ޗައިނާއިން ރާއްޖޭގެ ރަށްތަކެއްގައި ހިންގި ޕްރޮޖެކްޓްތަކެއް މިސަރުކާރުން ހުއްޓުވާފައިވާކަމަށް އެމްޑީޕީގެ ރައީސް އަދި ރައްޔިތުންގެ މަޖިލީހުގެ ރައީސް މުޙައްމަދު ނަޝީދު ވިދާޅުވެއްޖެއެވެ.
ރައީސް ނަޝީދު މިހެން ވިދާޅުވީ ދާދިފަހުން ސްރީލަންކާއަށް ކުރެއްވި ދަތުރުފުޅުގެ ތެރެއިން އެޤައުމުގެ ނޫހެއްކަމަށްވާ "އިކޮނަމީ ނެކްސްޓް"އަށް ދެއްވި އިންޓަރވިއުއެއްގައެވެ.
ރައީސް ނަޝީދު ވިދާޅުވީ، 2018ގެ ރިޔާސީ އިންތިޚާބުގައި ވަޢުދުވިގޮތަށް ޗައިނާއިން ހިންގަމުން އައި ބައެއް ޕްރޮޖެކްޓްތައް ހުއްޓުވާފައިވާކަމަށެވެ. ކުރީގެ ރައީސް ޔާމީންގެ ވެރިކަމުގައި ރާއްޖޭގެ 16 ރަށެއްގައި ޗައިނާއިން އަސްކަރީ ބޭސް އަޅަމުންގެންދާކަން ރައީސް ނަޝީދު ތަކުރާރުކޮށް ތުހުމަތުކުރައްވައެވެ. ރައީސް ނަޝީދު އޭގެ ފަހުން ވިދާޅުވެފައިވަނީ އަސްކަރީ ބޭސް ތަރައްޤީކުރަމުން ދިޔައީ ރިސޯޓް ހެދުމަށ ދިން ރަށްތަކެއްގައިކަމަށެވެ.
"އިކޮނަމީ ނެކްސްޓް"އަށް ދެއްވި އިންޓަރވިއުގައި ނަޝީދު ވިދާޅުވީ ޗައިނާއިން ހިންގި ޕްރޮޖެކްޓްތަކެއް ހުއްޓިއިރު އެ ރަށްތަކުގެ މިލްކުވެރިކަމާމެދު ސުވާލު އުފެދިފައިވާކަމަށެވެ. އަދި އެރަށްތަކުގެ މިލްކުވެރިކަން ކަނޑައެޅުމުގެ މަސައްކަތް ކޯޓްގައި ކުރިއަށްދާކަމަށްވެސް ނަޝީދު ވިދާޅުވިއެވެ.
ޗައިނާއިން ރާއްޖޭގެ ރަށްތަކެއްގައިި ހިންގި މަޝްރޫޢުތަކެއް ހުއްޓުވިކަމަށް ރައީސް ނަޝީދު ވިދާޅުވިނަމަވެސް އެފަދަ އެއްވެސް ވާހަކައެއ ސަރުކާރުން އަދި މިހާތަނަށް ހާމަކޮށްފައެއް ނުވެއެވެ.
ނަޝީދުގެ ވާހަކަފުޅުގައި އިތުރަށް ފާހަގަކުރައްވާފައިވާގޮތުގައި ރާއްޖޭގެ ދަރަނި ވަރަށް ބޮޑުވެފައިވާކަމަށާއި، އެގޮތުން މިއަހަރަކީ ގޮންޖެހުން ބޮޑު އަހަރަކަށްވާނެކަމަށެވެ. ނަޝީދު ވިދާޅުވީ ދަރަނީގެ ގޮތުގައި އެންމެ ގިނަ ފައިސާ ދައްކަން ޖެހެނީވެސް ޗައިނާއަށްކަމަށެވެ.
ކޮމެންޓު ފޮނުވާ