އަންނަ މަހުގެ ފަސް ވަނަ ދުވަހު ބޭއްވުމަށް ހަމަޖެހިފައިވާ ކޮމަންޑޫ ދާއިރާގެ ބައި އިލެކްޝަންގައި އިދިކޮޅު ކެނޑިޑޭޓް މޫސާ ފަތުޙީގެ ކެމްޕެއިނަށް ޕީޕީއެމްގެ ރައީސް އަދި އިދިކޮޅު ލީޑަރު ރައީސް ޔާމީން ވަޑައިގެންނެވުމުން އެރަށުން ފަތުޙީއަށް އޮތް ތާއީދު ދައްކާލައިފިއެވެ.
މިއަދު ހަވީރު ރައީސް ޔާމީން ފޯކައިދޫއަށް ވަޑައިގެންނެވުމުން، އެރަށުގެ ވަރަށް ގިނަ އަދަދެއްގެ ބަޔަކު ވަނީ އެމަނިކުފާނަށް މަރުހަބާ ދެންނެވުމަށް ބަނދަރަށް ނިކުމެފައެވެ. ފޯކައިދޫއަށް ރައީސް ޔާމީނާއި، ފަތުޙީގެ ކެމްޕެއިން ޓީމުން ވަނީ މިއަދު ހަވީރު އެރަށުގެ ޕީޕީއެމް ސަޕޯޓަރުންނާއި ބައްދަލުކޮށްފައެވެ.
ފަތުޙީގެ ކެމްޕެއިން ރަސްމީކޮށް އިފްތިތާހު ކުރުމުގެ ޖަލްސާވެސް ބޭއްވުމަށް ހަމަޖެހިފައިވަނީ މިރޭ ފޯކައިދޫގައެވެ. ފޯކައިދޫއަކީ މިއިންތިޚާބުގައި ވެރިކަންކުރާ މައި ޕާޓީ އެމްޑީޕީން ވާދަކުރާ ކެންޑިޑޭޓު ނިސްބަތްވާ ރަށެވެ.
މޫސާ ފަތުހިގެ ކެމްޕެއިނަށް ރައީސް ޔާމީން ފޯކައިދޫއަށް ވަޑައިގަތުން.#tick2#VoteFathuhy#VoteRukah#MeeMageyRaajje#IndiaOut pic.twitter.com/VReNygF0en
— Progressive Party of Maldives (@ProgressPartyMV) January 15, 2022
ރައީސް ޔާމީން ވަނީ ފަތުޙީގެ ކެމްޕެއިނަށް މިކުރައްވާ ދަތުރުފުޅުގައި މިއަދު ހެނދުނު ވަނީ މަރޮއްޓަށްވެސް ވަޑައިގެންފައެވެ. އަދި މަރޮށީ ޕީޕީއެމްގެ ސަޕޯޓަރުންނާއި، ފަތުޙީގެ ކެމްޕެއިން ޓީމާއި ބައްދަލުކޮށް ކެމްޕެއިންގެ ހަރަކާތްރައް ކުރިއަށް ގެންދަންވީ ގޮތާއި، މިއިންތިޚާބު ޕީޕީއެމްއަށް ކާމިޔާބު ކުރުމުގެ މުހިންމުކަމުގެ މައްޗަށް ވަނީ ވާހަކަފުޅު ދައްކަވާފައެވެ.
ރައީސް ޔާމީން ކޮމަންޑު ދާއިރާގެ ރަށްތަކަށް ވަޑައިގަންނަވާއިރު، ސަރުކާރުގެ ގިނަ އަދަދެއްގެ ވަޒީރުންނާއި، ކުންފުނިތަކުގެ ވެރިންނާއި، ނައިބް ރައީސް ފައިސަލް ނަސީމްވެސް ހުންނެވީ ކޮމަންޑޫ ދާއިރާގައެވެ. އިންތިޚާބާއި ދިމާކޮށް ބޮޑެތި ގިނަ މަޝްރޫޢުތަކެއް ކޮމަންޑޫ ދާއިރާގައި ފަށައި ކުރިއަށް ގެންދިއުމަކީ އިންތިޚާބަށް ނުފޫޒު ފޯރުވުމަށް ކުރާ ކަމެއްގެ ގޮތުގައި ގިނަ ބަޔަކު ދަނީ ބުނަމުންނެވެ. ނަމަވެސް ސަރުކާރުން ބުނަމުންދަނީ މިއީ ނުފޫޒަށް ވިޔަސް އެއްވެސް މަސައްކަތެއް ހުއްޓާނުލާނެކަމަށެވެ.
