ޕްރެޒިޑެންޓްސް ކަޕް ފުޓްބޯޅަ މުބާރާތުގެ ފައިނަލްގައި ވާދަކުރާ ކްލަބް ވެލެންސިއާ އާއި މާޒިޔާ ރ.އަލިފުއްޓަށް ދިއުމުން އެރަށުން ހޫނު މަރުހަބާ އެއްކިޔައިފިއެވެ.
މިއަހަރުގެ މުބާރާތުގެ ފައިނަލް މެޗު ކުޅުމަށް ހަމަޖައްސާފައިވަނީ ސަރުކާރުން ރ.އަލިފުށީގައި ތަރައްޤީކުރި ޓާފް ފުޓްބޯޅަ ދަނޑުގައެވެ.
މުބާރާތުގެ ފައިނަލުގައި ވާދަކުރާ ކްލަބް ވެލެންސިއާ އަލިފުއްޓަށް ދިޔައީ މިއަދު ހެނދުނުގެ ވަގުތެއްގައެވެ. އަދި މާޒިޔާ އަލިފުއްޓަށް ގޮސްފައިވަނީ މިރޭގެވަގުތެއްގައެވެ. މި ދެ ޓީމަށްވެސް މަރުހަބާ ކިޔުމުގެ ގޮތުން އަލިފުށި ކައުންސިލުން ވަނީ ބަނދަރު ސަރަހައްދުގައި ބޮޑުބެރާއެކު ސަގާފީ ހަރަކާތްތަކެއްކުރިޔަށް ގެންގޮސްފައެވެ.
ފައިނަލްގައި ވާދަކުރާ 2 ޓީމުގެ އިތުރުން މުބާރާތް ބާއްވާ އެފްއޭއެމްގެ އެޑްވާންސް ޓީމުވެސް މިހާރު ތިބީ އަލިފުށީގައެވެ. މުބާރާތުގެ ފައިނަލް މެޗަށް އަލިފުށިއޮތީ ވަރަށް ބޮޑަށް ތައްޔާރުވެފައެވެ. އެގޮތުން ދަނޑުގައި އިތުރަށް ފުރިހަމަ ކުރަން ޖެހޭ ކަންކަން އެފްއޭއެމް އާއި ޔޫތް މިނިސްޓްރީ އަދި އެރަށު ކައުންސިލްގުޅިގެން މިހާރު ދަނީ ކުރަމުންނެވެ.
ރާއްޖޭގެ އެންމެ ޝަރަފްވެރި ފުޓްބޯޅަ މުބާރާތުގެ ފައިނަލް މެޗު މާލެއިން ބޭރުގައި އެންމެ ފަހުން ބާއްވާފައިވަނީ 2015 ވަނަ އަހަރު އައްޑޫ ސިޓީގައެވެ.
އަންނަ އާދީއްތަ ދުވަހުގެ ހަވީރު 4 ޖަހާއިރު ފަށާ ފައިނަލް މެޗު ޝަރަފްވެރިކޮށްދެއްވުމަށް ރާއްޖޭގެ ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހްއަލިފުއްޓަށް ވަޑައިގަތުމަށް ވަނީ ހަމަޖެހިފައެވެ.
ކޮމެންޓު ފޮނުވާ