ޕްރެޒިޑެންޓްސް ކަޕް ފުޓްބޯޅަ މުބާރާތުގެ ޗެމްޕިއަންކަން ކްލަބް ވެލެންސިއާ ހޯދައިފިއެވެ.
ވެލެންސިއާ އިން މި މުބާރާތުގެ ޗެމްޕިއަންކަން ހޯދީ މިއަދު ހަވީރު ރ.އަލިފުށި ޓާފް ދަނޑުގައި ކުޅުނު ފައިނަލް މެޗުގައި 1-2 ގެ ނަތީޖާއަކުން މާޒިޔާ ބަލިކުރުމަށްފަހުއެވެ. މި މެޗުގެ 90 މިނެޓު ހަމަވިއިރު، ދެ ޓީމު އޮތީ 1-1 ގެ ނަތީޖާއަކުން އެއްވަރުވެފައެވެ. އެހެންކަމުން ނަތީޖާ ނެރުމަށް ކުޅުނު 15 މިނެޓުގެ ދެ ހާފުގެ ތެރެއިން ފުރަތަމަ ހާފުގައި ވެލެންސިއާއިން ވަނީ ލަނޑެއް ޖަހާ ލީޑު ނަގާފައެވެ.
މިއީ ކްލަބް ވެލެންސިއާ އިން ޕްރެޒިޑެންޓްސް ކަޕް ކާމިޔާބުކުރި ހަވަނަ ފަހަރެއެވެ. އެންމެ ފަހުން ވެލެންސިއާ އިން މި މުބާރާތް ކާމިޔާބުކުރީ 2008 ވަނަ އަހަރުއެވެ.
ފައިނަލް މެޗު ފަށައިގެން މާ ގިނައިރުތަކެއް ނުވަނީސް ވެލެންސިއާ އިން ވަނީ ލަނޑެއް ޖަހާ ލީޑު ނަގާފައެވެ. މި ލަނޑު މެޗުގެ 3 ވަނަ މިނެޓުގައި ވެލެންސިއާގެ އަބްދުﷲ މިދުހަތު ފަހުމީ ނެގި ކޯނަރަކުން ކާމިޔާބުކޮށްދިނީ ޑިފެންޑަރު ޑަކްސަން ޕުސްލަކްސްއެވެ. މެޗުގައި މާޒިޔާއިން ނަތީޖާ ހަމަހަމަކުރީ ފުރަތަމަ ހާފް ނިމެން 5 މިނެޓަށް ވެފައިވަނިކޮށެއެވެ. މި ލަނޑު ކާމިޔާބުކޮށްދިނީ މާޒިޔާގެ ކެޕްޓަން މުހައްމަދު އިރުފާންއެވެ.
މެޗުގެ ދެވަނަ ހާފުގައި މާޒިޔާއިން ވަނީ އިތުރު ލަނޑެއް ޖެހުމަށް ވަރަށް މަސައްކަތްކޮށްފައެވެ. ނަމަވެސް ވެލެންސިއާގެ ޑިފެންސްް ލައިން ބެލެހެއްޓި ކުޅުންތެރިން ވަނީ މި ހަމަލާތައް ހުއްޓުވާފައެވެ. މެޗުގެ 90 މިނެޓުގެ ކުޅުން ނިމުުނުއިރު 2 ޓީމު އެއްވަރުވެފައި އޮތުމުން ދެން ޖެހުނީ އިތުރު ވަގުތުގެ 15 މިނެޓުގެ 2 ހާފް ކުޅޭށެއެވެ. އިތުުރު ވަގުތުގެ ފުރަތަމަ ހާފުގައި ވެލެންސިއާގެ ކެޕްޓަން ޢަލީ ފާސިރަށް ކުރި ނުރައްކާތެރި ފައުލަކާއި ގުޅިގެން މާޒިޔާގެ ނާއިޒް ހަސަން އަށް ރެފްރީ ޖާވިޒް ވަނީ ރަތް ކާޑު ދައްކާފައެވެ. އެހެންކަމުން އިތުރު ވަގުތުގެ ބާކީ ބައި އެޓީމުން ފުރިހަމަ ކުރަން ޖެހުނީ 10 ކުޅުންތެރިންނާއެކުއެވެ. މި މެޗުގައި ވެލެންސިއާ އަށް ޗެމްޕިއަންކަން ކަށަވަރުކޮށްދިން ލަނޑު ކާމިޔާބުކޮށްދިނީ ސްޕެއިން ފޯވާޑް ބޯހާސް މާޓީންއެވެ.
ފައިނަލް މެޗުގެ މޮޅު ކުޅުންތެރިޔާގެ މަގާމް ހޯދީ ވެލެންސިއާގެ ބޯހާސް މާޓީންއެވެ. މި މުބާރާތުގެ އެންމެ ގިނަ ލަނޑު ޖެހި ކުޅުންތެރިޔާ އަދި އެންމެ މޮޅު ކުޅުންތެރިޔާގެ މަގާމް ހޯދާފައިވަނީ ކްލަބް ވެލެންސިއާގެ ކެޕްޓަން ޢަލީ ފާސިރު (ސެންޓޭ) އެވެ.
ކޮމެންޓު ފޮނުވާ