ލިބޭނެ މާބޮޑު މޮޅެއް ނޯންނާނެ. ރައީސް ޔާމީންގެ ވެރިކަން ވެއްޓިދިޔައީ، ރައީސް މައުމޫން ދޫކޮށްލީމަ. އެހެންވީމާ އަޅުގަނޑުމެނަށް ރައީސް ނަޝީދު ދޫކޮށްލާފައި ހޯދޭނެ ވެރިކަމެއް ނޯންނާނެ. އެއީ އޮޅިގެން އެއުޅެނީ. ވަރަށް ބޮޑަށް އޮޅިގެން އެއުޅެނީ.

– ދޮންބިލޭ ވިދާޅުވިއެވެ.

އޭނާ ވިދާޅުވީ، ކޮންމެ އިންތިޚާބަކާއި ކުރިމަތިލީނަމަވެސް، އެއިންތިޚާބެއް ކާމިޔާބު ކުރެވޭނީ ރައްޔިތުންގެ ތާއީދު އޮވެގެން ކަމަށެވެ. މިސަރުކާރަކީ ވަޒީފާގެ ބިރު ދެއްކުމާއި، ނިމިދިޔަ ރައީސް ޔާމީންގެ ވެރިކަމުގައި ނުހައްގުން ވަޒީފާއިން ވަކިކޮށްފައިވާ މީހުން ވަޒީފާތަކަށް ގެނައުމަށް ވައުދުވެގެން އައިސްފައިވާ ސަރުކާރަކަށް ވާއިރު، ނުހައްގުން މީހަކު މިސަރުކާރުން ވަކިކުރުމަކީ ބަލަިއ ގަނެވޭނެ ކަމެއްނޫންކަމަށް ހަލީމް ވިދާޅުވިއެވެ.

އިންތިޚާބުތައް ކާމިޔާބު ކުރަނީ ތާއީދު އޮވެގެން. ބިރު ދައްކައިގެނެއްނޫން. އަޅުގަނޑުމެންގެ މިސަރުކާރު ވުޖޫދުވީވެސް ބިރުދައްކައި، ވަޒީފާއިން ކަނޑާފައި ތިބި މީހުން، އަބުރާ ވަޒީފާތަކަށް ގެނައުމަށް ވައުދުވެގެން.

– ހަލީމް ވިދާޅުވިއެވެ.

މިމައްސަލާގައި ވާހަކަ ދައްކަވަމުން ވަހީދު ވިދާޅުވީ، އެމްޑީޕީގެ އެތެރޭގެ އިންތިޚާބަކާއި ދިމާކޮށް އެމްޑީޕީގެ އެންމެ ބުރަ މަސައްކަތް ކުރި ބައެއް މީހުން ވަޒީފާތަކުން ވަކި ކުރުމަކީ ގަބޫލު ކުރެވޭނެ ކަމެއްނޫންކަމަށެވެ. އަދި މިގޮތަށް މިކަން ކުރަމުންދަނީ ރައީސުލްޖުމްހޫރިއްޔާގެ އަރިހުގައި ތިއްބެވި ބައެއް ބޭފުޅުންގެ ލަފާގެ މަތީންކަމަށާއި، މިކަމުން ގެއްލުންވާނީ އެމްޑީޕީއަށް ކަމުގައި ވަހީދު ވިދާޅުވިއެވެ. ސަރުކާރުން ބުނެފައިވަނީ އިންތިޚާބަކަށް ނުފޫޒު ފޯރުވުމުގެ ގޮތުން، މީހުން ވަޒީފާތަކުން ވަކިކޮށް، ސަރުކާރުގެ ވަސީލަތްތައް ބޭނުން ކުރުމަކީ، މި ސަރުކާރުން އެއްވެސް ހާލެއްގައި ޤަބޫލުކުރާނެ ކަމެއް ނޫންކަމަށެވެ.