ކޮމަންޑޫ ދާއިރާގެ އިންތިޚާބަކީ ރިޔާސީ އިންތިޚާބާއި ދޭތެރޭ އަޅާ ފުރަތަމަ ފިޔަވަޅު ކަމުގައި އިދިކޮޅު ލީޑަރު އަދި ޕީޕީއެމްގެ ރައީސް އަބްދުﷲ ޔާމީން އަބްދުލް ޤައްޔޫމް ވިދާޅުވެއްޖެއެވެ.
ކޮމަންޑޫ ދާއިރާގެ ޕީޕީއެން ކެނޑިޑޭޓް މޫސާ ފަތުހީގެ ކެމްޕެއިން ރަސްމީކޮށް އިފްތިތާހު ކުރުމަށް މިއަދު ކޮމަންޑޫގައި ބޭއްވި ޖަލްސާގައި ވާހަކަ ދައްކަވަމުން ރައީސް ޔާމީން ވިދާޅުވީ ކޮމަންޑޫ ދާއިރާއަކީ އޮތް ދާއިރާއެއްކަން މިސަރުކާރަށް އެނގުނީވެސް މިއިންތިޚާބު ބޯމަތިވަމުންކަމަށެވެ.
ކޮމަންޑޫ ދާއިރާގެ ރައްޔިތުންނަށް އެންމެ ބޮޑަށް ބޭނުންވި ކަންކަން ކުރީ ޕީޕީއެމްގެ ވެރިކަމުގައި ކަމަށް ޔާމީން ވިދާޅުވިއެވެ. އެގޮތުން ކޮމަންޑޫގެ ބިން ހިއްކައި ރިވެޓްމެންޓް ޖަހައި ޖުމްލަކޮށް މުޅި ކޮމަންޑޫ ދާއިރާއަށް 500 މިލިޔަން ރުފިޔާ ނިިމިދިޔަ ވެރިކަމުގައި ހޭދަކޮށްފައިވާކަމަށް ޔާމީން ވިދާޅުވިއެވެ. މިސަރުކާރުން މިއިންތިޚާބާއި ދިމާކޮށް މިއަދު އަނެއްކާ ކުއްލިއަކަށް ކޮމަންޑޫ ދާއިރާގެ ރައްޔިތުންނަށް ބޯހިޔާވަހިކަން ހޯދުމަށް ކުރައްވަމުންދާ މަސައްކަތަކީ ޕީޕީއެމްއުން ފަށާފައިވާ މަސައްކަތް ކަމުގައި ޔާމީން ވިދާޅުވިއެވެ.
ރައީސް ޔާމީން ވިދާޅުވީ މިއީ ކުރިއަށް އޮތް ރިޔާސީ އިންތިޚާބު ކާމިޔާބު ކުރުމާއި ދޭތެރޭގައި ޕީޕީއެމްއިން އަޅާ ފުރަތަމަ ފިޔަވަޅަށް ވެގެންދާނެކަމަށެވެ. އަދި ރައީސް ޔާމީން ވަނީ ވަރަށް އިތުބާރާއި ޔަގީން ކަމާއިއެކު ކުރިއަށް އޮތް ރިޔާސީ އިންތިޚާބު ޕީޕީއެމުން ބޮޑު ތަނުން ކާމިޔާބު ކުރާނެކަމަށް ވިދާޅުވެފައެވެ.
ވަގަން ނުނަގަންޏާ ކުރިއަށް ރިޔާސީ އިންތިޚާބަކީ ޕީޕީއެމްގެ އިންތިޙާބެއް. މިދިޔަ އިންތިޚާބު ވަގަށް ނެގިގޮތަށް ދެން އަންނަ އިންތިޚާބު ވަގަށް ނަގަން ދިވެހި ރައްޔިތުން ޖާގަ ނުދޭނެ. ރައްޔިތުން ތިބީ ދިވެހި ރައްޔިތުންގެ މިނިވަންކަމާއި ދިޔާދަތާއި އިސްތިގުލާލު ހިމާޔަތް ކުރުމަށް.
– ރައީސް ޔާމީން ވިދާޅުވިއެވެ.
ރައީސް ޔާމީން ކޮމަންޑޫ ދާއިރާއަށް ކުރައްވަ ފަތުރުފުޅުގައި އިދިކޮޅު ޕްރޮގްރެސިވް ކޮންގްރެސް ކޯލިޝަންގެ އިސް ބޭފުޅުން ވަނީ ބައިވެރިވެފައެވެ. މިދަތުރުފުޅުގައި ރައީސް ށ.އަތޮޅުގެ 6 ރަށަކަށް ވަޑައި ގަތުމަށް ވަނީ ހަމަޖެހިފައެވެ. އަދި މާދަމާ ށ.ފުނަދޫގައި ބާއްވާ އިންޑިއާ އައުޓް ހަރަކާތުގައިވެސް ބައިވެރިވުމަށް ވަނީ ހަމަޖެހިފައެވެ.
ކޮމަންޑޫ ދާއިރާގެ ކެމްޕެއިން ފޯރިގަދަވެފައިވާއިރު، ސަރުކާރުގެ ކެނޑިޑޭޓާއި، އިދިކޮޅު އެމްޑީޕީގެ ކެނޑިޑޭޓުގެ މެދުގައި ވާދަވެރިކަން ބޮޑުވެ، އެމްޑީޕީއާއި، ޕީޕީއެމްގެ ލީޑަރޝިޕުން ދަނީ މިއިންތިޚާބު ކާމިޔާބް ކުރުމަށް ގިނަ މަސައްކަތްތަކެއް ކުރަމުންނެވެ. އަދި އެމްއެންޕީންވެސް ދަނީ އިންތިޚާބު ކާމިޔާބު ކުރުމަށް ގިނަ މަސައްކަތްތަކެއް ކުރަމުންނެވެ. އިންތިޚާބާއި ދިމާކޮށް، ސަރުކާރުން ގިނަ މަޝްރޫޢުތަކެއް ކޮމަންޑޫ ދާއިރާގައި ކުރުމަށް މަސައްކަތް ކުރަމުންދާއިރު، އެފަދަ ކަންކަން ނުކުރުމަށް އިލެކްޝަން ކޮމިޝަނުންވެސް ވަނީ އިލްތިމާސް ކޮށްފައެވެ.
އަންނަ ފެބްރުއަރީ މަހުގެ 5 ވަނަދުވަހު އޮންނަ ބައި އިލެކްޝަންގައި 6 ވޯޓް ފޮއްޓެއް ބެހެއްޓުމަށް އިލެކްޝަންސް ކޮމިޝަނުން ވަނީ ނިންމާފައެވެ. މި ފޮށިތަކުގެ ތެރެއިން މާލޭގައި އުޅޭ އެ ދާއިރާގެ ރައްޔިތުން ވޯޓްލާން ޖެހޭ ފޮށި ހުންނާނީ އިންތިހާބާއި ބެހޭ މަރުކަޒު ބާ ޖަމާލުއްދީނުގައެވެ. ކޮމަންޑޫއާއި ފޯކައިދޫ އަދި މަރޮށި ހިމެނޭ މި ދާއިރާގައި 3316 މީހުންނަށް ވޯޓްލުމުގެ ހައްޤު ލިބިގެންވެއެވެ.
