އޫރެއްގެ ހިތް ކާމިޔާބު ކަމާއެކު ފުރަތަމަ ފަހަރަށް އިންސާނެއްގެ ހަށިގަޑުގައި އިންދައިފި

ދުނިޔޭގައި ފުތަރަމަފަހަރަށް ކާމިޔާބު ކަމާއެކު، އޫރެއްގެ ހިތް އިންސާނެއްގެ ހަށިގަޑަށް ލައްވައިފިއެވެ.

އުމުރުން 57 އަހަރުގެ ޑޭވިޑް ބެނެޓް ކިޔާ މީހެއްގެ ހަށިގަޑަށް ލައްވާ، ފުރިހަމަޔަށް މަސައްކަތް ކުރަމުންދާ އޫރުގެ މި ހިތަކީ ޖެނެޓިކް ބަދަލުތައް ގެނެސްފައިވާ ހިތެކެވެ. އަދި ޑޮކްޓަރުން ބުނެފައިވަނީ 7 ގަޑިއިރުގެ އޮޕަރޭޝަނަކަށްފަހު، މި ހިތް ބެނެޓްގެ ހަށިގަޑުގައި އިންދާފައިވާތާ މިހާރު 3 ދުވަސް ވެފައިވާ ކަމަށާއި، އޭނާގެ ހާލުވެސް ރަގަޅު ކަމަށެވެ.

ބެނެޓްގެ ހަށިގަޑުގައި ހިތް އިންދުމަކީ އޭނާގެ ފުރާނަ ސަލާމަތް ކުރުމަށްޓަކާ އޮތް އެންމެ ފަހުގެ އުއްމީދު ކަމުގައި ޑޮކްޓަރުންވަނީ ބުނެފައެވެ. އެހެންނަމަވެސް ޑޮކްޓަރުން ބުނެފައިވަނީ، ބެނެޓްގެ ހަށިގަޑުގައި އޫރުގެ ހިން އިންދައިގެން އޭނާއަށް ދުނިޔޭގައި ހުރެވޭނީ ކިހާ ދުވަހަކުކަން އަދި ބުންނަން ނޭގޭ ކަމަށެވެ.

"އަހަރެންނަށް އޮތް ގޮތަކީ ދިރި ހުރުމަށްޓަކާ މި ހިތް ލެއްވުން ނުވަތަ މަރުވެގެން ދިއުން،" ސާޖަރީ ހެދުމުގެ އެއް ދުވަސް ކުރިން ބެނެޓް ބުނެފައި ވެއެވެ.

އެމެރިކާގެ ކަމާއި ގުޅުންހުރި މުވައްސަސާއިން ބެނެޓްގެ ހަށިގަޑުގައި އޫރުގެ ހިތް ލެއްވުމުގެ ހުއްދަ ޑޮކްޓަރުންނަށް ދިފައިވަނީ، ޚާއްސަ ހުއްދައެއްގެ ދަށުންނެވެ. އަދި މި ޚާއްސަ ހުއްދަ ދޫކޮށްފައިވަނީ، އޭނާއަކީ، ފަރުވާއެއް ނެތް ހިތުގެ ބައެއްޔަކަށް ފަރުވާ ހޯދަމުންދާ މީހަކަށް ވުމާއއެކުި، މި ހިތް އޭނާގެ ހަށިގަޑުގައި ނީންދައިފިނަމަ އޭނާ ދުނިޔޭގައި ހުރުމުގެ ފުރުސަތު ނެތްކަމަށް ނިންމާފައި ވުމުގެ މައްޗަށް ބަރޯސާ ކޮށެވެ.

ބެނެޓްއަކީ، އޭނާގެ ބަލިހާލަތަށް ބަލާއިރު ހިތް ބަދަލުކުރުމުގެ އޮޕަރޭޝަން ކުރުމަށް އެކަށީގެންވާ ވަރަށް ސިއްޙަތު ތަންދޭ މީހެއް ނޫންކަމަށްވެސް ޑޮކްޓަރުން ވަނީ ބުނެފައެވެ.

ހިތް ބަދަލު ކުރުމުގެ އޮޕްރޭޝަންގައި ބޭނުންކުރި އޫރަކީ، ޖެނެޓިކް ބަދަލުތައް އެއަށް ގެނެސްފައިވާ އޫރެކެވެ. ޑޮކްޓަރުން އޫރަށް ޖެނެޓިކް ބަދަލުތައް ގެނެސްފައިވަނީ، އޫރުގެ ހިތުގައިވާ ބެނެޓްގެ ހަށިގަޑާއި ނުގުޅޭ ޖީންތައް އެއާއި ވަކި ކުރުމަށްޓަކައެވެ.

ހިތް ބަދަލު ކުރުމުގެ އޮޕަރޭޝަން ކުރި ޓީމަށް މި އޮޕަރޭޝަން ވެގެން ގޮސްފައިވަނީ، އެތައް އަހަރެއްވަންދެން އެ ޓީމުން ކޮށްފައިވާ ދިރާސާތަކުގެ ނަތީޖާ ކަމުގައިއެވެ. އަދި ޑޮކްޓަރުންގެ ޓީމުން ގަބޫލު ކުރާ ގޮތުގައި، މި އޮޕަރޭޝަންގެ ނަތީޖާއެއްގެ ގޮތުން، ދުނިޔޭގެ އެތައް ބައެއްގެ ދިރުއުޅުމަށް ބޮޑެތި ބަދަލުތަކެއް އަންނާނެއެވެ.

ސާރޖަން ބާރޓްލީ ގްރިފިތު ވިދާޅުވެފައިވަނީ، މި ސާޖަރީ ވެގެންދާނީ "ގުނަވަންތައް ނެތިގެން ކުރިމަތިވަމުންދާ ކާރިސާތަކަށް ނިމުން ގެނައުމަށް ކުރިޔަށް އެޅުނު ފިޔަވަޅަކަށް،" ކަމުގައެވެ. އެމެރިކާގައި މިހާރުވެސް، ގުވަންތައް ބަދަލު ކުރަން ޖެހިފައިވާ މީހުންގެ ތެރެއިން ދުވާލަކަށް 17 މީހަކު މަރުވަމުން ދެއެވެ. އަދި ގުނަވަންތައް ބަދަލު ކުރުމަށް ވެއިޓިން ލިސްޓުގައި އެމެރިކާގައި ޖުމްލަ 100،000 މީހުން މިހާރުވެސް އެބަތިއްބެވެ.

ޑޮކްޓަރުން ބުނެފައިވަނީ، މިއީ ދުނިޔޭގައި މިހާތަނަށް ކުރެވުނު މިފަދަ ފުރަތަމަ އޮޕަރޭޝަންކަމަށް ވުމާއިރު، މި އޮޕަރޭޝަނަށްފަހު، ބެނެޓް ހާލަތު ބަދަލުވެގެންދާނެ ގޮތެއް އަދި ބުނަން ނޭގޭ ކަމަށެވެ.

"މީހުން އެދަނީ، ގުނަވަންތައް ނުލިބިގެން ވެއިޓިން ލިސްޓުގައި ތިއްބާ މަރުވެގެން. ޖެނެޓިކް ބަދަލުތައް ގެނެސްފައިވާ އޫރުގެ ގުނަވަންތައް އިންސާނުންގެ ހަށިގަޑަށް މިގޮތަށް ލެއްވޭނަމަ، މިގޮތަށް ގުނަވަންތައް ލިބޭތޯ މަޑުށްގެން ތިބޭކަށް ނުޖެހެނެ. ބޭނުންވާއިރަށް ގުވަންތައް ލިބެން ހުންނާނެ،" ޔުނިވަރސިޓީ އޮފް މެރީލޭންޑުގެ ސްކޫލް އޮފް މެޑިސިންގެ ސާޖަރީ ޑިޕާޓްމަންޓުގެ ޗެއަރ ޑރ. ކްރިސްޓައިން ލައު ވިދާޅުވިއެވެ.

ފާއިތުވެދިޔަ އަހަރުގެ އޮކްޓޯބަރުމަހު، އެމެރިކާގެ ނިއުޔޯކުގެ ސާޖަންޓުންވަނީ، ކާމިޔާބު ކަމާއެކު، އޫރުގެ ކިޑްނީ އިންސާނެއްގެ ހަށިގަޑުގައި އިންދާފައިވާކަން އިއުލާން ކޮށްފައެވެ. އަދި މިއީ އެހާތަނަށް ދުނިޔޭގައި ކުރެވުނު މިަފދަ އެންމެ ކުރިއަރާފައިވާ އޮޕަރޭޝަންއެވެ.

އެހެންނަމަވެސް، އޫރުގެ ކިޑްނީ ހަށިގަޑުގައި ލެއްވި މީހާއަކީ، ސިކުނޑި މަރުވެފައިވާ މީހެއްކަމުން އޭނާ ރަގަޅުވެގެން އެބުރި އަންނާނޭކަމުގައި އުއްމީދު އޭރުވެސް ޑޮކްޓަރުންވަނީ ކަނޑާލާފައެވެ.