އެމްއެންޕީން މަސައްކަތްކުރަނީ އެމްޑީޕީ ނޫނީ ޕީޕީއެމް ނޫންގޮތެއް ހޯދައިދިނުމަށްކަމަށާއި، އެޕާޓީގެ އަމާޒު ވަރަށް ސާފުކަމަށް ވިދާޅުވެ އެމްއެންޕީގެ ނާއިބު ރައީސް އަދި ތިމަރަފުށީ ދާއިރާގެ މެންބަރު ޢަބްދުﷲ ރިޔާޟް ފާޑުވިދާޅުވެއްޖެއެވެ.

ރިޔާޒް މިފަދައިން ފާޑުވިދާޅުވީ، އެމްއެންޕީން މަސައްކަތްކުރަނީ އިދިކޮޅު ޕީޕީއެމްއަށް ކޮމަންޑޫ ދާއިރާގެ ގޮނޑި ކާމިޔާބުކޮށްދިނުމަށްކަމަށް އެމްޑީޕީގެ ނާއިބު ރައީސް އަދި ރައީސް އޮފީހުގެ މިނިސްޓަރ މުޙައްމަދު ޝިފާޒް  ވިދާޅުވުމާއި ގުޅިގެންނެވެ.

ޝިފާޒްއަށް ރައްދު ދެއްވާ ރިޔާޒް ވިދާޅުވީ، އެމްއެންޕީގެ އަމާޒު ވަރަށް ސާފުކަމަށެވެ. އެއީ އެމްޑީޕީއާއި ޕީޕީއެމްގެ ކެނޑިޑޭޓުން ބަލިކޮށް އިންތިޚާބު ކާމިޔާބުކުރުންކަމަށާއި، ފުދުންތެރި ރައްޔިތެއް އުފެއްދުމަށް ކެނޑިނޭޅި މަސައްކަތްކުރުންކަމަށެވެ. އެޕާޓީން ވަކާލަތުކުރަނީ ރައްޔިތުންނަށް ހައްގުމިންވަރު ހޯދައިދިނުމަށާއި، އެމްޑީޕީ ނުވަތަ ޕީޕީއެމް ނޫންގޮތެއް ބޭނުންވާ ފަރާތްތަކަށް އެފުރުސަތު ހޯދައިދިނުންކަމަށްވެސް ރިޔާޒް ވިދާޅުވިއެވެ.

ރޭ މަރޮށީގައި ބޭއްވި އެމްޑީޕީ ހަރަކާތުގައި ވާހަކަފުޅު ދައްކަވަމުން އެމްޑީޕީގެ ނާއިބު ރައީސް ޝިފާޒް ވިދާޅުވީ، އެމްއެންޕީއަކީ ސަރުކާރަށް އަބަދުވެސް ތާޢީދުކުރާ ބައެއްކަމަށާއި، ނަމަވެސް މި ބައި އިލެކްޝަންގައި ވާދަކުރަން އެޕާޓީއަށް ކެނޑިޑޭޓެއް ލިބުމާއެކު އެޕާޓިއަށް ސަރުކާރު ވަރަށް ބޮޑަށް ގޯސްވެފައިވާކަމަށެވެ. އަދި ސަރުކާރުގެ ރަނގަޅު އެއްވެސް ސިފައެއް މިހާރު އެމްއެންޕީއަށް ނުފެންނަކަމަށްވެސް ޝިފާޒް ވިދާޅުވިއެވެ.

އިންތިޚާބު ކައިރިވަމުންދާވަރަކަށް އެމްއެންޕީން ކުރަމުންދާ ކަންކަން ސާފުވާކަމަށާއި، ވޯޓް ދިނުމުގެ ކުރިން އެ ދާއިރާގެ ރައްޔިތުން ވިސްނަން ޖެހޭކަމަށްވެސް ޝިފާޒް ވިދާޅުވިއެވެ. ޝިފާޒް ވިދާޅުވީ އެމްއެންޕީން އުޅޭނީ އެމްޑީޕީން ގެންނަ ތަރައްޤީއަށް ކުރާ މަސައްކަތްތަކާއި އުއްމީދުތައް ފުނޑުފުނޑުކޮށްލުމަށްކަމަށެވެ.

ޝިފާޒް ވިދާޅުވީ، ކުރީ ސަރުކާރަކީ ރައްޔިތުންނަށް ވަރަށް އަނިޔާވެރިވި ސަރުކާރެއްކަމަށާއި، އެތައް ބަޔަކު ހައްޔަރުކުރިއިރު އޭގެ ތެރޭގައި މިހާރުގެ އެމްއެންޕީގެ ބޭފުޅުންވެސް ހިމެނުނުކަމަށެވެ. އޭނާ ވަނީ އެމްއެންޕީއަށް ކޮމަންޑޫ ދާއިރާގެ ގޮނޑި ކާމިޔާބު ނުކުރެވޭނެކަން އެނގުމުން، މިހާރު މަސައްކަތްކުރަނީ މަޖިލީހުގެ ގޮނޑި އިދިކޮޅަށް ކާމިޔާބުކޮށްދިނުމަށްކަމަށެވެ.