ކޮމަންޑޫ ދާއިރާގައި ވާދަވެރި ކެމްޕެއިންތަކަށްފަހު، މާދަމާ އެދާއިރާގެ ރައްޔިތުން ނިންމުން ނިންމާނެއެވެ.
ކޮމަންޑޫ ދާއިރާގެ ގޮނޑި ހުސްވެ، ބައި އިލެކްޝަނެއް ބާއްވަނީ އެ ދާއިރާ ތަމްސީލުކުރެއްވި އެމްޑީޕީގެ މެމްބަރު ޙުސެއިން ވަހީދު އަވަހާރަވުމުންނެވެ. މިއިންތިޚާބުގައި އެމްޑީޕީގެ ފަރާތުން ވާދަކުރައްވަނީ މުޙައްމަދު ރާޝިދެވެ. އިދިކޮޅު ޕީޕީއެމްގެ ކެނޑިޑޭޓަކީ މޫސާ ފަތުހީ އާދާމެވެ. އެމްއެންޕީގެ ފަރާތުން ވާދަކުރައްވަނީ އަބްދުލް ހަންނާން އިދުރީސެވެ.
މިއިންތިޚާބުގެ ކެމްޕެއިން ފެށިފައިވަނީ ކެނޑިޑޭޓުންގެ ނަންބަރު ތަރުތީބު ކުރި ހިސާބުން ފެށިގެންނެވެ. ނަންބަރު ތަރުތީބު ކުރުމަށްފަހު ވެރިކަންކުރާ ކޯލިޝަނާއި، އިދިކޮޅު ޕީޕީއެމް އަދި އެމްއެންޕީންވަނީ ވަރުގަދަ ކެމްޕެއިނެއް ކޮމަންޑޫ ދާއިރާގައި ކޮށްފައެވެ. މިކެމްޕެއިންގައި ވެރިކަންކުރާ މައި ޕާޓީ އެމްޑީޕީން ކުރި ކެމްޕެއިނަކީ އެމްޑީޕީގެ ކެމްޕެއިނެއްތޯ ނުވަތަ ސަރުކާރުގެ ކެމްޕެއިނެއްތޯ އޮޅޭ ވަރަށް ކަންތަން ވަނީ ކޮށްފައެވެ. ކުރިން ވެސް ގިނަ މަޝްރޫއުތަކެއް ފަށައިފައިވާ ކޮމަންޑޫ ދާއިރާގައި އެމްޑީޕީގެ ކެނޑިޑޭޓް ހޮވަން ބަޖެޓުގައި ވެސް ނެތް މަޝްރޫއު އުފަންކޮށް އެ ދާއިރާ ބޮޑެތި ހަރަދުތަކެއް ވަނީ ކޮށްފައެވެ.
ކޮމަންޑޫ ދާއިރާއަށް ސަރުކާރުގެ ވެރިންނާއި، ވެރިކަން ކުރާ ކޯލިޝަނުން ވަޑައިގެން އެމްޑީޕީގެ ކެނޑިޑޭޓަށް ވޯޓު ދިނުމަށް ގެންދެވީ އާދޭސް ދަންނަވަމުންނެވެ.
ސަރުކާރުން މި އަހަރު ކޮމަންޑޫ އަށް ބަޖެޓު ކުރި މަސައްކަތްތައް:
– ބަނދަރު އަޕްގްރޭޑް ކުރުން
– ފެނާއި ނަރުދަމާ ނިޒާމް ގާއިމުކުރުން
– ގޮނޑުދޮށް ހިމާޔަތްކުރުން
– ސްކޫލް އަޕްގްރޭޑްކުރުން
– މޫދަށް އެރޭ ސަރަހައްދު ހެދުން
– ހިއްކާފައިވާ ސަރަހައްދު ހިމާޔަތްކުރުން
ރައްޔިތުންގެ މަޖިލީހުން އެ އަހަރަކަށް ފާސް ކޮށްފައިވާ ބަޖެޓުގައި ނުހިމެނޭ ކަންކަން ކުރުމަކީ ގާނޫނުއަސާސީއާ ހިލާފު ކަމެކެވެ. ކެމްޕެއިން ކުރާއިރު އެފަދަ ކަންކަން ކުރާނެ ކަމަށް ވައުދުވުން ވެސް ކޮރަޕްޝަނަށް ވާއިރު ފައިސާ އާއި ނުސީދާކޮށް ވިޔަސް ނުފޫޒު ފޯރާ ފަދަ އަމަލުތައް ހިންގުމަކީ އިންތިހާބުތަކާ ބެހޭ ގާނޫނުތަކުން މަނާ ކޮށްފައިވާ ކަންކަމެވެ.
ކޮމަންޑޫ ދާއިރާގައި ސަރުކާރުގެ ނުފޫޒާއި، ބާރު އޮތްކަން އިންތިހާއަށް ފެންނަން އޮތް ނަމަވެސް އިދިކޮޅުން ވާދަކުރާ ޕީޕީއެމްއާއި އެމްއެންޕީގެ ކެނޑިޑޭޓުންގެ ފަރާތުން މިކަމަށް ކުޑަވެސް ޖެހިލުމެއް ވީތަނެއް ނުފެނެއެވެ. ޕީޕީއެމްއާއި، އެމްއެންޕީންވެސް ބުނަނީ އިންތިޚާބު ބޮޑުތަނުން ކާމިޔާބު ކުރާނެކަމަށެވެ. ނަމަވެސް ފެންނަ މަޒަރުތަކުން މިއިންތިޚާބުގައި ވާދަވެރިކަން ބޮޑުވެފައިވަނީ އެމްޑީޕީއާއި، ޕީޕީއެމްގެ މެދުގައެވެ.
ކޮމަންޑުއާއި ފޯކައިދޫ އަދި މަރޮށި ހިމެނޭ މި ދާއިރާގައި 3،309 މީހުންނަށް ވޯޓުލުމުގެ ހައްޤު ލިބިގެންވެއެވެ. މިއީ މާދަމާ މުޅި ރާއްޖޭގެ ރައްޔިތުން އިންތިޒާރު ކުރަމުންދާ އިންތިޚާބަކަށްވާއިރު އިންތިޚާބުގެ ނަތީޖާއަކީ މަޖިލީހުގެ ގޮޑީގެ އަދަދުތައްހުރިގޮތުން އެއްވެސް ބަޔަކަށް އަދަދު ހަމަކުރަން މުހިންމު ގޮޑިއެއް ނޫނެވެ. ނަމަވެސް ސިޔާސީ ގޮތުން އަންނަ އަހަރަކީ ރިޔާސީ އިންތިޚާބު އޮންނަ އަހަރަށް ވެފައި ސިޔާސީ ގޮތުން އިދިކޮޅުގެ ތާއީދުވެސް ބޮޑުވަމުންދާ މިދުވަސްވަރު މިގޮޑި ކާމިޔާބު ކުރުމަކީ ސިޔާސީ ގޮތުން ކޮންމެ ބަޔަކަށްވެސް ލިބޭނެ ބޮޑު ކުރިއެރުމަކަށްވާނެއެވެ.
މިއިންތިޚާބު އިދިކޮޅު ކޯލިޝަނުން ކާމިޔާބް ކުރުމަށް ބޭނުންވާ އެންމެ ބޮޑު ސަބަބުކަމަށް ބުނެފައިވަނީ ރާއްޖޭގެ މިނިވަންކަމާއި ސިޔާދަތު ހިމާޔަތް ކުރުމަށެވެ. އަދި ސަރުކާރުން ހިންގަމުންދާ ޤާނާއި ޚިލާފް އެތައްކަމެއް ހުއްޓުވުމަށް ކުރަންޖެހޭ މަސައްކަތް ވަރުގަދަ ކުރުމަށާއި، ސަރުކާރަށް ރައްޔިތުން ތާއީދު ނުކުރާކަން ހާމަކުރުމަށެވެ. ސަރުކާރުން މިގޮޑު ކާމިޔާބު ކުރަން ދައްކާ އެންމެ ބޮޑު ސަބަބަކީ ލާމަރުކަޒީ ނިޒާމު ރާއްޖޭގައި ހިންގުމެވެ.
ކޮމަންޑޫ ދާއިރާގެ ގޮނޑީގެ ވާދަވެރިކަން ބޮޑުވެފައިވާއިރު ކުރިން އެ ދާއިރާ ތަމްސީލުކުރެއްވި ޙުސެއިން ވަހީދު އެ ގޮނޑި ކާމިޔާބުކުރެއްވީ 332 ވޯޓްގެ ތަފާތުންނެވެ. އެފަހަރު އޭނާއާއި ވާދަކުރީ ޕީއެންސީގެ ކެންޑިޑޭޓް އިބްރާހމް ރަޝީދެވެ.
