އެމްޑީޕީގެ ރައީސް މުހައްމަދު ނަޝީދަކީ އިސްލާމް ދީނުގެ ޢަދުއްވެއް ކަމުގައި ސިފިކޮށް އެމަކިންކާފަނުގެ ހަށިފުރާނައިގެ ރައްކާތެރިކަން ނަގައިލުމަށް ހިންގާ ހަރަކާތްތަކާމެދު ފިޔަވަޅު އެޅުމަށް ކަމާބެހޭ ފަރާތްތަކަށް އެޕާޓީން ގޮވާލައިފިއެވެ.
އެމްޑީޕީން މިއަދު ނެދުނު ބަޔާނެއްގައި ބުނެފައިވަނީ، ރައްޔިތުންގެ މަޖިލީހުގެ ރައީސް އަދި އެޕާޓީގެ ރައީސް މުޙައްމަދު ނަޝީދު ޣައިރު ދީންތައް ޕްރޮމޯޓުކުރާ ކަމަށް ދޮގު ޚަބަރު ފެތުރުމުގެ ވާސިތާއިން، އެ މަނިކުފާނުގެ ހަށިފުރާނައިގެ ރައްކާތެރިކަން ނަގައިލުމަށް ވާގިވެރިވަމުންދާ “ރައްޔިތުންގެ އިއްތިޙާދު”ގެ ނަމުގައި ހިންގާ ޙަރަކާތާމެދު ޤާނޫނީ ފިޔަވަޅު އެޅުމަށް އެ ޕާޓީއިން ސަރުކާރަށް ގޮވާލާ ކަމަށެވެ.
އަދި ދައުލަތުގެ މުއައްސަސާތައް މެދުވެރިކޮށްގެން އެ މަނިކުފާނުގެ އިސްތަށިފުޅުގައި ލާދީނީ ލޭބަލް އެޅުވުމަށް މިޙަރަކާތުން މަސައްކަތްކުރަމުންދާކަމީ ޚާއްސަ އެޕާޓީން ކަންބޮޑުވެއް ކަމުގައި މި ބަޔާނުގައި ފާހަގަ ކޮށްފައި ވެއެވެ.
މި ބަޔާނުގައި އިތުރަށް ބުނެފައިވަނީ، ނަޝީދަކީ އިސްލާމްދީނުގެ ޢަދުއްވެއްކަމުގައި ސިފަކޮށް، އެ ތަކްފީރީ ޖޯޝުން ހިތްވަރު ނެރެ، ހައްދުފަހަނަ އެޅި ދީނީ ހަރުކަށި ފަރާތްތަކުން 6 މޭ 2021 ގައި ދިން ބޮމުގެ ޓެރަރިސްޓް ޙަމަލާއިން މަނިކުފާނު ކިރިޔާ ސަލާމަތްވީތާ އަދި އަހަރެއް ވެގެން ގޮސްފައި ނުވާއިރު، އަދު އަމުދުން އަމުދުން އެ ޙަމަލާގެ އަޑީގައިވި ފަރާތްތައް އަދިވެސް ހޯދިފައިނުވާއިރު، އަދި ޓެރަރިސްޓް ޙަމަލާތަކަށް ދިވެހި މުޖުތަމަޢު ހުށަހެޅުމަށް ތައްޔާރަށް ތިބި ހައްދުފަހަނައެޅި ދީނީ ހަރުކަށި ވިސްނުމުގެ މީހުން ތިބިކަން ސަލާމަތީ ޚިދުމަތްތަކުން ހާމަކުރަމުންދާ ހިނދު، ރައީސް ނަޝީދަކީ ކާފަރެއްކަމުގައި ސިފަކުރުމުގެ ފިތުނަވެރި ޙަރަކާތެއް އަނެއްކާ އުފައްދާ، އިންތިޒާމުވެ، މިފަދަ ހަރަކާތްތައް ހިންގާން ދޫކުރުމަކީ ނަޝީދުގެ ފުރާނަފުޅުގެ އިތުރުން، ދިވެހި ޤައުމުގެ ސަލާމަތާއި ރައްކާތެރިކަމަށް ލޮޅުން އަރުވާފަދަ ނުރައްކާތެރި ކަމެއްކަމުގައި ވެސް އެޕާޓީން ދެކޭ ކަމަށެވެ.
ނަޝީދަކީ އިސްލާމް ދީނުގެ ޢަދުއްވެއް ކަމުގައި ސިފިކޮށް އެމަކިންކާފަނުގެ ހަށިފުރާނައިގެ ރައްކާތެރިކަން ނަގައިލުމަށް ހިންގާ ހަރަކާތްތަކާމެދު ފިޔަވަޅު އެޅުމަށް ކަމާބެހޭ ފަރާތްތަކަށް އެމްޑީޕީން ގޮވާލާފައިވާއިރު، ރައްޔިތުންގެ އިއްތިހާދުން ވަނީ، 2020 ވަނަ އަހރު ނަޝީދު ކުރިސްމަސްގެ ތަހުނިޔާ ފާޅުގައި ދިވެހީންނަށް ފޮނުވާފައިވާ މައްސަލަ ފުލުހުންނަށް ހުށަހަޅާފައެވެ. އެ އިއްތިހާދުން ހުށަހެޅި މައްސަލާގައި ބުނެފައިވަނީ ފާއިތުވެދިޔަ އަހަރުވެސް އަނެއްކާވެސް ކުރިސްމަސްގެ ތަހުނިޔާ ކިޔުން ނަޝީދު އާންމުކޮށް، ފޮޓޯވެސް އާންމު ކޮށްފައިވަ ކަމުގައެވެ.
އެހެންނަމަވެސް ރައްޔިތުންގެ އިއްތިހާދުން ހުށަހެޅި މައްސަލަ ނުބަލަން މިއަދު ފުލުހުން ވަނީ ނިންމާފައެވެ.
