ޕްރެޒިޑެންޓްސް ކަޕް ފުޓްބޯޅަ މުބާރާތުގައި މިރޭ ކްލަބް ވެލެންސިއާ އަތުން މާޒިޔާ ބަލިވި ނަމަވެސް ލަނޑުގެ ތަފާތުން ކުރި ހޯދައި މާޒިޔާ ސްޕޯޓްސް އެންޑް ރެކްރިއޭޝަނުން މުބާރާތުގެ ފައިނަލުގެ ފަހު ޖާގަ ކަށަވަރުކޮށްފިއެވެ.
ރަސްމީ ފުޓްބޯޅަ ދަނޑުގައި ކުޅުނު މި މެޗު ވެލެންސިއާ އިން ކާމިޔާބުކުރީ 0-1 ގެ ނަތީޖާއަކުންނެވެ.
ޕްރެޒިޑެންޓްސް ކަޕުގެ ފައިނަލަށް ވެލެންސިއާ ދަތުރުކުރީ މުބާރާތުގައި ކުޅުނު އެއްވެސް މެޗަކުން ބަލިނުވެ އެއްވަނަ ޓީމުގެ ގޮތުގައެވެ. އެއީ 7 މެޗުން ހޯދި 19 ޕޮއިންޓާއެކުއެވެ. މާޒިޔާ ފައިނަލަށް ދަތުރުކުރީ ދެވަނަ ޓީމުގެ ގޮތުގައެވެ. އެއީ 7 މެޗުން ލިބުނު 15 ޕޮއިންޓާއެކުއެވެ. ތިންވަނައިގައި އޮތް ގްރީން ސްޓްރީޓްސް އަށްވެސް 15 ޕޮއިންޓް ލިބިފައިވާއިރު، މާޒިޔާއަށް 2 ވަނަ ލިބުނީ އެންމެ ލަނޑެއްގެ ތަފާތުންނެވެ.
މާޒިޔާ އާއި ވެެލެންސިއާ ބައްދަލުކުރި މެޗު ފަށައިގެން ފުރަތަމަ ރަނގަޅަށް ކުޅެމުން ދިޔައީ މާޒިޔާއިންނެވެ. މެޗުގައި ވެލެންސިއާ އިން ޖެހި ހަމައެކަނި ލަނޑު 31 ވަނަ މިނެޓުގައި ކާމިޔާބުކޮށްދިނީ ޢަލީ ފާސިރުއެވެ. މާޒިޔާއިން ވަނީ ފުރަތަމަ ހާފް ނިމުމުގެ ކުރިން ނަތީޖާ ހަމަހަމަކުރުމަށް ވަރަށް މަސައްކަތްކޮށްފައެވެ.
މެޗުގެ ދެވަނަ ހާފުގައި ވެެލެންސިއާ އަށް ވަނީ ލީޑު ފުޅާކުރުމަށް ރަނުގެ ފުރުޞަތެއް ލިބިފައެވެ. ވެލެންސިއާގެ ހުސެއިން ހަނާންއަށް ޕެނަލްޓީ އޭރިޔާ ތެރެއިން ކުރި ފައުލަކާއި ގުޅިގެން ރެފްރީ ސިނާން ވެލެންސިއާ އަށް ދިން ޕެނަލްޓީ އަލީ ފާސިރު ފޮނުވާލުމުން މާޒިޔާގެ ކީޕަރ ވަނީ ހުށިޔާރު ކަމާއެކު ދިފާއުކޮށްފައެވެ.
މި މުބާރާތުގެ ފައިނަލް މެޗު ކުޅުމަށް ހަމަޖެހިފައިވަނީ އަންނަ އާދީއްތަ ދުވަހުއެވެ. ފައިނަލް މެޗުު ކުޅޭނީ ރ.އަލިފުށި ޓާފް ފުޓްބޯޅަ ދަނޑުގައެވެ.
ކޮމެންޓު ފޮނުވާ