މާލޭގައި އައުޓްޑޯ ފުޑް ކޯޓު ޕްރޮޖެކްޓް ކުރިއަށް ގެންދިއުމަށް ފައިނޭންސް ހަމަޖެއްސުމަށް ބޭނުންވާ ލޯނު ނެގުމަށް ސިޓީ ކައުންސިލުން ފާސްކޮށްފިއެވެ.
މި މައްސަލަ ކައުންސިލަށް ބަލައިގަތުމަށާއި، އައުޓްޑޯ ފުޑް ކޯޓު ޕްރޮޖެކްޓް ކުރިއަށް ގެންދިއުމަށް ބޭނުންވާ ފައިނޭންސް ހަމަޖެއްސުމަށް ހުށަހެޅިފައިވާގޮތަށް ބެންކް ލޯން ނަގައިގެން މި މަސައްކަތް ކުރިއަށް ގެންދިއުމަށް އެދި މާލެ ސިޓީ ކައުންސިލްގެ ޢާއްމު ޖަލްސާގައި ހުށަހެޅުނު ހުށަހެޅުމަށް، ރިޔާސަތުން ވޯޓަށް އެއްސެވުމުން އެ ޖަލްސާގައި ބައިވެރިވެ ވަޑައިގަތް މެންބަރުންގެ އިއްތިފާޤުން މިހުށަހެޅުން ވަނީ ފާސްވެފައެވެ.
އައުޓްޑޯ ފުޑް ކޯޓު ޕްރޮޖެކްޓް ކުރިއަށް ގެންދިއުމަށް ބޭނުންވާ ފައިނޭންސް ހަމަޖެއްސުމާ މެދު ގޮތެއް ނިންމުމަށް ކައުންސިލް ޖަލްސާގައި މަޝްވަރާ ކޮށްފައިވާއިރު، މި ފުޑް ކޯޓު ޕްރޮޖެކްޓަކީ މާލޭގެ ލޭންޑް ޔޫޒް ޕްލޭން ހެދުމުގެ ބައްދަލުވުންތަކުގެ ތެރެއިން ހެންވޭރު ބައްދަލުވުން ބޭއްވިއިރު ކައުންސިލުން ހެންވޭރު ރައްޔިތުންނަށް ހުށަހެޅި މަޝްވަރާކުރެވިފައިވާ ކަމަކަށް ވާތީކަމަށް ކައުންސިލުން ބުންޏެވެ.
ކައުންސިލް ޖަލްސާގައި ވާހަކަ ދައްކަވަމުން މޭޔަރ މުޢިއްޒު ވިދާޅުވީ ދަރުބާރުގޭ ކައިރިން އިރަށް އޮންނަ ބިމުގައި ވަރަށް ފަސޭހަކަމާއެކު ކުޑަކުޑަ ލޭންޑް ސްކޭޕިންއަކާއެކު މޫވަބަލް ޑިވެލޮޕްމަންޓެއް އެތަނުގައި ޒަމާނީ ސްޓްރީޓް ފުޑް ކޮންސެޕްޓެއް ގެނެސް ސީޓީންގއާއެކު ތަން ތަރައްޤީ ކުރުމަށްފަހު ޒުވާނުންނާއި ކަނބަލުންނަށް ވިޔަފާރީގެ ތެރެއަށް ވަނުމުގެ ފުރުޞަތު ލިބޭ ގޮތަށް ހުޅުވާލުމަށް އެ ބައްދަލުވުމުގައި އެވާހަކަ ހުށަހެޅުނު ކަމަށާއި އެ ބައްދަލުވުމުގައި އެކަމަށް ވަރަށް ބޮޑަށް ރައްޔިތުންގެ ފަރާތުން ތާޢީދު ލިބުނު ކަމަށެވެ.
އެހެންކަމުން މިކަމަށް ޑީޓެއިލް ވޯކްކުރުމަށްފަހު ފައިނޭންސް އިސްޓިޓިއުޝަންތަކާއެކު މިކަމުގައި އިންޓްރަސްޓް ހުރިތޯ ބެލުމަށް ވާހަކަވެސް ދެކެވުނުކަމަށާއި އެބޭފުޅުންގެ ތާޢީދުވެސް މިކަމުގައި ވަރަށް ލިބޭ ކަމަށް ވިދާޅުވިއެވެ.
އެއީ ފީސިބްލް ކަމެއްގެގޮތުގައި އެބޭފުޅުންނަށްވެސް ފެނޭ އެއީ ކުޑަކުޑަ އިންވެސްޓްމަންޓަކުން މެކްސިމަމް ފަސް މިލިއަން ރުފިޔާގެ ބޮރޯވިންގއަކަށް ގޮސް ރިކަވަރ ކުރެވޭ ގްރޮސް އިންކަމް މަންތްލީ މިނިމަމް ތިންލައްކަ ރުފިޔާ ޕޭޕަރުގައިވާ ގޮތަށް ޢާމްދަނީ ހޯދޭނެ، 3 ލައްކަ ރުފިޔާ ޢާމްދަނީ ހޯދޭ ކަމަށްވަނީނަމަ އަހަރަކު ތިނެއް ޕޮއިންޓް ހައެއް މިލިއަން ހޯދޭނެ، މެކްސިމަމް ދެއަހަރުން ލޯން ރިކަވަރ ކުރެވޭނެ. ދެން ލިބޭނީ ޕްރޮފިޓް
– މޭޔަރު މުޢިއްޒު
އެހެންކަމުން މިއީ ވަރަށް ފީސިބްލް ކަމެއްގެ ގޮތުގައި ބޭންކްތަކަށްވެސް ޤަބޫލް ކުރެވޭ ކަމަށާއި މިހިސާބަށް ކުރެވިފައި އޮތް ކަމަކަށްވާތީއާއި މިކަމުގެ ސަބަބުން ދާއިމަށް ބޮޑު ސްޓްރަކްޗަރއެއް ހަދައި މުސްތަޤުބަލުގައި އެތަނަށް ބޮޑު ޑިވެލޮޕްމަންޓެއް އަންނަ ދުވަހަކުންވެސް ބޮޑު ބަދަލެއް ދޭންޖެހޭނެ ކަމަކަށް ނުވާނެ ކަމަށްވެސް މޭޔަރ ވިދާޅުވިއެވެ.
އެހެންކަމުން މިކަން ކުރުމުން ޒުވާނުންނާއި ކަނބަލުންނަށް ފުރުޞަތު ލިބޭ ގޮތަށް މީގައި ފުރުޞަތު ދޭނެ ކަމަށާއި،މާލެ ސިޓީ ކައުންސިލްގެ ސްޓްރެޓެޖިކް އެކްޝަން ޕްލޭންގައިވާ ޢާއްމުދަނީ ހޯދުމުގެ ފުރުޞަތު ކައުންސިލުން އިސްނަގައިގެން ޒުވާނުންނާއި އަންހެން ބޭފުޅުންނަށް ހޯދައިދޭނެކަމަށް ބަޔާންކޮށްފައިވާއިރު،މިތަން ލިބޭ ފަރާތްތައް ކަނޑައަޅާއިރު އެ މަޤްޞަދުވެސް ހާސިލްވާނެ ކަމަށް މޭޔަރ ވިދާޅުވިއެވެ.
ރިޔާސަތުން މޭޔާރ ހުށަހެޅުއްވި ކަރުދާހުގައިވަނީ މިހިނގާ ޖެނުއަރީމަހުގައި ކައުންސިލްގެ އެޕްރޫވަލްއާއި ފައިނޭންސްގެ އެޕްރޫވަލް ލިބިއްޖެނަމަ ފެބްރުއަރީގައި ލޯން އެސެސްމަންޓަށް ބޭންކަށް ފޮނުވާ ގޮތަށް ހަމަޖެހިފައިވާކަމަށެވެ.
އަދި އެކަންކަން ނިމުމުން މާރޗްމަހުގައި ޓެންޑަރއަށް ހުޅުވާލާ އޭޕްރީލްގައި ކޮންޓެކްޓަރާއި ކަންކަން ހަވާލުކުރުން ކަމަށާއި ދެން ޖެހިގެން އަންނަ ތިންމަސްތެރޭ އެތަންތަން ހިންގަން ފަރާތްތަކަށް ފުރުސަތު ހުލުވާލެވިގެންދާނެކަން މޭޔަރ ފާހަގަކުރެއްވިއެވެ. އަދި އެކަންކަން އަވަސްވެއްޖެ ނަމަ ކަނޑައެޅިފައިވާ މުއްދަތަށްވުރެ އަވަހަށްވެސް ހުޅުވިދާނެކަން ފާހަގަ ކުރެއްވިއެވެ.
