އެމްޑީޕީން ރޭ ފޯކައިދޫގައި ބޭއްވި މުޙައްމަދު ރާޝިދުގެ ކެމްޕެއިން ޖަލްސާގައި ފެނުނީ އެޕާޓިގެ ފޯކަސް ގެއްލިފައިވާތަންކަމަށް ޕީއެންސީގެ ނާއިބު ރައީސް އަދި މަޑުއްވަރީ ދާއިރާގެ މެންބަރު އާދަމް ޝަރީފް ޢުމަރު ވިދާޅުވެއްޖެއެވެ.
ރޭ އެމްޑީޕީން ފޯކައިދޫގައި ބޭއްވި ކެމްޕެއިން ޖަލްސާގައި ރައްޔިތުންގެ މަޖިލީހުގެ ރައީސް މުޙައްމަދު ނަޝީދާއި، ޑިފެންސް މިނިސްޓަރ މާރިޔާ އަޙްމަދު ދީދީއާއި، މިނޫނަސް ދައުލަތުގެ އެހެނިހެން ވަޒީރުންނާއި އެމްޑި÷ީ މަޖިލިސް މެންބަރުން ވަނީ ބައިވެރިވެވަޑައިގެންފައެވެ. މި ޖަލްސާގައި ރައީސް އިބްރާހީމް މުޙައްމަދު ޞާލިޙްވެސް ބައިވެރިވެވަޑައިގަންނަވާގޮތަށް ކުރިން ހަމަޖެހުނުނަމަވެސް އެމަނިކުފާނު ކޯވިޑަށް ޕޮޒިޓިވްވުމާއި ގުޅިގެން ޖަލްސާގައި ބައިވެރިވެވަޑައި ނުގަންނަވައެވެ.
ރޭގެ ޖަލްސާގައި ރައީސް ނަޝީދާއި އެހެނިހެން ބޭފުޅުން ދެއްކެވި ވާހަކަފުޅުތައްކަށް ރައްދު ދެއްވާ އާދަމް ޝަރީފް ޢުަމަރު ވިދާޅުވީ ފޯކައިދޫގައި ބޭއްވި ޖަލްސާގައި ރާޝިދަށްވުރެ ބޮޑަށް ޕްރޮމޯޓްވީ ރައީސް ޔާމީންކަމަށެވެ. އެމްޑީޕީގެ ކެމްޕެއިން ފޯކަސް ގެއްލި ރާޝިދު ޕްރޮމޯޓް ނުކޮށް، ދިފާޢަށް ކުޅެނީ ޝަކުވާ ބޮޑުވެ ސަރުކާރު ޕްރެޝަރަށް ވެއްޓިފައިވާތީކަމަށްވެސް އާދަމް ޝަރީފް ވިދާޅުވިއެވެ.
ސަރުކާރުގެ ނުފޫޒަށް ރައްޔިތުން ނޫނެކޭ ބުނާނެ، އިންޝާﷲ.
– އާދަމް ޝަރީފް ޢުމަރު
ރޭ ފޯކައިދޫގައި ބޭއްވި ޖަލްސާގައި ވާހަކަފުޅު ދައްވަމުން ރައީސް ނަޝީދު ވަނީ ރާއްޖެ ބަދަލު ކުރުމަށްޓަކައި އެމްޑީޕީން ފަށާފައިވާ މަސައްކަތް ނިންމާލެވޭނީ އެމްޑީޕީގެ ވެރިކަމުގައި އަދި އިތުރު 10 އަހަރު ލިބިގެންކަމަށް ވިދާޅުވެފައެވެ. އީސް ނަޝީދު ވިދާޅުވީ ރާއްޖެ ތަރައްޤީ ކުރުމަށް އެމްޑީޕީން ގެންގުޅޭ ސިޔާސަތަކީ މުޅިން އެހެން ރާއްޖެއެއް ބިނާކުރުންކަމަށެވެ. އެމަސައްކަތުގައި މިހާރުވެސް ވަރަށް ބާރަށް މަސައްކަތް ކުރެވެމުންދާކަމަށެވެ. ނަމަވެސް އަދިވެސް ވަރަށް ގިނަ މަސައްކަތް ކުރަންޖެހިފައިވާކަމާށާއި، މިމަސައްކަތް ކުރެވޭނީ އެމްޑީޕީއަށް އަދި އިތުރު 10 އަހަރު ލިބިގެންކަމަށް ރައީސް ނަޝީދު ވިދާޅުވިއެވެ.
ރައީސް ނަޝީދު ވިދާޅުވީ އެމްޑީޕީން ގެންނަން ބޭނުންވާ ތަރައްޤީއަކީ ކޮންކްރީޓް ތަރައްޤީ ގެނައުން ނޫންކަމަށެވެ. އެމްޑީޕީން ބޭނުންވާ ތަރައްޤީއަކީ އަބަދުވެސް މީހާގެ ޖީބަށް ވަންނަ ފައިސާ ކަމަށާއި އެކަން ނުކުރެވޭނަމަ ތަރައްޤީއެކޭ ކިޔުމުގެ ފުރުސަތެއް ނެތްކަމަށެވެ. އެމްޑީޕީން މަސައްކަތް ކުރަމުންދަނީ ކޮމަންޑޫ ދާއިރާގެ ރައްޔިތުންގެ ޖީބަށް ވަންނަމުންދާ ފައިސާ އިތުރު ކުރުމަށް ކަމަށާއި އެކަން އެމްޑީޕީން ކުރާނެކަމަށް ރައީސް ނަޝީދު ވިދާޅުވިއެވެ.
ރާއްޖޭގެ ރައްޔިތުންނަށް ބޭނުންވާ އަސާސީ ޚިދުމަތްތަކާއިއެކު މިސަރުކާރުން ކުރާ އެންމެ މުހިންމު މަސައްކަތަކީ މަތީ ތައުލީމަށް ޚާއްސަ އިސްކަމެއް ދީގެން ކުރާ މަސައްކަތް ކަމަށާއި، ހިލޭ ޑިގްރީގެ ޕްރޮގުރާމަކީ މިސަރުކާރުން ހިންގާ އެންމެ ކާމިޔާބު އެންމެ ބޭނުންތެރި މަޝްރޫޢުކަމަށް ރައީސް ނަޝީދު ވިދާޅުވިއެވެ. އަދި މިހާރު މިނިމަމްވޭޖް ކަނޑައެޅި ކުޑައުޖޫރަ ލިބެމުންދިޔަ މީހުންނަށް ހަމަ އުޖޫރައެއް ލިބޭނެ ގޮތް ފަހިކޮށްދީފައިވާކަމަށެވެ.
މިޖަލްސާގައި ރައީސް ނަޝީދުވަނީ "އިންޑިއާ އައުޓް" ހަރަކާތަށްވެސް ފާޑުވިދާޅުވެފައެވެ. ރައީސް ނަޝީދު ވިދާޅުވީ ރައީސް ޔާމީން އިސްކޮށް ހުންވައިގެން އެކުރައްވަނީ ވަރަށް ނުރައްކާތެރި މަސައްކަތެއް ކަމަށެވެ. އެކަމުން ނިކުންނާނެ ނަތީޖާއަކީ ދިވެހި ރައްޔިތުންނަށް އެކަމުން ގެއްލުންތަކެއް ވުންކަމަށާއި، އެކަން އެނގިހުރި ކުރައްވާ މަސައްކަތަކަތުގައި ދިވެހި ރައްޔިތުން ބައިވެރި ނުވުމަށް ރައީސް ނަޝީދު ވަނީ ގޮވާލާފައެވެ.
